ایرانین چئشیدلی شهرلرینده طب باجیلاری گوونلیک گوجلری‌نین تضییقلرینه باخمایاراق اعتصابا چیخیبلار
گوونلیک گوجلری‌نین تضییقلری‌نین آرتماسینا باخمایاراق، ۵ شهریور بازار ائرته‌سی، طب باجیلاری و طب ایشچیلری‌نین کوتلوی اعتراضلاری و اعتصابلاری داوام ائتدی.
بو اعتراضلار شیراز، کنگان، کرمانشاه و گرگان کیمی چئشیدلی شهرلرده کئچیریلیب. گرگاندا اعتراض ائدن طب باجیلاری ایشلرینی دایاندیراراق اعتراض یوروشو کئچیریبلر.
کنگان‌دا خمینی خسته‌خاناسی و کرمانشاه طب علملری خسته‌خاناسیندا طب باجیلاری اعتصابا چیخیب و اعتراض آکسییاسی کئچیریبلر.
بو توپلانتیلارین یاییملانان ویدئولاریندان گؤرونور کی، اونلار بازار ائرته‌سی اعتراض حرکاتلاری زامانی “لیاقتسیز مسوول، ایستعفا، ایستعفا” کیمی شوعارلار سسلندیریبلر.
گرگان طب باجیلاری‌نین ایراندا طب باجیلاری‌نین اعتراضلارینا قوشولماسی ایله سون هفته‌لرده طب باجیلاری‌نین اعتراض ائتدیگی و اعتصابا چیخدیغی شهرلرین سایی ۴۰ شهر و ۷۰ یاخین خسته‌خانایا چاتیب.
آبادان، آباده، اراک، اهواز، اسلام‌آباد غرب، اصفهان، اقلید، بندرعباس، بوشهر، بیرجند، تبریز، تهران، جهرم، چابهار، داراب، دهدشت، رشت، رفسنجان، زنجان، سیرجان، شهرکرد، شیراز، فسا، قزوین، کرج، کرمانشاه، کنگان، لامرد، مریوان، مشهد، نیشابور، همدان، یاسوج، یزد، بابل، خرم‌آباد، خمینی‌شهر، سبزوار و گرگان شهریور آیی‌نین بئشینجی گونونه قدر طب باجیلاری‌نین اعتراضلاری‌نین کئچیریلدیگی شهرلر سیراسیندادیر.
