اوچ اوشاغلی قادینی حیات یولداشی ایله باریشدیرماق ایستگی

“قیزلار آغلاماز” کیتابیمین ایلک نشری پاندمیا دؤورونه دوشدو، مغازه لر ایشلمیردی دیه اؤزوموز چاتدیریردیق. ساتیش گونلرینده بیر قادین ییغدی،کیتاب آلماق ایسته دیگینی، حیات یولداشینین قورخوسوندان ائودن چیخا بیلمه دیگینی دئدی. ایل 2020.
آد چکمدن حادیثه نی صحیفم ده پایلاشدیم.مسئنجیریمه خانیم اوخوجوم یازدی. کیتابی اؤزو چاتتیرماق ایسته دیگینی دئدی. آناسیندان سؤز آچدی: “آتامین ظولموندن آنام خسته لیگه توتولوب دونیاسینی دئییشیب. اونا گؤره باسقی دا اولان قادینلارا قارشی چوخ حساسام”. ایجازه ایله نؤمره سینی وئردیم. آدینی اؤیرننده قهرلندی.آنامین آدی دیر، آیسل خانیم. بئله تصادف اولور مو؟
حیات یولداشی ائوده اولمایاندا کیتابی چاتدیردی.همین گون ایکیسی ده خوشبخت ایدی.
“ارینین خاصیتی آغیردیر”،- بوجومله نی اوشاق واختی قادینلاردان چوخ ائشیدیردیم. سونرالار دوشوندوم: نیه؟ ارین خاصیتی نیه آغیر اولسون کی؟ دئمیشدیک، پسیخولوگیادا بو تیپلر آبیوزر آدلانیر. نارسیست، سادیست، تیران،پیسخوپات کیمی علمی سینونیملری وار. سئچدیکلری قوربان اوزرینده قددار بیر حاکمیت قورورلار. بو قددارلیق اؤلومه دک گئدیب چیخا بیلیر.آبیوزرین قادین ایده آلی “سؤزه باخان” دیر. بو تیپلره امرلرینی یئرینه یئتیرن لازیمدیر. زوراکی داورانیشلارینی “اؤزومدن چیخارتدی” کیمی آچیقلاییرلار. بئله علامتلری اولان تعجیلی معاینه ی گئتسین، آنالیز وئرسین. تراپیا مطلق دیر.
نیه اینسان بو شکله دوشور؟ اوشاقلیق تراوماسی، پیس تربیت، کلینیک حال چوخ سبب اولا بیلر. ندن بئله دیر، کیم ائدیب-سیزین مسئله نیز دئییل. تک مسئله نیزاؤزونو خیلاصدیر.زلزله دن ائوینیز داغیلسا، نه ائدرسینیزسه اونو ائدین. زوراکیلیغا دؤزمک اولماز! استراتژی قورون، پول ییغین، حقوقی یاردیم آلین، کمک ایسته یین، دؤرلته اوز توتون، حیاتینیزی قورتارین. کنترلو قاییغدان، گودمه نی دیققت دن، تنقدی آلچالدیلمادان، سئوگینی شیددتدن آییرماغینیز گرکدیر. عدالت اوچون دئییم کی، آبیوزر قادین دا اولور. بو حالین قانونی آدی معیشت زوراکیلیغی و یا آئیله ایچی زوراکیلیغی دیر. زوراکیلیق بیرینین دیگرینه فیزیکی-معنوی ضرر وورماسیدیر. اوشاقلارا قارشی دا اولور. چوخ اؤلکه ده معیشت زوراکیلیغینین قارشیسینین آلینماسی حاققیندا آیریجا قانون وار. بیزده بو قانون 2010-جو ایلده قبول ائدیلیب. بونو اوخومانیزی ایستردیم.

