ايسلام جمهوريتي اوشاق_ائولیلر اوچون حامیله لیک محدودیتینی لغو ائدیب
ساغلیق ناظرلیگی‌نین اهالی گنجلیگی قرارگاهی‌نین رئیسی صابر جباریه ۱۸ یاشینا چاتمامیش حامیله‌لیگه قویولان محدودیتین لغو ائدیلدیگینی آچیقلاییب و بئله بیر محدودیتی “نیکاح و حامیله‌لیک ساحه‌‌‌سینده دوغرو اولمایان ایفاده‌لر”له علاقه‌‌‌لندیریب.
عینی زاماندا، ساغلیق ناظرلیگی‌نین ساغلیق اوزره معاونی علیرضا رییسی حامیله‌لیک اوچون یاش محدودیتی‌نین آرادان قالدیریلدیغینی تصدیقله‌ییب و ۱۵-۴۹ یاشلارین حامیله‌لیک اوچون اویغون اولدوغونو بیلدیریب.
رییسی آرتیریب: “ساوادلی اینسانلار آراسیندا نیکاح یاشی آرتیب، ائیتیملی عائله‌‌‌لی اینسانلار آراسیندا دا اوشاقلارین سایی آزالیب. اونا گؤره ده بیز بو اینسانلارا سرمایه قویماقلا اهالی‌نین گنجلشمه‌سی‌نین سیراسیندا توپلومون باشقا کسیملرینه نومونه یاراتمالییق”.
۱۴۰۰-جو ایلین پاییزیندان و خامنه‌ای‌نین امری ایله گنج اهالی قانونونون تطبیقیندن بری ساغلاملیق مرکزلرینده اؤنله‌ییجی وئریلمه‌سی و اونلار حاقیندا بیلگیلندیرمه قاداغان ائدیلیب.
۶ شهریور گونو پزشکیان و کابینه‌سی ایله گؤروشه‌رک، خامنه‌ای حؤکومتدن ۱۳ امر و طلبینی “تؤوصیه” شکلینده تقدیم ائتدی.
مجلیس عضولری آراسیندا پزشکیان حؤکومتی‌نین تکلیف ائتدیگی ناظرلر آراسیندا ان آشاغی سسی ساغلیق ناظری محمدرضا ظفرقندی آلیب.
خامنه‌ای اونا خیطاباً دئییب: “جناب ظفر قندی‌دن ایسته‌ییرم کی، اهالی‌نین گنجلیگی مسئله‌‌سینی شخصاً ایزله‌سین و اونون مانعه‌لرینی جدی شکیلده آرادان قالدیرسین، چونکی اؤلکه‌نین گنج اهالی‌یه احتیاجی وار”.
#اوشاق_حوقوقلاری #اوشاق_ائولیلیگی
