تراختور اوچون چارشی
سون گونلرده تراختور و پرسپولسیس طرفدارلاری آراسیندا باش وئرن چیرکین حادیثه لره دائیرگنیش موذاکیره لر گئدیر. عمومیتله، موذاکیره اولونان موضوع بودور: ایندی نه ائدک؟ آچیق شکیلده دئسم، من هئچ بیر اومودوم یوخدورکی، پرسپولیس و یا ایستیقلال طرفدارلاری اؤز ایرقچیلیق داورانیشلارینی باشا دوشه لر و بودوشونجه حاقدا فیکیرلرینی دئیشدیره لر. اما بعضی سببلره گؤره تراختور طرفدارلارینا اومودوم وار. گرچه چوخ واخت تراختور طرفدارلاری دا ایرقچیلیق و یا جینسی تحقیر و زوراکیلیغا جواب اولاراق بنزر شکیلده رئاکسیالار وئریبلر کی، بو دا ایضاح و قبول ائدیله بیلمز.
اما اونلارا اومود ائتمگیمین سببی اونلارین فرقلی اولماسیدیر. اونلار فوتبال دان داها دگرلی و یوکسک بیر آماج اوچون بیر آرایا توپلاشیبلار.
بیز، اورمیه گؤلونون قورونماسی اوچون اعتیراض و سمبیلیک کامپانیا تشکیل ائدن، آنا دیلینده تحصیل حاققی اوچون، ورزقان زلزله سیندن ضرر چکمیشلرین وضعینه اعتیراض، تورکمنیستان چؤللرینده سیل دن ضرر گؤرنلر اوچون یاردیم کامپانیاسی کئچیرن، حتی قادینلارین استادیوملاردا ایشتیراکینین قاداغان ائدیلمسینه اعتیراض ائدن طرفدارلاردان دانیشیریق. یعنی اونلار فوتبال و فوتبال گوندمینده اولان سیرادان اولایلاردان داها اؤنملی مسئله لره اهمیت وئریرلر.
اما اونلارا تنقیدیم بودورکی، بعضی طرفدارلیق دوشونجه لرینی اوتوریتر گوجلردن اوزاق توتمایی باجارمییبلار. بیز فوتبال و فوتبال ساحه لرینده ایرقچیلیقلا موجادیله ائتمگی ساوونورکن، اؤزوموز ایرقچی بیر دیلین ساوونجوسو اولاماییز، بو دوروم بیلیمسل ادبیاتدا “ترس ایرقچیلیق” اولاراق آدلاندیریلیر.
یاخود تراختور طرفدارلاری قادینلارین ایستادیوملارا گیرمه قاداغاسینین لغو ائدیلمه سی اوچون ایلک دفعه شعار سسلندیرنده، هر نه قدر بو شعار تکجه تورک و آزربایجانلی قادینلاری ایحاطه ائتسه ده، کشکه داها یاخشی و عمومی بیر مضمونلا سسلندیرمیش اولسایدی، گؤزلنیرکی، آرتیق اونلار قادینلارا قارشی نفرت، جینسی آیری سئچکیلیک و کیشی حاکمیتینه دائیر ادبیاتی تبلیغ ائتمسینلر، آمما عمل ده گؤروروک کی، چوخ واخت بونلار یالنیزجا شعار سویسینده قالیر و حقیقتا ده سمبلیک کاراکتر داشییر و گؤرونور کی، وئردیگیمیز شعارلارا اورکدن اینانیریق.
ایندی ایسه بو ایرقجی شعارلارا قارشی یاناشمالاردان بیری “اورگیمیز راحاتلاندی” سیاستینه موراجیعت ائتمک دیر. یعنی اونلار تحقیر ائدیرلرسه، بیزده اونلارا قارشی تحقیر ائدک، اونلار ایرقچی تحقیر ائتدیلرسه، بیزده ایرقچی تحقیره مراجعت ائدک. بو یاناشما هم سهودیر، همده تهلوکلی دیر!
دیگر یاناشما ایسه، قارشی دورما و زدییت یئرینه، منیم فیکریمجه، رغیبلرین ایستدیگی میدان دا اویناماقدان سا، اونلارلا فرقیمیزی گؤسترمک و پراتیگی اولاراق ایرلی لییشجی بیر طرفدارلیق دوشونجه سینه باغلی اولدوغوموزو گؤسترمک دیر.
دییرسیز نئجه!؟ گلین بیر نئچه طرفدار مذاکیره مدلینین نمونه سینی سیزه تانیتدیریم. آلمانیادا بیز سئویملی دورتموندی تیمینی گؤروروک کی هر ایل آلمانیانین ان چوخ ایزلییجی طرفدارا صاحیبی اولان تیم لردن اولورلار و وستفالن ده مشهور ساری دووارلاری ایله بیر نئچه ایل اول، ترامپا “یگانه رئال دووار بیزیمدیر” دیه گؤندرمه (کنایه) ائتدیلر!
دورمونتدلو طرفدارلار آلمانیادا رادیکال ساغا قارشی مباریزه سینی آپارانلاردان اولوپ، بو ایلده مهسا امینی نین هشتکی ایله، سارینا اسماعیل زاده اوچون استادیوما بیر پانکارت گتیردیلر.
ایندی، سن پائولی فوتبال تیمی نین و اونون سولچو، آنارشیست طرفدارلارینین حیکایه سینی دانیشماق ایسه آیری بیر مسئله دیر. حال حاضیردا بو تیم ایکینجی بوندس لیگادا یئر آلیر و بو تیم باره ده سون معلومات، ترامپین غلبه سیندن سونرا ایلان ماسکین ایرقچی و نفرت یایما سیاستلرینه اعتیراض اولاراق ایکس (توویتر) شبکه سینی بایکوت ائتمه لری ایله باغلی یاییملاندی.
بلکه ده چوخ اوزاقا گئتممه لییک، اگر اویغون طرفدارلیق مدلینی آختاریریقسا، بو مدللردن ان یاخشیسینی بئشیکتاش طرفدارلاری تقدیم ائدیر. اونلارین ان مشهورطرفدار قوروپلاریندان بیری “چارشی” آدلانیر.
داها اؤنجه بو طرفدارلارین امینه بولوت ناموس جینایتینه اعتیراض ائتمه لرینی بو کانالدا یازمیشدیم . تورکیه ده کی گزی پارکی اعتیراضلارینا ایشتیراکلاری ایله باغلی چوخجا مقاله یازیلیب.
اونلار قادینلارا قارشی زوراکیلیغا، اوشاغلارا قارشی زوراکیلیغا، تورکیه ده کی کوردلره قارشی آیریمجیلیغا، ساواش و قتل عاما قارشی شعار وئرن طرفدارلاردیر.
ایندی ایسه سؤال بودورکی: تراختور طرفدارلاری ایران فوتبالیندا بئله بیر طرفدارلیق دوشونجه سینی یارادا بیلر می؟
تورک سوسیولوق- مهدی حمیدی شفق رسمی کانالیندان آلینمیش
چئویرن: تورک قادینلار مرکزی
