قادین جینایتی: فاروج شهرینده بیر قادین حیات یولداشی طرفیندن قتله یئتیریلیب
ایران مئدیاسی‌نین یازدیغینا گؤره، قوزئی خوراسان ایالتی‌نین فاروج شهرینده بیر ارکک، ۳۹ یاشلی حیات یولداشینی عائله ایچی موناقیشه سببیله سویوق سلاحلا قتله یئتیریب. جینایتی تؤره‌دن شخص ساخلانیلیب و حادثه ایله باغلی آراشدیرما داوام ائدیر.
مهر خبر آژانسی یازیب کی، فاروج شهرینده باش وئرمیش بو قتل حادثه‌‌‌سی حوقوق-موحافیظه اورقانلاری‌نین درحال موداخیله‌سینه سبب اولوب.
شهرین پولیس رئیسی محمد غلامی بو باره‌ده دئییب: ایلکین آراشدیرمالار سونوجوندا بللی اولوب کی، ۴۵ یاشلی بیر ارکک عائله موناقیشه‌سی‌سینده حیات یولداشینی سویوق سلاحلا قتله یئتیریب.
اینسان حاقلاری یئتکیلیلری اؤزللیکله ایراندا قادینلارین یاسال حوقوقلاری‌نین اولمادیغینی وورغولاییرلار. اونلار دئییرلر کی، ایسلام جمهورییتی حؤکومتی قادینلارین گئییم آزادلیغی کیمی بعضی مسئله‌‌لره موداخیله ائتسه ده، قورویوجو موداخیله طلب ائدن قادینلارا قارشی زوراکیلیق قارشیسیندا سوسماقدادیر.
بو قادین حوقوقلارینا اعتیناسیزلیق قادینلارین حیات یولداشلاری‌نین، آتالاری‌نین و یا قارداشلاری‌نین قئیری-قانونی قرارلارینا معروض قالماسی و اونلارا قارشی بئله جینایتلرین تؤره‌دیلمه‌سی حاللارینا گتیریب چیخاریر.
بو حادثه ایراندا حوقوقی رفورملارین آپاریلماسی و قادینلار اوچون ائتکیلی یاسال حوقوقلارین ساغلانماسی‌نین اؤنمینی بیر داها وورغولاییر.
#قادین_حوقوقلاری #قادین_جینایتی
