پریسا جدی تئمییز محکمه‌سینده اتهاملاریندان براعت آلدی
گرمی شهرینده یاشایان آذربایجانلی مدنی و قادین حوقوقلاری ساوونوجوسو پریسا جدی اردبیل ایالتی‌نین تئمییز محکمه‌‌سی‌نین ۱۴-جو شؤبه‌سی طرفیندن “ایران ایسلام جمهورییتینه قارشی تبلیغات آپارماق” اتهامیندان براعت آلیب.
خانیم جدی داها اؤنجه گرمی محکمه‌‌سی‌نین بیرینجی شؤبه‌سی طرفیندن “ایسلام جمهورییتینه قارشی تبلیغات آپارماق” اتهامی ایله ۳ آیلیق حبس جزاسینا محکوم ائدیلمیشدی.
بوندان اؤنجه ۲۷ مهر ۱۴۰۰-جو ایلده خانیم جدی بعضی آچیقلامالار اوچون تلفون ایله آراناراق گرمی شهری‌نین اطلاعاتینا چاغیریلمیشدی.
عومومی اعتراضلار باشلایاندان بو گونه قدر آذربایجان شهرلرینده یوزلرجه اعتراضچی حبس ائدیلیب و اونلارلا وطنداش گوونلیک گوجلری طرفیندن اؤلدورولوب.
حبس اولونان اعتراضچیلارین دورومو و آدلاری حاقیندا دقیق بیلگی یوخدور و اونلارین ساغلاملیق دورومو توپلومدا ناراحاتلیق یارادیب.
سون اعتراضلاردا اینترنتین حؤکومت طرفیندن کسیلمه‌سی و توتولانلارین و اؤلنلرین عائله‌لرینه حؤکومتین باسقیسی، توتولان و حیاتینی ایتیرنلرین دقیق سایی‌نین بللی ائدیلمه‌سینی چتین‌لشدیریب.
#عومومی_اعتراضلار
