زهره محمد پور، تورکجه شعر
آداملار
کافه‌لر
مترو ایستگاهلاری
چکیلدیلر بیر کنارا
خیابانلار ، کوچه‌لر قوجاق آچدیلار بیزه
ترافیک ایشیق‌لاری احترام قویدولار آددیملاریمیزا
قار بیر سئوینج شکری کیمی سرپیلدی باشیمیزا
ارک دیزلریندن توتوب قالخدی آیاغا
و
ساعات کوله‌سینین نبضی چوخالماغا باشلادی
بیر ایستی قان دولاندی تبریزین دامارلاریندا
و جالاندی بیر ایستی نفس گووده‌سینه
(شهناز) باشلادی سئوگی ماهنی‌سین اوخوماغا
(منصور) الینه آلدی قارمانین
و
شهریار قدح قالدیردی سئوگیمیزین ساغلیغینا
بوراسی تبریز
سئوگینین ۱۰ اکسی درجه ده یاشاندیغی یئر
شعرین معنا بولدوغو یئر
بوردا
بارماقلارین بوزو
چوزولور سئوگیلیلرین آوجوندا
و اوره‌ک دویونتولری
آراملاشیر بارناوانین
دالان به دالان کوچه‌لرینده
و سن منه
تبریزین لاپ گوبه‌یینده
یوکسه‌لن میللی مارش‌سان
یا دا
دالغالانان
آزادلیق بایراغی
نه بیلیم!
تبریزسه
سئوگی اوجاغی دیر
بسله‌ییر بیزی
اویره‌تیر دونیانین گرچک اوزونو
و
دادیزدیریر بیزه گاهدان
حایاتین آجی، شیرین دادینی
