عؤمرومون یاز یارپاغینا
آرزولارین اَلی چاتماز
تانری شیرین کؤرپه‌لیگی
بیرداها عؤمرومه قاتماز

ازل گوندن بیتدی نه‌دن؟
منیم‌سه أرکی نازلیغیم
اینتیحارلی گؤزلریمده
باخ قان ساغیر آرازلیغیم

قیش قوجاغین آچمامیشدان
قارا قالدیم نارلیغیمدا
یاز گؤزونه نفرت دولدوم
حسرت بیتدیم وارلیغیمدا

بوتون اویونجاقلاریمی
ائتدیلر منه قاداغا
آرزولاریم قیسیرلانیب
باشیمدا اولدو صاداغا

اللریمی توتوب منی
سۆرودولر بازارلیغا
همن آنام ایتن یئره
قالابالیق گوزارلیغا

بیر آغ دونو بَیَنیرکن
توتدولار بوینوما منیم
بارماغیمی اوزوکله‌ییب
گیردیلر قوینوما منیم

من چرشنبه اوشاغی تک
سئوینیردیم بازارلیغا
هئچ بیلمیردیم اؤلمه‌میشدن
گؤندریرلر  مزارلیغا

آتام خئیر دوعا وئریب
یولا سالدی آستانادان
اوزولدو هر نه‌دن الیم
هم آللاه‌دان ،هم آنادان

سوت دیشلریم تؤکولمه‌میش
دؤشلریمه قان گلمیشدی
اون اوچ یاشیم اولمامیشدان
قارنیمدا  قیز جوجرمیشدی

دوققوز آیین ایچینده من
بیر درد دوغدوم اؤزوم کیمی
کدره دولدو طالعیم
اینان قانلی گؤزوم کیمی

هرگون بئله بیر قیزجیغاز
یانیب بیتیر یوردوموزدا
اوشاق، اوشاق بو یاشامدا
قوربان یاتیر بیر اوموزدا

گؤزل قیزیم اوزلمه‌سن
بو طبیعت قانونودور
قادینلیق بیر قیزجیغازین
عؤمرونون سئودا سونودور

قیزین خیال آرزوسونون
بوردا اوْیورلار گوزونو
قیزلیغینا سون قویورلار
قویلویورلار ایلک اؤزونو

اؤزلم

https://www.instagram.com/p/C_EKtMxSvGU/?igsh=cTJsazZrcnRwN3Bh

#کودک_همسری #کؤرپه_اوشاق #قادینا_قارشی_زوراکیلیغا_یوخ #ارکن_ائولیلیک #قیزلار #نه_به_کودک_همسری #شعر_ترکی#دوردلوک #ادبیات_ترکی #هایده_بلوکی_اؤزلم #گارایلی #آذربایجان #تبریز
#قادینلیق