بلوچ آکتیویستلری کامپانییاسی زاهیدان مرکزی حبس‌خاناسیندا ۷ محبوسون کوتلوی جینسی تجاووزه معروض قالدیغینی اعلان ائده‌رک، شلانقدان ایستیفاده ائده‌رک بو محبوسلارا تجاووز ائدیلدیگینی یازیب.
بو خبره گؤره، ۷ اسفندده بو محبوسلاردان ۶-سی بلوچ، بیری ایسه مشهدلی‌دیر و اونلارین هامیسی اعتراضلار زامانی حبس ائدیلیب.
بلوچ فعاللاری‌نین کامپانییاسی بیلگیلی قایناقلارا ایستناداً بو ۷ محبوس حاقیندا یازیب کی، زاهیدان مرکزی حبس‌خاناسی‌نین یئتکیلیلری اونلاردان آغیر فیزیکی و روحی ایشگنجه‌لرله مجبوری اعترافلار آلماق نيتینده ایدیلر، لاکین بو مسئله‌‌ده اوغورسوزلوغا دوچار اولدوقدان سونرا شلانق واسطه‌‌‌سیله اونلارا تجاووز و جینسی ایشگنجه‌لر وئردیلر.
زاهیدان مرکزی حبس‌خاناسیندا جینسی تجاووزه معروض قالان ۶ بلوچ محبوسونون کیملیگی، «بنیامین کوهکن» ۱۶ یاشلی حمیدرضا اوغلو، «الیاس کوهکن» ۱۹ ساشلی، حمیدرضا اوغلو، «یاسین کُبدانی» ۱۷ یاشلی، غلامعلی اوغلو، «محمد درویش نارویی» ۱۹ یاشلی، عبدالرحمن اوغلو، «اسحاق ریگی» ۲۱ یاشلی،محمد اوغلو و «سعید باران زهی»، اولاراق آچیقلانیب.
بلوچ فعاللاری کامپانییاسی اؤز قایناغیتا ایستناداً یازیب کی، بلوچ محبوسلار ایشگنجه و جینسی تجاووزه معروض قالدیقدان سونرا روحی و فیزیکی جهتدن چوخ آجیناجاقلی دورومدادیرلار.
بو ۷ نفر آراسیندا بنیامین کوهکن و یاسین کُبدانی حاضردا زاهیدان مرکزی حبس‌خاناسینداکی اوشاق اصلاح مرکزینده ساخلانیلیر و بنیامین جینسی تجاووزه معروض قالدیقدان سونرا ایکی دفعه اینتیهارا جهد ائتسه ده، بونا نایل اولا بیلمه‌ییب.
اعتراضچی محبوسلارا قارشی جینسی زوراکیلیق ایراندا گؤرونمه‌میش بیر حادثه دئییل و اعتراضچی محبوسلارا قارشی تجاووزه دایر راپرلار و سندلر بوندان اؤنجه ده یاییملانیب.
اؤزللیکله سیستان و بلوچیستان ایالتینده حالوش خبر آژانسی ۲۰ بهمنده اینقیلاب کئشیکچیلری‌نین اطلاعات مامورلاری‌نین حبس‌خانالاردا بلوچ قادینلارا تجاووز ائتدیگینی بیلدیرمیشدی.
حالوشه دانیشان قیزلاردان بیری مامورلارین کوبود ایفاده‌لر ایشلتدیگینی، ائتنیک و جینسی آلچالدیجی سؤزلردن ایستیفاده ائتدیگینی، اونو و باشقا دوستلارینی زورلایان مامورلارین حدیندن آرتیق زوراکیلیغینی اورتایا قویدو.
بلوچ فعاللاری بیلدیریرلر کی، ایران ایسلام جمهورییتی‌نین مامورلاری اراضیده اعتراضلاری دایاندیرماق اوچون سون تاکتیکا اولاراق آکسییالارین محبوسلارینا قارشی زوراکیلیقدان ایستیفاده ائدیرلر.
#عومومی_اعتراضلار #تجاووز #اینسان_حوقوقلاری
