بهایی وطنداش مژگان صمیمی رشت‌ده حبس ائدیلیب
-
الده ائدیلن بیلگیلره گؤره اطلاعات ناظرلیگی‌نین مامورلاری رشت شهرینده مژگان صمیمی آدلی بهایی وطنداشی حبس ائدیبلر.
چارشنبه گونو، ۲۸ تیر ۱۴۰۲-جی ایلده رشت اطلاعات ایداره‌سی‌نین مامورلاری مژگان صمیمی‌نین ائوینه گئتدیلر و بو بهایی وطنداشین ائوینده آختاریش آپاردیقدان و موبیل تلفونونو و دینی کیتابلارینی موصادیره ائتدیکدن سونرا اونو حبس ائدیبلر.
مژگان صمیمی رشت‌ده‌کی لاکان حبس‌خاناسینا کؤچورولدویو باره‌ده تلفونلا عائله‌‌‌سینه بیلگی وئریب.
بیلگیلی قایناغین دئدیگینه گؤره، بو بهایی وطنداش رژیمه قارشی تبلیغات و اؤز شخصی ائوینده آزغین تعلیملر اؤیرتمکده اتهام اولونور.
قئید ائدک کی، همین گون رشت‌ده شیوا کاشانی‌نژاد آدلی داها بیر بهایی وطنداش دا حبس ائدیلیب.
#دینی_آزلیقلار #بهاییلر
