گوونلیک گوجلری‌نین موداخیله‌سینه باخمایاراق تهراندا قادینلار گونو میتینقی کئچیریلدی
۱۹ اسفند ۱۳۹۹ چارشنبه آخشامی، بیر قروپ قادین فعال و مدنی فعال گوونلیک اورتامینا باخمایاراق تهرانین ساعی پارکیندا توپلاشاراق اولوسلاراراسی قادینلار گونونو قئید ائتدی.
اینسان حوقوقلاری ساوونوجولاری مرکزی‌نین تلگرام کانالی، بیر قروپ مدنی فعالی‌نین ۸ مارسا گؤره برابرلیک ماهنیسینی اوخودوغو میتینقین ویدئوسونو یاییملادی.
توپلاشانلار “حجاب مجبوری دئییل”، “قادینا شدتی دایاندیرین”، “قادین حوقوقلاری وئریلمه‌سی گؤزله‌نیلن حوقوق دئییل بلکه آلینمالیدیر”، “قادینلارا عمومیتله شیلله وورولور و بعضاً باشلاری کسیلیر”، “ناموس قتللرینی دایاندیرین” و “یوخسوللوق قادینا قارشی ایکی‌قات شدتدیر.” کیمی شوعارلاری ایله پلاکاتلار داشیییردیلار.
اینسان حوقوقلاری ساوونوجولاری مرکزی‌نین تلگرام کانالیندا یئر آلان بیلگییه گؤره، میتینق اؤنجه دونن، چارشنبه آخشامی، ساعت ۱۶-دا هنرمندان پارکیندا باش توتمالی ایدی، لاکین چوخ سایدا گوونلیک و پولیس گوجلری‌نین اولدوغو اوچون مومکون اولمادی.
گوونلیک گوجلری‌نین موداخیله‌سیندن سونرا چوخ سایدا قاتیلیمجی داغیلدی، لاکین تشکیلاتچیلارین قراری ایله میتینق ساعی پارکیندا کئچیریلدی.
میتینق قاتیلیمجیلاری آراسیندا اینسان حوقوقلاری ساوونوجولاری مرکزی‌نین معاونی و بئش ایل یاریم حبسدن سونرا بو ایل ۱۷ مهرده حبسدن آزاد ائدیلن مدنی فعال نرگس محمدی ده وار ایدی.
