بهایی آراشدیرماجی مژگان سلمان‌زاده ماکودا حبس ائدیلیب
ایرانین اینسان حاقلاری قایناقلاری بازار گونو، ۲۴ تیرده بیلدیریبلر کی، بهایی آراشدیرماجی مژگان سلمان‌زاده تخمیناً ۱۰ گون اؤنجه باتی آذربایجان ایالتی‌نین ماکو شهرینده حبس ائدیلیب.
هنگاو سایتی‌نین خبرینه گؤره، فیزیولوژی پسیکولوژی ساحه‌‌‌سینده آراشدیرماجی اولان خانیم سلمان‌زاده ایسلام جمهورییتی‌نین اطلاعات ناظرلیگی‌نین مامورلاری طرفیندن حبس ائدیلیب.
هنگاوین یازدیغینا گؤره، مژگان سلمان‌زاده تهران ساکینی اولوب و “ایکی هفته ماکو شهرینده قالدیقدان سونرا” حبس ائدیلیب و تلفون زنگینده یاخینلارینا اونون ماکو مرکزی حبس‌خاناسی‌نین عومومی بندینه کؤچورولدویو باره‌ده بیلگی وئریلیب.
“رادیو فردا” سایتی دا بیلگیلی قایناقلارا ایستناداً مژگان سلمان‌زاده‌نین حبسی ایله باغلی خبرده یازیب کی، عدليه مامورلاری‌نین خانیم سلمان‌زاده‌نین مووقتی آزادلیغا بوراخیلماسی اوچون گیروو تعیین ائدیلمه‌سی وعدلرینه باخمایاراق، بو، ایندییه‌دک باش توتماییب.
بو مئدیا آیریجا بو بهایی آراشدیرماجی‌نین عائله عضولریندن بیرینه ایستیناد ائده‌رک بیلدیریب کی، خانیم سلمان‌زاده بو یاخینلاردا والیدئینلرینی ایتیریب و تک قالماسی‌نین عهده‌‌سیندن گلمک اوچون سیاحته باشلاییب.
بهاییلر ایراندا ۱۳۵۷-جی ایل اینقیلابیندان بری سیستماتیک شکیلده تعقیب ائدیلن ان بؤیوک قئیری-موسلمان دینی آزلیقدیر.
گوونلیک و محکمه اورقانلاری‌نین بهایی وطنداشلارا تضییقی سون ایللرده، اؤزللیکله ده “قادین، حیات، آزادلیق” اعتراضلاری باشلایاندان سونرا چوخلو آرتیب.
