“تورک قادینلار مرکزی”نین ۲۵ نوامبر، قادینلارا قارشی زوراکیلیغا موباریزه گونو مناسبتینه بیانیاتی
۲۵ نوامبر، ساده‌جه دنیا دا زوراکیلیقلارا معروض قالان قادینلاری آنماق اوچون دئییل، هم ده ایران قادینلاری، ائوزللیکله غیر فارس ملتلردن اولان و حاشیه ده قالان، او جومله‌دن تورک قادینلارینا دیققت یئتیرمک اوچون بیر فورصت‌دیر. ایراندا قادینلارا قارشی زوراکیلیقلار، جدی بیر بحران ساییلیر و چوخلو سایی‌دا قادینلارین حایاتینی تاثیر آلتینا آلیر.
ایرانین هر بولگه‌سیندا «ناموسی قتل‌لر» آجی و آرتان بیر حقیقت‌دیر. بو قتل‌لر، عادتاً “شرف و آبیر قوروما” کیمی اساسسیز بهانه‌لرله حیاتا کئچیریلیر و بو، قادینلارا قارشی سیستماتیک زوراکیلیغینین بیر نمونه‌سی‌دیر کی حکومتین یئتکیلیلرینین و حتی جامعه‌نین دیگر یاریسی یعنی کیشیلرین سکوتی کولگه سینده قالیر. بیر چوخ قادین بو زوراکی سیستم‌ده، اجتماعی رفتارلاری و شخصی ارتباطلاری کیمی مختلف بهانه‌لرله تهدید ائدیلیر، ازیلیر و حتی حایاتینی ایتیریر.
آیریجا، ایرانین سیاسی آکتیویست قادینلاری فیزیکی و روانی شکنجه‌لرله اوزله‌شیرلر. سیاسی و اجتماعی مباریزه‌لرده اشتراک ائدن قادینلار، ائوزللیکله قادین حاقلاری آکتیویستلری سورکلی وحشیجه‌سینه و غیرقانونی حبسلره معروض قالیرلار. بو قادینلار، ائوز و دیگر قادینلارین حاقلاری اوچون حکومته قارشی موباریزه اَپاراراق، حبسخانالاردا فیزیکی و روانی زوراکیلیغا معروض قالیرلار، او جومله‌دن تجاوزله تهدید ائدیلمک، جنسی زوراکیلیق، دویولمک و اساس انسان حاق‌لاریندان محروم ائدیلمک.
آنجاق، غیر فارس ملیتلردن اولان قادینلار، او جومله‌دن تورک قادینلارینین دورومو داها کوتو و حساسدیر. اونلار جنسیتی آیری سئچکیلیکلردن علاوه ملیتی _ ائتنیکی آیری سئچکیلیکلره معروض قالیرلار. بو قادینلار، ائوز آنا دیلینده تحصیل آلماق، ساغلیق خدمتلره ائریشیم (دسترسی) و ایش ایمکانلاری کیمی ایلیکین حاقلاردان محرومدورلار و بیر چوخ حالدا اجتماعی و حقوقی دستکلردن فایدالانا بیلمیرلر.
ایراندا قادینلارا قارشی زوراکیلیق، عائیله ایچی زوراکیلیق و اجتماعی، سیاسی، حقوقی و دینی باسقیلار، قادینلاری حایاتلارینین هر ساهه‌سینده غیر برابرلیکلره و استثمارا معروض بوراخیر. بو ائوزللیکله تورک و دیگر حاشیه‌ده یاشایان ملتلردن قادینلار آراسیندا داها آچیق شکیلده گورونور. بو دورومدا قادینلار، مباریزه‌لرینی داوام ائتدیرمک و زوراکیلیغا و غیر برابرلیکلره قارشی اعتراضلاری نین ائشیتیلمه‌سی اوچون لازیم اولان هر چوخ دستک اولمالیدیر.
تورک قادینلار مرکزی، اینترسکشونال فمینیست بیر مرکز اولاراق، توم دونیاداکی قادینلارلا، ائوزللیکله ایران قادینلاریلا دایانیشمادا اولاراق، هر طورلو زوراکیلیغا، آیری سئچکیلیکلره قارشی دورور. بِیز، هیچ قادینین زوراکیلیغا و تهدیده مروض قالمایاجاغی، آزادلیق و برابرلیک اوچون مباریزه اَپاران قادینلارین سوسدورولمادیغی بیر دونیا ایستییریک.
تورک قادینلار مرکزی
۲۲. نوامبر.۲۰۲۴
