فروغ درگیسی باکیره‌لیک و هیژیئنیک پئدحاقیندا یازیلار درج ائتدیگی اوچون قاداغان ائدیلدی
«فروغ»، صنعتی شریف بیلیم‌یوردونون «ایسلامی اؤیرنجی‌لر بیرلیگی»نین قادین حوقوقلاری آراشدیرماسی درگیسی «اویغونسوز ماتئریال یاییملادیغی» اوچون اوچ آی مدتینه قاداغان ائدیلدی.
درگی، «بو بیر هیژیئنیک پئددیر» باشلیغی ایله قارا بیر پلاستیک چانتانین گرافیک گؤرونتوسونون و «باکیره‌لیک، ديَر و یا اینام» آدلی مقاله یاییملانماسی سببییله قاداغان ائدیلدی.
درگی‌نین 14 اینجی ساییسی 1399-جی ایلین اردیبهشت آیندا یعنی تام دا آوریل آیینا تصادوف ائدن، قادینلارا ائدیلن تجاووز و «قادین ساغلاملیغی» باره‌ده دونیا بیلگیلندیرمه گونو اولاراق بیلینن بیر آیدا بو مؤوضولاری اله آلدی.
صنعتی شریف بیلیم‌یوردونون ایسلامی اؤیرنجی‌لر بیرلیگی‌نین وئردیگی معلوماتا گؤره، فروغ درگیسی یاییملاندیقدان اوچ گون سونرا، اردیبهشتین 11-ده شیکایت عریضه‌سینی آراشدیرماق اوچون بیلیمیوردوندان11 نفر مسوول گؤروشلرینی بیلدیرمک اوچون توپلاندیلار. بو توپلانتیدا ایشتیراک ائدن استادلارین هامیسی ارککدی و هئچ بیریسی‌نین قادین چالیشمالاری اوزرینده بیر کئچمیشی اولمامیشدیر و حتی بو شخصلرین سؤزلرینه گؤره تام اولاراق درگینی اوخوماق ایمکانلاری دا اولمامیشدیر.
صنعتی شریف بیلیم‌یوردونون ایسلامی اؤیرنجی‌لر بیرلیگی بیر مرداد دا بیلیم‌یوردوندا «فروغ» درگیسی‌نین باغلانماسینی قینایان و «ظولم» علامتی اولاراق دئدیگی بیر بیانات یایدی.
بیر نوسخه‌سی ویرگولون تلگرام صحیفه‌‌‌سینده یاییملانان بیاناتدا، درگی‌نین مسووللاری‌نین 6 خرداددا بیلیم ناظرلیگی‌نین نشرلر نظارت شوراسینا شیکایت ائتدیکلری، لاکین اعتراضلاری‌نین اوغورسوز اولدوغو بیلدیریلیب.
بیلیم ناظرلیگی‌نین فعالیتینی تنقید ائدن بو بیاناتدا بو سؤزلر یئر آلیب: فروغ درگیسی، «اؤلو کولک منه قارشیدیر» ابژکتیو تجسومو ایله باغلی قرارا اعتراض اولاراق علم ناظرلیگینه شیکایت ائتدی، آما بو قورومون «اؤیرنجی و اؤیرنجی فعاللارینی مودافیه ائتمک یئرینه اؤزباشینالیقلارلا ال اله آیدینلانمانین ایشیغی سؤندورمه‌یه چالیشیر» اولدوغونو گؤردوک.
بیاناتدا اؤیرنجی‌نین هر هانسی بیر حوقوقی قوروما اولان اینامینی «آجی هجو» آدلاندیریب: «دئییلنلردن داها آجی، اؤیرنجی تمثیلجیلرینین بو ایجلاسلاردا ایشتیراک ائتمه‌سی ادعاسیدیر. آزادلیق و عدالتین اوستون اولدوغو بیر چوخ قاورامین آنلامینی ایتیرمه‌سی یئنی بیر حادثه دئییل؛ آنجاق تهلوکه‌‌‌سیزلیک اورقانلاری‌نین پئشیندن گئدن بو ایکی شخص بیلیمیوردو و اؤیرنجی فعالیتی‌نین مستقلیگینی مسخره‌یه قویانلارین تمثیلجیلیگی، تمثیلچیلیک قاورامی‌نین تالان اولدوغونو گؤستریر.»
صنعتی شریف بیلیم‌یوردونون «ایسلامی اؤیرنجی‌لر بیرلیگی»نین آچیقلاماسی‌نین سونوندا: «چوخ ایستردیک کی، بیر لامپانین ایشیغینی اؤلدورمکله مینلرله شم و دیگر ایشیقلار چیخسین کی، اونلارین ایشیغی بیر گونشه چئوریلسین و داها دا کور گؤزلری گؤرمه‌یه مجبور ائتسین» دئییلدی.
