تورک قادین لار مرکزینین دونیا آنا دیلی گونو موناسبتیله بیانیه سی
آنا دیلی تکجه ایرتیباط قورماق آراجی دئییل بلکه بیر میللتین، مدنیت، تاریخ و کولتورل کیملیگینین آیریلماز بیر حیسسه سی دیر. 21 فئورال دا قید اولونان دونیا آنا دیلی گونو، دیل چئشیدلیلیگینین اهمیتینی وورغولاماق و دونیادا موجود اولان دیللرین قورونماسینا دیققت چکمک اوچون دیرلی بیر فرصت دیر. گونوموزده دیلین داواملی گلیشمه سی، باریش و چئشیدلی خالقلار و ائتنیک قورپلار آراسیندا بیرگه یاشاماق مهارت آچیسیندان، اوینادیغی اساس رولو خاطیرلادیر.
آنا دیلینین اؤنمی، دیگر ایکینجی و یا اوچونجو دیللردن کی عموما بؤیوک یاشلاردا اؤیرنیلیر بوندادیر کی بو دیل ایلک آراچدیر کی فرد دونیانی تانیما، حیس، دوشونجه و تجربه لرینی اونون واسیطه سیله بیان ائدیر.
آنا دیلینی اؤیرنمک و دانیشماق تکجه ائتنیک دیلین قورونماسیلا قالمیر، بلکه دوغرودان فردلرین بیلیشسل گلیشمه سی، اؤیرنمه و سوسیال باجاریلارین گلیشمه سینده تاثیری وار.گونوموزده تکنولوژینین سرعتله گلیشمه سی و دونیالیق اولماسی ایله بیرگه، دونیادا بیر چوخ دیلی یوخ اولما تهلوکه سیله اوزبه اوزدور و بو قونو گلوبال جامعه اوچون جیددی بیر اویاری دیر.
یونسکونون راپورونا گؤره، هر ایل بیر چوخ دیل، اویغون سیاسی دستک گؤرمه ديگی اوچون و غالیب دیللرین یاییلماسیلا، اونودولماغا باشلاییب.
بو قونو تکجه دیل چئشیدلیلیگی نین آزالماسینا سبب اولمور، بلکه عنعنه لرین و مختلف اینسان قوروپلارینین حافیظه سینده آرشیولنمیش معنوی قایناقلارین و دیللرینده یئرلشن چوخجا کولتور دیرلرینین ده ،آرادان گئتمه سینه سبب اولار.
بو چاغیریشلا موباریزه آپارماق اوچون حؤکومتلر، تحصیل و مدنیت قوروپلاری، بین الخالق قوروملاری، بین الخالق تشکیلاتلار، گرک آنا دیلینده اؤیرنیم، یوخ اولما تهلوکه ایله اوز اوزه اولان دیللرین آرشیو و بلگسللشمه سی و مختلف توپلوملاردا نئچه دیللیلیگی رواج وئرمک یؤنونده تاثیرلی سیاستلر اویغولایالار.
بیز تورک قادینلار مرکزینده بو اؤنملی گونده وورغولاییریق کی، آنا دیلینین قورونماسی عمومی بیر مسئولیت دیر و بونون اوچون دؤلت لرین، کولتورل قوروملارین و وطنداشلارین هر طرفلی امکداشلیغینی طلب ائدیر.
ایکی و یا چوخ دیللی اؤیرنیم، موختلیف دیللرده دیجیتال ایچریگین گلیشدیریلمه سی و یئنی نسلی گونلوک یاشاملاریندا آنا دیللرینی قوللانماغا تشویق ائتمک، بو یؤنده اؤنملی آددیملاردیر.
سون اولاراق، آنا دیلی گونونو آنارکن، بوتون مسئول قوروملاری، علمی و مدنی جمعیتلری و بوتون ماراغلی شخص لری آنا دیللرین قورونماسی، تبلیغ ائتمک یؤنونده آددیم لار آتمالاری اوچون و بو دیرلی بشری میراثین قورونماسی اوچون دعوت ائدیریک.
گلجک نسیللر اوچون تکجه دیل چئشیدلیلیگی نی قورویاراق ائلیه بیلریک داها عادیل، داها یایغین و زنگین بیر گلجک یاراداق.
تورک قادین لار مرکزی
