یاخشیلیغا امر ائتمه قرارگاهی حجاب قارشیتی ۳۰۰ لیدر حبس ائدیلیب
بو قرارگاهین سؤزچوسو علی خان‌محمدی بازار گونو، ۱۳ شهریورده فارس خبر آژانسینا بیلدیریب: اطلاعات ناظرلیگی حجابا قارشی موباریزه آپاران دسته‌لری آشکار ائده‌رک بللی تدبیرلر حیاتا کئچیریب و ۳۰۰-دن چوخ قروپون لیدری‌نین بللی ائدیله‌رک حبس ائدیلمه‌سینه گؤره اطلاعات ناظرلیگینه تشکور ائدیب.
خان‌محمدی حجابا قارشی موباریزه ایله باغلی توپلومدا بیر چوخ جریانلارین گیزلی فعالیت گؤستردیگینی و ایندی ده آکتیو اولدوغونو ادعا ائدیب.
ایسلام جمهورییتی‌نین اطلاعات ناظرلیگی و باشقا گوونلیک قوروملاری حجابا قارشی ۳۰۰ قروپ لیدری‌نین حبسی ایله باغلی آچیقلاما یایماییب.
یاخشیلیغا امر ائتمه و پیسلیکدن منع ائتمه قرارگاهی‌نین سؤزچوسو اونو دا بیلدیریب کی، بیرباشا فعالیتله یاناشی، آنورمال و قئیری-عادی مال و گئییملرین ایدخالی ایله حجابا قارشی دا موباریزه آپاریلیر.
سون آیلاردا ایرشاد دئوریه‌سی امکداشلاری‌نین حجابسیز آدلاندیردیقلاری قادینلارا قارشی زوراکیلیق ائتدیگی ایله باغلی بیر نئچه ویدئو یاییملانیب، لاکین یاخشیلیغا امر ائتمه و پیسلیکدن منع ائتمه قرارگاهی‌نین کاتیبی بوندان اؤنجه اؤلکه‌ده حجابسیزلارین سایی‌نین آرتدیغینی اعتراف ائتمیشدی و یوزده ۵۰-دن چوخ اولدوغونو بیلدیرمیشدی.
#ایران_خبرلری #مجبوری_حجاب #قادینلار
