اقتصادی پروبلئملر و یوخسوللوق ایراندا اوشاق ائولیلیگی‌نین اساس سببلریدیر
چارشنبه آخشامی، ۲۳ مرداددا دنیای اقتصاد قزئتی اوشاق ائولیلیگی قونوسوندا آراشدیرمانین نتیجه‌لرینی درج ائده‌رک یازیب: ایراندا آدام‌باشینا دوشن آشاغی گلیر، یوکسک تورم و گلیر برابرسیزلیگی کیمی عامللر اوشاق ائولیلیگی‌نین اساس عامللریدیر.
دنیای اقتصاد ادعا ائدیب کی، مشهور اینانجین عکسینه اولاراق، “ایراندا عومومی دینی باخیش” اوشاق ائولیلیگینه اؤنملی ائتکی گؤسترمه‌ییب و ایراندا اقتصادی تحریملر و اورتا طبقه‌‌‌نین کیچیلمه‌سی کیمی عامللر اوشاق نیکاحلاریندا داها بؤیوک رول اوینامیشدیر.
ایراندا حؤکومت قورومونون درج ائتدیگی سون رسمی ایستاتیستیکایا اساساً، ۱۴۰۰-جو ایلین قیشیندان ۱۴۰۱-جی ایلین پاییزی‌نین سونونا قدر ایرانین چئشیدلی بؤلگه‌لرینده ۱۵ یاشدان آز ان آزی ۲۷ مین ۴۴۸ اوشاق ائولیلیگی حیاتا کئچیریلیب.
آکادمیک آراشدیرمالار گؤستریر کی، اوشاق ائولیلیگی قیزلارین ائیتیمدن محروم قالماسی ایله یاناشی، نیکاح موناسیبتلری باخیمیندان دا اوشاقلارا قارشی جینسی زوراکیلیق نومونه‌لریندن بیریدیر.
