۵ آیلیق حوقوقی موجادیله دن سونرا تورک اوشاق آلپ آسلان آدی ایله کیملیک آلابیلیب
اورمیه شهریندن اولان، آلپ آسلان آدلی تورک اوشاغین آتاسی٬ سالار باباپور ۵ آیلیق حوقوقی موجادیله و محکمه چکیشمه‌لریندن سونرا بو تورک آد اوچون وطنداشلیق قئیدیاتی ایداره‌سینی کیملیک وئرمه‌یه مجبور ائدیب.
اورمیه شهری صولح محکمه‌‌سی‌نین ۱۱-جی شؤبه‌سی‌نین وئردیگی قراردا آلپ آسلان وطنداشلیق قئیدیاتی شوراسی‌نین قاداغان ائتدیگی آد اؤرنکلریندن بیری دئییل و باتی آذربایجان وطنداشلیق قئیدیاتی ایداره‌سیندن آلپ آسلان آدینا کیملیک وئریلمه‌سی قرارینی وئریب.
بو اوشاق ۱۰ شهریور ۱۴۰۳-ده آنادان اولوب. آنجاق اورمیه وطنداشلیق ایداره‌سی یئتکیلیلری بو آدا کیملیک وئریلمه‌سیندن ایمتینا ائده‌رک، بونون وطنداشلیق دایره‌سی طرفیندن تصدیقلنمیش آدلار آراسیندا اولمادیغینی و “آد سیستمی”نده مؤوجود اولمادیغینی اساس گتیریبلر.
ایرانین وطنداشلیق قئیدیاتی تشکیلاتی تصدیقلنمیش آدلاری‌نین لیستینی یاییملایاراق وطنداشلاردان بو آدلاری اوشاقلاری اوچون سئچمه‌لرینی ایسته‌ییر. والیدئینلر طرفیندن سئچیلن آد قئیدیات ایداره‌سی طرفیندن تکلیف اولونان لیستدن کناردا اولدوقدا، سئچیلمیش آد آراشدیریلماق اوچون بو تشکیلاتین (آد کومیته‌سی‌نین) ایداره هئیتینه گؤندریله‌جک و تصدیق ائدیلمه‌دیگی تقدیرده آدین سئچیلمه‌سینه ایجازه وئریلمه‌یه‌جک.
تصدیقلنمیش آدلار لیستینده سیاسی و دینی محدودیتلر و فیکیرلر، بیر چوخ وطنداشی اینسان حوقوقلارینا ضد اولاراق، اوشاقلارینا دینی، ائتنیک و یا مدنی کیملیکلرینه گؤره آد وئرمکدن محروم ائدیر.
#اوشاق_حوقوقلاری #تورک_آدلار
قایناق: ایران وایر
