تورک قادینلار مرکزی‌نین ۸ مارت دونیا قادینلار گونو مناسبتیله بیانیه‌سی
۸ مارت، دونیا قادینلار گونو، آجی گئرچک‌لری دئیرلندیرمک و پارلاق اومیدلری بسلمک گونودور. قادین‌لارین، اؤزللیک‌له ده آیری‌سئچکیلیک‌لر و باسقی آلتینداکی توپلوم‌لاردا اجتماعی، مدنی و سیاسی آیری‌سئچکیلیک‌لیه قارشی مبارزه آپاران قادین‌لارین مبارزه‌سینی خاطیرلاماق گونودور. ایران‌دا یاشایان غیرفارس و او جومله‌دن تورک قادینلار، مضاعف و ایکیلی آیری‌سئچکیلیک‌له اوزله‌شیر؛ بیر طرف‌دن توپلومسال جنسیت برابرسیزلیگینه قارشی دایانیر، دیگر طرف‌دن ایسه میللی کیملیک‌لرینه گؤره میللی آیری‌سئچکیلیک‌لیه معروض قالیرلار.
تورک قادینلار، سوسقونلوق و باسقی زنجیرلرینی قیرماق اوچون مبارزه آپاریرلار. ایران اسلام جمهوریتی تکجه قادین‌لارین حاقلارینی دئییل، میللی_ائتنیکی، مدنی و دیل حاقلارینی دا گؤرمزدن گلدیگی حال‌دا، تورک قادینلار هرزامان آزادلیق، عدالت و برابرلیک یولون‌دا مبارزه‌دن گئری چکیلمه‌دیکلرینی ثابت ائدیب‌لر. اونلار اؤز کولتورلری، دیل‌لری و کیملیک‌لری‌نین حاشیه‌یه آتیلان و یوخ ساییلان بیر سیستمه قارشی دیره‌نیرلر. چونکی دئییشیم و دؤنوشومون، توپلومون اؤز ایچین‌دن باشلاناجاغینا اینانیرلار.
بو یول‌دا، تورک قادینلار تکجه توپلومسال جنسیتی آیری‌سئچکیلیگی آشماغا چالیشمیر، هم ده میللی و کولتورل کیملیکلرینی قورویوب، گوجلندیرمک اوغروندا مبارزه آپاریرلار. اونلار بیلیرلر کی، دیلین، تاریخین و کولتورون ایتیریلمه‌سی فردی و توپلومسال کیملیگین یوخ اولماسی دئمک‌دیر. بونا گؤره ده، انکار سیاستلرینه قارشی، هم قادین و هم تورک اولاراق اؤزلرینی تانیملاتماق و یاشاماق حاقلارینی ساوونورلار.
بو مبارزه، داها گئنیش سَویه‌ده توپلومسال جنسیت برابرلیگی، انسان حاق‌لاری و اجتماعی عدالت اوغروندا گلوبال مبارزه‌نین بیر بؤلومودور. دونیانین هر یئرینده قادینلار بیلیرلر کی، بؤیوک دئییشیک‌لر ساده‌جه هامینین بیرلیک‌ده و دایانیشمالی، داها عدالتلی و برابر بیر دونیا اوچون مبارزه آپاردیغی زامان مومکوندور. بیز هر بیرئین دئییشیم و دؤنوشوم یاراتماق گوجونه اینانیریق.
تورک قادینلار مرکزی، دونیا قادینلار گونو مناسبتیله عدالت، برابرلیک و آزادلیق اوغروندا مبارزه آپاران بوتون قادین‌لارلا یول‌بیر و دایانیشمادا اولدوغونو بیلدیریر. بیز توپلومسال جنسیتی برابرلیک، کولتورل و میللی حاق‌لارین، اؤزللیک‌له ده ایران‌دا قادین‌لارین و کوییر جمعیتین حاق‌لارینین تانینماسینا اینانیریق.
تورک قادینلار مرکزی، دونیادا و اؤزللیک‌له ایران‌دا باسقی‌یا معروض قالان قادین‌لارین مبارزه‌سی ایله دایانیشما ایچینده اولماق‌لا یاناشی، تورک قادین‌لارینین حاقلارینی ساوونماق، میللی کیملیگی و و آنادیلینی قوروماق، آزادلیق و اجتماعی عدالت و برابرلیک اوغروندا مبارزه آپارماق سوروملولوغونا صادیق‌دیر. بیز بو یول‌دا آتدیغیمیز هر بیر آددیم‌لا، قادینلار و دیگر جنسی و جنسیتی کیملیک‌لری ایله بیرلیک‌ده داها یاخشی و داها آزاد بیر دونیا قوراجاییق.
تورک قادینلار مرکزی
05.03.2025
