رشت قئيديات ايداره سي سئوگی آدلی تورک اوشاغا کیملیک وئرمیر
ایران‌وایر- رشت وطنداشلیق قئیدیاتی ایداره‌سی‌نین امکداشلاری سئوگی آدلی یئنی دوغولموش اوشاغا آدی تورک اولدوغونا گؤره اونا کیملیک وئرمکدن ایمتینا ائدیر.
بو ایداره ۱۵ گوندور بو اوشاغ کیملیک وئرمکدن ائله بیر حالدا ایمتینا ائدیر کی داها اؤنجه بو آد اوچون بیر نئچه اوشاغا کیملیک وئریلیب.
سئوگی‌نین آتاسی نعمت عباسی دئییب: “قیزیمیز ۱۱ دی ۱۴۰۳ده دونیایا گلدی و من و حیات یولداشیم اونون اوچون سئوگی آدینی سئچدیک. “سئوگی” تورکجه‌ده “عشق و محبت” دئمکدیر. رشت قئیدیات ایداره‌سی‌نین یئتکیلیلری بو آدین “آد سئچمه سیستمی”نده اولمادیغی اوچون اونا کیملیک وئرمه‌یه‌جکلرینی آچیقلاییبلار. نه قدر تورک اولدوغوموزو و بو تورک آدی اولدوغونو دئسک ده، قبول ائتمه‌دیلر.”
او آرتیریب: “بیز ده قئیدیات ایداره‌سی ستمیندهه اعتراض ائده‌رک، عینی آد ایله کیملیک وثیقه‌‌‌سی‌نین آلینماسینی طلب ائتدیک. آما تهراندا یئرلشن ۷ نفرلیک آد سئچمه کومیته‌سی دونن، بازار ائرته‌سی اعتراضیمیزی رد ائتدی و بو تورک آدی‌نین قئیدیاتا آلینماسینا قارشی چیخدی. بیز ده محکمه یولو ایله شیکایت وئرمکله مسئله‌نی داوام ائتدیرمک نيتیندییک، چونکی آد سئچمک والیدئینلرین ان اساس حوقوقودور و اونلار بیزی بو حوقوقدان محروم ائتمه‌مه‌لیدیرلر.”
ایرانین وطنداشلیق قئیدیاتی تشکیلاتی تصدیقلنمیش آدلاری‌نین لیستینی یاییملایاراق وطنداشلاردان بو آدلاری اوشاقلاری اوچون سئچمه‌لرینی ایسته‌ییر. والیدئینلر طرفیندن سئچیلن آد قئیدیات ایداره‌سی طرفیندن تکلیف اولونان لیستدن کناردا اولدوقدا، سئچیلمیش آد آراشدیریلماق اوچون بو تشکیلاتین (آد کومیته‌سی‌نین) ایداره هئیتینه گؤندریله‌جک و تصدیق ائدیلمه‌دیگی تقدیرده آدین سئچیلمه‌سینه ایجازه وئریلمه‌یه‌جک.
تصدیقلنمیش آدلار لیستینده سیاسی و دینی محدودیتلر و فیکیرلر، بیر چوخ وطنداشی اینسان حوقوقلارینا ضد اولاراق، اوشاقلارینا دینی، ائتنیک و یا مدنی کیملیکلرینه گؤره آد وئرمکدن محروم ائدیر.
#اوشاق_حوقوقلاری #تورکجه_آدلار