معیشت زوراکیلیغینا نلر آئیددیر؟
ایقتیصادی زوراکیلیق-ایشلمه یه قویماماق، املاکینی ایلیندن آلماق، زورلا مادی آسیلی ساخلاماق.
سکسوآل زوراکیلیق-مجبوری سکی و یا سکسوآل حرکتلر؛ قانونسوز آزادلیقدان محرومیته- جیدی کنترل، هئچ یئره بوراخماماق، یاخینلارلا انسیته قاداغا.
فیزیکی زوراکیلیق-وورماق، دؤومک، خسارت یئتیرمک.
پسیخولوژی زوراکیلیق-پسیخولوژی باسقی، آلچالتما،دؤزولمز تزییق.
پروبلم اوندادیر کی، مدافعه مکانیزملری دئمک اولار، یوخدور. بعضی حاللاردا زوراکیلاری هئچ بیر جزا گؤزلمیز. پروسس پروفیلاکتیک صحبتله، نظارتله، باریشدیرماقلا یکونلاشیر.اؤلکه میزده معیشت زوراکیلیغی رسما کریمیناللاشماییب.
بیشیم بایئوحادیثه سیندن سونرا قزاقیستان دؤولتی معیشت زوراکیلیغینی کریمیناللاشدیران قانون قبول ائتدی. بو سند “سلطنت قانونو” آدی آلیب. آرتیق آئیله عضوونو اینجیدن آدام جینایت ائتمیش ساییلیر- اونو600 ساعاتلیق ایجتیماعی ایش، اوزاقلاشدیرما و حبس گؤزله ییر. حادیثه بیردن بیره اؤلدورمکله اورتایا چیخمیر، زوراکیلیق مرحله مرحله باشلاییر. بونا گؤره زامانیندا موداخیله واجیبدیر.دونیا پراکتیکاسی آئیله ایچی زوراکیلیغین آغیرلاشدیریجی حال کیمی جینایت مجله سینه علاوه ائدیلمه سینین اوغورلو اولدوغونو گؤستریر. زوراکیلاری چکیندیریر، قوربانلار اؤزلرینی اورکلی حیس ائدیرلر. ائوینده کینی دؤودویونه، اینجیتدیگینه گؤره مسئولیت داشیدیغینی هر کس بیلملی دیر. شیکایت اولدو اولمادی.
بو دفعه قوناق اولدوغوم پروقرامدا اوچ اوشاغلا اریندن قاچان قادینی تاپیب پتانسیال قاتیلی ایله باریشدیرماق ایستییردیلر. اعتیراض ائتدیم، اوستومه گلدیللر. سونرا ائشیددیم کی، همین کیشی آروادینین گؤزونو چیخاردیب. ایندیه اؤلدورر. قادین قتل لری حاقدا خبرلرین آلتیندا آچیق شکیلده دستکلییجی شرحلر یازانلار اولور. قورخمورلار، مسئولیت حیسسی ائتمیرلر. بونلار اؤنمسیز مسئله لر دئییل . حقوقی دؤولت ده یول وئریلمزدیر.
ایکینجی دونیا ساواشیندان سونرا BMT یارادیلدی. بشریت جیددی تراوما آلمیشدی. تاریخده ایلک دفعه 1945-48 جی ایللرده متخصصلر بوتون دؤورلری آراشدیریب ایلکین بیانامه یازدیلار- اینسان حقوقلاری اوزره بین الخالق بیانامه.
سونرا قادین حاقلاری، اوشاق حاقلاری و داوام. ایلک شرطلر- اینسانلارین برابرلیگی، آزادلیق، لیاقت توخونولمازلیغی و یاشاماق حقوقودور.

آنام دئییر، گؤر اینسانلار بیربیرینه نلر ائدیب کی، ییرمینجی عصرده لیاقتی بین الخالق حقوقلا قوروماق لازیم گلیب. بوتون سیویل دؤولتلرین، او جومله دن آزربایجانین کنستیتوسیاسیندا بونلار یئر آلیب. قانون حیات یولداشیندان ناراضی آداما بیرجه حقوق وئریر: بوشانماق! دؤیوب اؤلدورمک یوخ! یاشاماق حقوقونو کیمسه آلا بیلمز. استاتیسکا کمیته سینین بازاسیندا 2020 جی ایلده(یئنیسی یوخدور) معیشت زوراکیلیغیندان ضرر چکمیش 1475 نفرین 1196-سینین قادین اولدوغو گؤستریلیب: عذاب وئرمه، خسارت، اؤلدورمگه جهد، اؤلدورمه؛ زوراکیلار آراسیندا بیرینجی یئری ارلر، ایکینجی یئری آتالار… کئچمیش ارلر، سئوگیلی لر، قارداشلار، اوغوللار توتور.
آزربایجان دا نویامبر آییندا آتا بوشانماق ایستین قیزینی 17 بیچاق ضربه سی ایله اؤلدورموشدو. بونلاری یازدیغیم هر هفته ده بیر قادین اؤلدورولدو، سونوجونو 05/05/2024- ده اوخودوم: صابونچودا ار آروادینی بوغوب. قادین قتل لری سو کیمی آخیر. بو آغیر جینایتلری “معیشت مناقیشه سی” دئییب کیچیلده بیلمه ریک . دؤنه دؤنه دانیشماق، یول تاپماق گرکدیر. قادینلارین چوخو چاره سیزلیکدن اؤز اشافوتلارینا قاییدیر.محافیظه اوردئرلری وئریلمیر، دستکسیز، یوردسوز، پولسوز قالیرلار.
اون مینلرله اینسان معیشت زوراکیلیغی ایله باغلی دینه مراجعت ائدیر. بونون اوستونه سوسان، قورخان مینلرله اینسان گلین و بیر جمعیت تصوور ائدین. آئیله! اینسانین اؤزونو ان تهلوکه سیز حیس ائتمه لی اولدوغو محیط، ان تهلوکلی یئره، جهنمینه چئویریلیرسه، داها جیددی نه اولا بیلر؟ اورادا ساغلام اینسان یئتیشرمی؟
“ویرتوآلدا بونجا آقرئسیو آدام هاردان دیر؟” سؤالین جوابی اوزاق دا دئییل. دیر بیلیب اوستونو باسدیردیغیمیز جینایت یووالاریندان سوسیال شبکه ی سیزمیش حقیقت دیر.

یازار: آیسل علیزاده
کؤچورن: تورک قادینلار مرکزی
قایناق: قادین کیمی