یاساق (قادینلار گونو موناسیبتینه) / سحر خیاوی
یاساق
قادینلار گونو موناسیبتینه
سحر خیاوی
گؤرمه‌‌سین اوزومو گرک آل گونش،
دئدینیز: «صاندیغا قویون بو عاری!»
دوندوردو یئر اوزون شاختا، قار، کولک
قویلادیز قبیرده یاشیل باهاری.
یولدونوز قانادیم، اوچماییم دئیه،
قیردینیز قیچیمی، آچمایام آیاق.
باغلادیز پنجره، کیپله‌دیز قاپی،
گئنیش یاشیل‌لیغا گئتمه‌یم قوناق.
دیللندیم، دئدینیز: «دانیشماز قیزلار؛
قونشولار سسینی ائشیدر، آمان!»
بیلمه‌دیز گؤردوکجه آزاد قوشلاری،
نئجه قووزانیردی باشیمدان دومان!
باغلادیز گؤزومو، کور اولوم دئیه
تپدینیز قولاغیم، ائشیتمه‌یم هئچ.
گومانا دوشمه‌‌سین نامحرم ارکک
یولاقدان گئدنده دئدیز: «آستا کئچ!»
اون‌اوچ یاش‌لیغیمدا سولدو گولوشوم،
«ووقارلی قیزیم‌دیر» دئدیز سئوینجک.
ایچیمه گنج‌ایکن کدرلر دولدو،
کؤنلومده قویلاندی مین آق کپنک.
قولچاغیم الیمدن آلیندی او چاغ،
ساریلدی باشیما اکه‌لیک شالی.
آغلادیم، «اوشاغام هله من» دئدیم
نئجه چکه‌جکسیز ووزر-وابالی؟!
آغلادیم قولچاغیم منله آغلادی
آنادان آیریلان اوشاقلار کیمی
آغلادیق، سیتقادیق، کیمسه باخمادی،
چاغلادیق چاغلایان بولاقلار کیمی.
تاققیلدیر بئینیمده تاخ-تاخ باشماغیم،
ایندی ایسته‌سم ده گئیه بیلمیرم.
ائله یاساقلادیز کال سئویشمه‌می
هله ده سئوگیمی دئیه بیلمیرم.
هاواخت کی ایسته‌دیم سئوگیدن یازام
قیرمیزی چیراقلار اؤنومده بیتدی.
او غریب سئوگیلیم اون دؤرد یاشیمدا
بیلمه‌دیم نئج‌اولدو، هایاندا ایتدی؟!
آرخاما باخاندا دلی اوره‌ییم،
یانیر یاشانمامیش عؤموردن-گوندن.
سانکی کانسئر اولوب سئوگیسیز یاشام،
چتین جان قورتارام بو کور دوگوندن.
کسیلن قوللاریم اولوب گؤی قاناد،
بیتیب‌دیر چیینینده ملَک قیزیمین.
اوچاجاق من یاساق اولان گؤیلری
دونیا باخیشی وار چیچک قیزیمین
- یکشنبه 18 اسفند 1398
