اوشاق ادبیاتی کور اوغلویلا کچل حمزه یازار:« صمد بهرنگی» چئویرن:«منیژه جم‌نژاد»
اوشاق ادبیاتی
🐴 کور اوغلویلا کچل حمزه
یازار:« صمد بهرنگی»
چئویرن:«منیژه جم‌نژاد»
ایل لر اۇنجه آذربایجاندا ارن بیر ایگید واریدی آدی کوراوغلو! کوراوغلو “ایگید” تانینمامیش آدی روشن ایدی. روشنین آتاسینا علی کیشی دئیه‌ردیلر. علی، حسن خانین آت باخار ایلخیچیسی ایدی. آت بئجرمکده تایی یوخویدو. بیر باخیشلا آتی تانیاردی. حسن خان چوخ وارلی، ظالیم خانلاردان ایدی. اونوندا باشقا خانلار کیمی چوخلو نوکری، قوشونو واریدی، سؤیدوغونو ائلردی: آدام اؤلدورر، خالقین یئرینه صاحاب چیخار، کندلی لری، کوستارلاری( پیشه ور) حدسیز حسابسیز تالاردی. اۇزگۆرچو ایگیدلری دوستاقلاییب، عزا جزا وئرردی. کیمسه اونو سئومزدی. یالنیز بویوک بازارچیلار، اعیان اشراف خاندان راضی ایدیلر. بیری بیرینه یاردیم ائدیب خالقی چاپیب، ایشه چکردیلر. ییغیشیب کئفه باخیب، اۇزلرینه آب هاواسی گوزل یئرلرده جلاللی سارایلار دوزلدیب، خالقین یاشامینی دۆشونمزدیلر. تکی وئرگی لری چوخالداندا کو٘تله لری، کندلی لری خاطیرلاردیلار. حسن خان ایله باشقا خانلار دا بویوک خانین نوکری ایدیلر. بویوک خان اولاردان پای آلیب، داللاریندا دوروب قویاردی خالقی ایستدیکلری کیمی چاپسینلار، ایلدن ایله اونوندا پایینی آرتیرسینلار. بویوک خانا خودکار دئیه‌ردیلر. خودکار خانلارین ان وارلیسی، ان گوجلوسویدو. یوز لر، مینلر خان، بگ، بویوک باش، جلاد، پهلوان اونون ساراییندان چوره ک یئییب ایت کیمی اوندان قورخاردیلار. اونون بویوروقلارینا سس سیز سۇزسوز باش ایر دیلر. بیر گون حسن خانا خبر گلدی، دوستلارینین بیری حسن پاشا، اونو گورمه یه گلیر. بویوردو بیر چال اوینا مجلیسی دو٘زلدیب، پاشانین پئشوازینا گئتسینلر. حسن پاشا بیر نئچه گون حسن خانین ائوینده قالدی. گئمک ایسته‌دیی گون دئدی: حسن خان ائشیتمیشم سنین چوخ یاخجی آتلارین وار! حسن خان شیشه- شیشه دئدی: بو دووره ده منیم آتلاریمدان کیمسه ده یوخدو، ایسترسن بیر جوت سنه پئشکئش ائدرم. حسن پاشا دئدی: نه دن اولماسین. حسن خان ایلخیچیسینا بویوردو ایلخینی اوتارماغا آپارماسین، پاشا سئودیی آتلاری سئچسین دئیه. علی کیشی قوجا ایلخیچی، بیلیردی ایلخی دا چوخ یاخجی آتلار وار، آما هئچ بیریسی آتالاری دنیز آتی اولان ایکی بالا آتا چاتماز. بیرگون ایلخینی دنیز قیراغینا آپارمیش اۇزو بیر طرفده اوزانمیشدی. بیردن ایکی آت دنیزدن چیخیب بونون ایکی مایا آتی‌لا جوت لشدیلر. علی کیشی او مادیانلاری گوز آلتینا آلدی تاکی هره سی بیر کۆروک بالالادی. علی کو٘روک لری چوخ سئویر، اولار دونیانین ان گوزل آتلاری اولاجاق دئییردی. بو ایسه حسن خان قوناغینا آت باغیشلاماسینی دئیه نده اۇز اۇزونه دئدی: نیه آتلاری اوتارماییم، ایلخی دا بو ایکی آتدان بتری یوخدو! ایلخینی اوتارماغا اۇتوروب ایکی کو٘روکو خانین سارایینین قاباغینا گتیردی. حسن پاشا گوله- گوله سارایدان چیخدی آتلارینی سئچسین دئیه. گوردو آت یوخ، سارایین اۇنونده ایکی بالاجا آریخ کو٘روک دوروب. دئدی: حسن خان سنین باغیش آتلارین ائله بولاردی، هن؟ منیم بو یابی لاردان چوخ واریمدی. یاخجی آتلارین بولار اولورسا، وای او بیری لرین حالینا. حسن خان بو سؤزو ائشیدیب قان تپه سینه قالخدی. دونیا گؤزونده قارالدی. علی کیشیه چیغیریب دئدی: گئده من دئمدیم آتلاری اوتارماغا آپارما؟ علی کیشی دئدی: خان ساغ اولسون، اوزون بیلیرسن من تو٘کومو سنین ایلخیندا آغارتمیشام، آت تانیماقدا اوزمانام. سنین ایلخیندا بو لاردان یاخجی آت یوخدو. خان علی کیشینین جسارتیندن سینیرلنیب بویوردو: جلاد بو اوتانماز کییشینین گوزلرینی چیخارت. علی کیشی چوخ یالوار دی منیم سوچوم یوخدو دئیه، سایمادی. جلاد تئز گئدیب علی نی توتوب گوزلرینی چیخارتدی. علی کیشی دئدی: خان ایندیکی حایاتین ان بویوک وارلیغینی الیمدن آلدین، بو ایکی آتی وئر منه. خان کی حیرصی یاتمامیشدی، باغیردی: اؤلومجول یابی لاریوی گوتور تئز بوردان ایتیل. علی ایکی کو٘روک له بیر اوغلونو گوتوروب باش قویوب داغلارا، چوللره گئتدی. آجیغینی آچماغی دوشونوردو. اؤزونون و میلیونلار وطنداشینین آجیغینی. آما ایندی او گونه دک دۇزمه‌لی ایدی. گئجه گو٘ندوز اوغلو و ایکی کو٘روک له چوللری، داغلاری سوودو، سونوندا بیر یئنیش یوققوشلو داغین باشیندا قالارقی اولدو. بو داغلیقا چنلی بئل دئیه‌ردیلر. علی کیشی روشنین یاردیمی له کو٘روک لری بئجرمه یه بتر چالیشدی، ائله کی بیر زامان سونرا کو٘روک لر کیمسه نین گورمه دیی آتلار اولدولار. آتلارین بیرینه قیرآت، بیرینه ده دورآت آد قویدولار.
آردی وار…
