سپیده قلیان اوین حبس‌خاناسی‌نین ۲۰۹-جو بندینه کؤچورولدو
ایران وایر-اوچ گون اؤنجه باجیسی‌نین اهوازداکی ائوینده ۳۰-دان چوخ گوونلیک گوجونون سالدیریسینا معروض قالدیقدان سونرا حبس ائدیلن و عائله‌‌‌سی هارا کؤچورولدویوندن خبرسیز اولان سپیده قلیان، اوین حبس‌خاناسی‌نین ۲۰۹-جو بندینه کؤچورولدو.
۲۲ مهر ۱۴۰۰ جوما آخشامی، اینسان حوقوقلاری اوزره وکیل “امیر رئیسیان” بو خبری اؤز توییتر صفحه‌‌‌سینده آچیقلادی: “بیر ساعت اؤنجه سپیده قلیان ایکی گون خبرسیزلیکدن سونرا عائله‌‌‌یه زنگ ووراراق اهوازدان بوشهره، بوشهردن تهرانا و اوین حبس‌خاناسینا (۲۰۹-جو بنده) آپاریلدیغینی سؤیله‌دی. “گؤرونن، بو کؤچورمه یئنی بیر پرونده اوچون (بوشهر حبس‌خاناسینداکی قادین محبوسلارین دورومو ایله باغلی ایفشاسی) ایستینطاق و دیندیریلمه اوچون ایدی.”
جناب رئیسیان، خسته مرخصی‌سینه گؤندریلدیکدن بیر نئچه گون سونرا توییترده یازدیغی بوشهر حبس‌خاناسیندا قادین محبوسلارین چوخ پیس دورومدا اولماسی ایله باغلی سپیده قلیانین آچیقلامالارینا ایستیناد ائدیر.
بو توییتده خانیم قلیان بوشهر حبس‌خاناسینی “اونودولموش جهنم” آدلاندیردی و یازدی: “بو بندده‌کی قادین محکوملار قادین و محبوس اولدوقلاری اوچون ان قدار ایشگنجه‌لر و اینسانلیقدان کنار شرطلر آلتیندا ساخلانیلیر.”
بو افشالاردان سونرا بوشهر ایالتینده‌کی جزاچکمه مودیرلیگی خانیم قلیاندان شیکایت ائتدی. بوشهر عومومی و اینقیلاب ساوجیلیغی‌نین ۲-جی شؤبه‌سی طرفیندن قئیده آلینان بو شیکایته گؤره، سپیده قلیان “بیلگی‌سایار اوزریندن یالان بیلگی یایماق” و “رژیمه قارشی تبلیغات فعالیتی” ایله گوناهلاندیریلدی.
خانیم قلیان، ۳۰-دان چوخ گوونلیک گوجونون سالدیریسینا معروض قالدیقدان سونرا، ۱۹ مهر بازار ائرته‌سی آخشامی حبس اولوندو و او واختدان عائله‌‌‌سینه هارادا اولدوغو باره‌ده بیلگی وئریلمه‌دی.
