«لیلی خیاوی» چیلله دیر، بَزه ییر ماسانین اوستون
چیلله دیر، بَزه ییر ماسانین اوستون
جان آتیر گؤرونه هامی دان اوستون
چیخاردیر گؤزونو دوشمانین، دوستون
یا رببیم! وئر شفا گؤرمه میش لره
آل_الوان مئیوه نی، ژله نی دوزور
اولمایان کیمسه نین باغرینی اوزور
سانالدا پایلاشیب، آلقیشلار گَزیر
یا رببیم! وئر شفا گؤرمه میش لره
شکیلده قارپیزلا، قول_بویون اولور
سانکی سئوینجینی میللت له بؤلور
یوخسول بالاسینین گؤزلری دولور
یا رببیم! وئر شفا گؤرمه میش لره
اصیل کیمسه لرین عقده سی اولماز
هر آن خوش گونوندن شکیل لر سالماز
اوره یی، نخوت له، غرورلا دولماز
یا رببیم! وئر شفا گؤرمه میش لره
