ایرانلی قادین حاکم حجابا گوره دونیا شامپیونلوغو لیسته‌سیندن چیخاردیلدی
گولش اوزره کئچمیش دونیا شامپیونو و میلی گولش کوماندالاری‌نین مشقچیسی سردار پاشایی، ۵ مرداد ۱۴۰۱-جی ایلده مهسا قربانی‌نین شکلینی یایاراق، بو اولوسلارآراسی قادین حاکمین لیستدن چیخاریلماسینا اعتراض ائدیب.
جناب پاشایی بو تویتینده یازیب: ایرانین ایلک قادین اولوسلارآراسی فوتبول حاکمی مهسا قربانی ۲۰۲۳-جو ایل دونیا شامپیونلوغونا قاتیلیمدان قیراغا قویولوب. چونکی او، ایسلامی حجابا رعایت ائتمیردی، چونکی آیاقلاری بیر آز چیلپاق ایدی. چونکی ایران فوتبول فدراسیونونون یئتکیلیلری اونون فوتولارینی درج ائدندن اونا قارشی کین بسله‌یه‌رک پلانلی اولاراق اونو اوزاقلاشدیریبلار.
هله‌لیک نه ایران فوتبول فدراسیونو، نه ده خانیم قربانی بو خبرین آچیقلانماسینا تپکی وئرمه‌ییب. عمومیتله، ایرانین قادین فوتبولو و فوتسالیندا قادین حاکملرین وار اولماسی، مودیریت، ماليه، جینسی آیری-سئچکیلیک و ایران فوتبول فدراسیونونداکی فساد ایله قاریشیب.
ایرانلی قادین حاکملر هر زامان مجبوری حجاب و بیر چوخ مادی پروبلئملر ایله اوز اوزه قالیبلار و دفعه‌‌لرله بو آیری-سئچکیلیکلره و قادین حاکملرین معاشی‌نین آشاغی اولماسی کیمی پروبلئملره اعتراض ائدیبلر. آنجاق بو تنقید و طلبلردن سونرا حتی اولوسلارآراسی لیستده اولان مهسا قربانی کیمی بو حاکملردن بعضیلری اعتراضلارین داوام ائده‌جیی تقدیرده فیفا لیستیندن چیخاریلاجاقلاری ایله تهدید ائدیلیبلر.
#ایران_خبرلری #قادینلار #مهسا_قربانی
