مریم مهرابی حبس خانادا آجلیق آکسیاسینا باشلاییب

اعداما محکوم ائدیلمیش محبوس محمود مهرابی‌نین بیر آی اؤنجه حبس ائدیلمیش باجیسی مریم مهرابی قارداشی‌نین حبسینه و اعدام حؤکمونه اعتراض ائتدیگی اوچون آجلیق آکسییاسینا باشلاییب.

محمود مهرابی‌نین باشقا باجیسی ماهان مهرابی چارشنبه‌ آخشامی، ۲۶ تیرده باجیسی مریم مهرابی‌نین آجلیق آکسییاسینا باشلادیغینی و تک آداملیق حوجره‌ده اولدوغونو آچیقلاییب.

مریم مهرابی ۲۹ خرداد گونو حبس ائدیلیب و ائوینده‌کی بوتون الکترون جیهازلار، او جومله‌‌‌دن موبیل تلفونلار و نووتبوکلار موصادیره‌‌ ائدیلیب. آجلیق آکسییاسی‌نین ضررلرینه گؤره او، بیر نئچه دفعه‌‌ حبس‌خانا خسته‌خاناسینا کؤچورولوب و یئنیدن حوجره‌یه سالینیب. مریم مهرابی حبسده اولارکن عائله‌‌‌سی ایله ایله‌تیشیم و گؤروشمک حوقوقوندان محروم ائدیلیب.

خانیم مهرابی ایکی آزیاشلی اوشاق آناسیدیر. اونون سوچو اودور کی، قارداشی حاقیندا یازیب بیلگی وئریردی. محمود مهرابی ۱۴۰۱-جی ایلین عومومی اعتراضلاری ایله باغلی حبس ائدیلمیش و اصفهان اینقیلاب محکمه‌‌سی طرفیندن “یئر اوزونده فیتنه-فساد تؤرتمک” اتهامی ایله اعداما محکوم ائدیلمیشدیر.
#ایران_خبرلری #مریم_مهرابی