سحر خیاوی ;کوکلالار(عروسکهای خیمه‌شب بازی)
دوستاغین دیواریندا باشقا محبوسلار کیمی، دیرناغلاریلا، کئچیرتدیگی گونلری جیزمیردی.
هردنسه چوخ داریخاندا نَمیش دوواردا بیر قوش شکیلی، بیر پنجره، آغیزی باغلی بیر باش، یوخسا قانلی بیر یوموروق تن اورتاسیندا یوکسلمیش، گونش چکیردی.
قاپی‌نین آلتیندان ایچری هوپان بیر تالا ایشیقی بئله، غنیمت بیلیب یانغینجا ایچینه چکیردی. او هر گون آزادلیغا تله‌سیردی.
هردن دوستاغین داریخدیریجی آنلاریندا یاشامینین لاپ کئچمیشلری، اوشاقلیق چاغلاری یادینا دوشوردو.
ابتدایی صینیفی‌نین اوچونجو، دؤردونجو کلاسلاریندان کیتاب قوردو اولموشدو. کیتاب الیندن دوشموردو. آتاسی وئردیگی جیب پولونو جمعله‌ییب اؤزونه کیتاب آلیردی. چوخلوق دا عمومی کیتابخانادان کیتاب امانت آلیب اوخویوردو.
یئر به یئر دانیشدیغی آغیزیندان یئکه سؤزلر هامینی تعجوبلندیریردی.
آتاسی شوخلوقجا”آخیردا بو اوشاق باشلی گورا گئتمز، دیلی باشینا بلا اولار” – دئییردی.
آناسی کووره‌لیب:
“آغزیندان قارا یئللر آپارسین کیشی، او نه سوزدور اوشاغا دئییرسن؟!” – آجیقلانیردی.
یادینا گلدی بیر گون اوخولدا حاکمیت له باغلی بیر جشن واریدی.
اداره دن نئچه نیظارتچی ده گلمیشدی. برنامه‌نین بیر قیسمتینده کوکلالار نماییشی واریدی.
اوشاقلار حئیرتله آرخاسی قارانلیق، اؤنو ایشیق صحنه‌ده اویناشان، دانیشان قولچاقلاردا باخیردیلار.
لاپدان قیشقیردی: او کوکلالار اؤز باشلارینا ترپنمیرلر. قارانلیقدا کی گؤرونمز اللر اونلاری ترپدیرلر، اونلارین یئرینه دانیشیرلار.
او گیزلی اللر قارانلیقدا گیزله‌نیب لر. باخین اونلاری ایپله اوینادیرلار. او کوکلالاری گیزلی اللر اوینادیرلار….
مودور، ناظیم اونا گؤز آغاردیب سوکوتا دعوت ائتمیشدیلر، اداره نیظارتچی‌لری ده تعجوبلو اونا باخمیشدیلار.
سونرالار گنج چاغلاریندان ژورنالیست اولوب گیزلی اللری و چوخ اللرده اوینایان کوکلالاری افشاء ائتمیشدی.
پرده دالینداکی گیزلی‌لری آشکارا چیخارتماق ایشی اولموشدو. سونرالار دوشوندو بو یئرده اوغرولارین، اَیری لرین یوخ، اونلاری گورنلرین گوزلرینی چیخاردیرلار!!
بو خارابا ماغارانین دار، دودوک پیلله‌لرینی ائویندن ده یاخشی تانیییردی. ساچی بوردا توکنمز سورغو- ساواللا آغارمیشدی. خفیه اورگانیندان چیخاندا، بیر نئچه آددیم اوزاقلاشدیقدا، بیلرکن یوخسا بیلمز‌دن، قاپیدا دوران کئشیک عسگر تتیکی چکدی، الینده کی سیلاحینی شاققیلداتدی، یازیچی دیکسینرکن دونوخوب یئرینده دوردو.
آتیلمایان گولله‌نین یاندیریجی آغریسینی دوز کوره‌یینین اورتاسیندا، اوره‌یینین دالیندا حیس ائتدی. ایستی- ایستی بیر شئی اوره‌ییندن ایچینه تؤکولدو. گؤوده‌سینی سویوق تَر باسدی. ایندییه دک اؤلومو بو قَدَر یاخیندا حیس ائتمه‌میشدی.
ایندی ایسه هر بیر قلم الینه آلدیقدا دوز او نوقطادان کوره‌یینین اورتاسی سانجیر… اوره‌یی ایستی-ایستی ایچینه تؤکولور…
