اوشاق ادبیاتی «زنجفیللی شیرنی اوغلان» حاضیرلایان:” ویدا حشمتی”
بیر گون بیر یاشلی قادین ایسته‌دی زنجفیللی شیرنی پیشیرسین. بیراز اون، سو، شکر بیر ده زنجفیل گؤتوردو. هامیسینی قاتیب یوغوردو ساری بویالی گؤزل بیر خمیر دوزلتدی.
قونشولارین کیچیک اوغلانلارینا وقیزلارینا مربع و گیرده قالیبلاردا شیرنی جورله‌دی. سونرا دا بئله قرارا گلدی بیر گؤزل شیرنی ده بالاجا «بابی» اوچون پیشیرسین.
بیرتیکه گیرده خمیری، گؤوده‌سی اوچون آییردی. بالاجا بیر تیکه خمیر ده باشی، ایکی تیکه ده اللری ایله آیاقلاری اوچون آییردی. اونلارا شکیل وئریب، بارماقلارینی اینجه-اینجه جورله‌دی. ایکی قولاق، ایکی گؤز بیر ده بورون… کیشمیش له ده دوداقلارینی قویدو. او، شیلتاق بیر اوغلان اولدو.
اوندان سونرا زنجفیللی شیرنی‌نین خمیرینی تندیرین لاپ دیبینده بوجاغا قویدو. چونکو قورخوردو بو دجل اوغلان چیخیب قاچسین. او بیری شیرنی‌لری ده قاباغا دوزدو.
قادین اوتاغی ساهمانلاماغا گئتدی. ساعات ۱۲ اولدو. بیردن تندیرین باشینا قاچدی. چونکی شیرنی‌لرین یانماغیندان قورخدو. شیرنی‌لر چوخ گؤزل پیشمیشدیلر. زنجفیللی اوغلان دا پارلایاق گؤزلری ایله، گوله-گوله تندیرین آچیلماغینی گؤزله‌ییردی. تندیرین قاپیسی آچیلماق همین شیلتاق زنجفیللی شیرنی او بیری شیرنی‌لرین اوستوندن آتیلیب، قاچدی.
سرعت‌له قاچان شیرنی دئییردی:
– هئچکس منی توتا بیلمز-هئچکس منی توتا بیلمز… من زنجفیللی شیرنی‌یم، من شیلتاق اوغلانام.
قادین هایلادی «موسئر» شیرنی اوغلانی توت! اونو کیچیک بابی اوچون پیشیرمیشم.
قادین پیشیگی چاغیراندا او گون قاباغیندا اوزانیب، یاتمیشدی. بیردن یوخودان آتیلدی. قاچدی زنجفیللی شیرنینی توتسون آمما او ائله سرعت‌له قاچدی کی، پیشیگ اونو توتا بیلمه‌دی.
«تاوئر» آدیندا ایت، ایستی داشلارین دیبینده یاتمیشدی. قادین اونو چاغیراندا یاواشجا ترپه‌نیب، گؤزلرینی آچدی. قادین بیر ده اونو سسله‌دی:
-تاوئر-تاوئر!.. او شیرنینی توت! قویما قاچسین!..
تاوئر یئریندن آتیلدی.
او بئله بیلدی، پیشیک بیر شئی اوغورلاییب قاچیر. ایسته‌دی پیشیگین اوستونه هوژم ائله‌یه.
قادین اونلارا طرف قاچیردی. بیردن ایت ایله پیشییین قاباغیندا یئره ییخیلدی.
زنجفیللی شیرنی ایتین قیچلاری‌نین آراسیندان زویولده‌ییب، قاچدی. او دووار باشینا چیخدی. اونلارا باخیب، گولوردو. ائله گولوردو کی، گؤزلریندن یاش گلیردی.
پیشیک چوخ یورولموشدو. گئدیب بیر طرفده اوتوردو. ایت دووار باشینا چیخماغا چالیشیردی.
یئره ییخیلان قادین آیاغا قالخدی. اوزو جیزیلمیشدی.
زنجفیللی شیرنی اوغلان ایتین دووارا دیرماشماغینی گؤرونجه، آتیلیب، باغین اورتاسینداکی آغاجا طرف قاچدی.
آغاجین بوداغیندا «جوکو» آدیندا بیر میمون یاتمیشدی. البته یاتمامیشدی، میمونلار یاتمازلار، او گؤزلرینی یومموشدو. جوکو قادینین سسینی ائشیتدیکده گؤزلرینی آچدی. قادین سسله‌ییردی:
-جوکو-جوکو او شیرنی اوغلانی توت! قویما قاچسین. اونو بابی اوچون پیشیرمیشم.
میمون یئره آتیلدی. ایسته‌دی شیرنی اوغلانی توتسون. آمما شیرنی اوغلان آغاجین باشینا آتیلدی. لاپ یوخاریداکی بوداغا چخدی. او آن میمون ایکی ترپنیش‌له آشاغی بوداغا، سونرا دا یوخاری بوداغا آتیلیب، آسلاندی. سونرا دا فیرلانیب، شیرنی اوغلانی توتوب، قوجاقلادی.
کیچک بابی گون اورتادان سونرا ایکینجی قاتدا یاتار. بیری بابی‌نی سسله‌دی. بابی آیاق یالین، آشاغی گلدی. پنجره‌دن ائشییه باخدی. قاچا-قاچا اؤزونو آغاجا یئتیردی.
بابی دئدی:
-جوکو اونو بوراخ!..
جوکو زنجفیللی شیرنینی بوراخدی. او دا بابی‌نین دوز قوجاغینا دوشدو.
بابی چوخ آجالمیشدی. اوندان بیر دیش یئدی. چوخ لذتلی ایدی. بیر دیش داها قوپاردیب، یئدی. اوچونجو دفعه هامیسینی آغزینا قویدو.
زنجفیللی شیرنی‌نین سونو بئله اولدو. بونلارین هامیسی بابی‌نین خیالیندان کئچیردی. آخی زنجفیللی شیرنی کی قاچا بیلمز.
سون
