یوخوسوزلوق-یازان: آدم ممداُو کؤچورن: سحرخیاوی حاضیرلایان:ادبیات سئونلر
حیاتیمدان شیکایت ائتمه‌یی سئومیرم. قطعا ناراضی دئییلم. نه بیر گون اوّله، نه طلبه‌لییه، نه ده اوشاقلیغیما دؤنمک ایسته‌ییرم. یالنیز بوگون و یاخشی گله‌جک اوچون یاشاماق ایسته‌ییرم. ایش ترافیکیم چوخ اولا بیلر، گونده‌لیک گؤروشلر، توپلانتی‌لار، سایسیز- حسابسیز اولا بیلر، آمما ائله حیاتی چکیب آپاران دا بودور.
سیراغا گون حیات یولداشیما زنگ ائتمیشدیم. بیر ساعات سونرا یئنی‌دن دانیشمالی اولدوم. تئلفوندا سون زنگ‌لردن آدینی آختاردیم. صفحه‌نی آشاغی چئویردیم، چئویردیم، آمما تاپا بیلمه‌دیم. سن دئمه، بیر ساعات عرضینده 29 فرقلی آداملا دانیشیرمیشام. بو قدر چوخ اونسیت، چوخ انرژی طلب ائدیر، هم ده هر کسدن فرقلی حیس، فرقلی آب- هاوا آلیرسان.
آمما حیاتدا بعضی اینسانلار وار کی، اونلارا هر زامان واخت دا، انرژی ده تاپا بیلیرسن. بونلاردان بیری اوّل‌لر درس دئدیییم، سونرا دوست اولدوغوم، سون آیلار دا ایسه ایش یولداشیم اولان ایکل دیر.
ایکلی کیمله تانیش ائتسم، ان بیرینجی آدینین معناسینی سوروشور. هر دفعه ده عینی جاوابی وئریر: آدی ایلکل اولاجاقمیش، قئیدییاتا سهو آلیبلار. سسلنمه‌سی ده خوشلارینا گلیب دییه ایکل دئمه‌یه باشلاییبلار.
نییه‌سه بو حیکایه منه چوخ معناسیز گلیر.
عزیز اوخوجوم، اجازه‌نله کیچیک بیر حاسیه ائده‌رک بونو دا یازیم. ایندی اوخودوغون حیکایه‌یه بو گون باشلامیشام، ایکل‌له صؤحبتیمدن سونرا. ایکلین دانیشدیقلاری او قدر قریبه‌یدی کی، دئدیک‌لرینی یازماغی قرارا آلمیشام. صاباح ماراقلی نَسه اولسا، اونو دا سنه دانیشاجاغام.
بیرینجی گون
بیرینجی گون سندرومو وار . بوگون بیر چوخ ایشچی استراحتدن ایشه یورغون دؤنور، نرمال ایش گونلری نظردن داها گرگین اولورلار. ایکل ده بو گون بئله گلمیشدی. گؤزلری شیشمیش، یوخوسوز و یورغون.
– نه اولوب، یئنه یاتمامیسان؟
سالام- کلامسیز سوروشدوم.
– معللیم، باغیشلایین گؤرمه‌دیم، نئجه سینیز؟
– من یاخشییام. آمما سنی هئچ یاخشی گؤرمه‌دیم.
– هه، دونن گئجه یوخودان آییلدیم، سونرا نه قدر ائله‌دیم یاتا بیلمه‌دیم. یورغونلوق هئچ جانیمدان چیخماییب.
دوغروسو، ایکلی بیرینجی دفعه دئییلدی بئله گؤروردوم. هفته سونلاری استراحت ائتمه‌یی، اَیلنمه‌یی سئویر.
عیاش دئییل، آمما ایچکیسی یئرینده دیر. دیسکو- بار هفته سونو موطلق دیر.
بعضن دوشونورم کی، سحر 9-دا بو آدام ایشه گله بیلیرسه، بؤیوک هونر دیر.
– نییه یاتا بیلمه‌دین؟- سوروشدوم.
– واللاه منه ده قریبه گلدی. گئجه برک ایلدیریم چاخدی، ایلدیریم چاخاندا پیشیگیم برک قورخوب اوزومو جیرماقلاییب، من ده ایلدیریمین سسینه‌می، یا پیشیگیمین جیرماغینامی اویاندیم. اصلینده چوخ یورغون ایدیم، جمعی بیر ساعات ایدی کی یوخویا گئتمیشدیم، آمما یورغونلوغوما رغمن یاتا بیلمه‌دیم.
– یاخشی، سن بو گون منه لازیمسان، آمما بئله یوخ.
مودیرین استراحت اوتاغی بوشدور، سوروشسا من ایضاح ائده‌رم، گئت بیر ایکی ساعات یات و دیپ- دیری قاییت.
– تشککورلر حوجام، دئییب اوتاقدان چیخدی.
بو گون اوچون پلانیم بئله ایدی: 10دا هئیات‌له اجلاس، 11ین یاریسی بیرینجی مرتبه‌ده کی ایشین گئدیشی‌له تانیشلیق. 11ده گلن تجربه‌چیلرله گوروش. 12ده شهردن کناردا کی یئنی شعبه‌یه سفر. ایکل ده منه سونونجو اوچون لازیم ایدی.
12یه قدر ایشلریمی تاماملاییب اوتاغا قاییتدیم. ایکل بورادا ایدی.
– اعلاسان. تام زامانیندا گلمیسن. دینجینی آلدین می؟
– نئجه؟
– دئییرم یاتا بیلدین می؟
– یوخ، حوجام، یاتا بیلمه‌دیم. ایکی ساعات دیوانین اوستونده فیرلاندیم، سونرا دا گلدیم.
– عیبی یوخ. دئییردیم ماشینی سن سوررسن، اوچ ساعاتلیق یولوموز وار، داها نه ائتمک اولار. من سوره‌رم، سن ده یولدا یاتارسان.
– دئییرم حوجام، اوره‌کسیز ائی واللاه…
– من ده دئییرم گونوموزه باخ دا. ایشچیمیزی یاتیرماق اوچون مین حوققا چیخاریریق.
ساعات اون ایکی تامامدا یولا چیخدیق. باکی‌دان اوزو شیمالا گئدیردیک. قوساردا آچیلان یئنی شعبه اوچون هم آلیناجاقلار سیاهه‌سی حاضیرلامالی، هم ده ایشچی حاضیرلامالی، هم ده ایشچی بوش یئرلرینی تاماملامالی ایدیک.
اتوبوس ایستگاهینا چاتاندا رادیونو fm-ه دییشدیم. اکثر حاللاردا یا ” یورد” fm، یا دا ” retro”یا قولاق آسیرام.
” وئر منیم عشقیمی” اوخویوردو. ماهنی‌نین سسینی آزالتدیم. سونرا یالچین رضازاده، سونرادا موباریز تقی‌یئو اوخودو.
ماهنیلار منی ده کئچمیشه، اوشاقلیغیما آپاردی. حزین نوتلاردا ایکلین یوخویا گئدییینی دوشوندوم.
خیردالان دایره‌سینه چاتاندا، بیردن ایکل آرخادان دیللندی:
– حوجام، ” یوخوسوزلوق” فیلمینه باخمیسیز؟
– بییی، سن یاتمامیسان؟ تعجوبلندیم،- من دئدیم سن چوخدان خومارلانمیسان.
– یوخ، دییه‌سن یاتا بیلمیه‌جم. باخمیسان؟
– هه، باخمیشام. اورتا مکتبده درس دییه‌نده بیر شاگیردیم حاققیندا دانیشمیشدی، من ده باخدیم. دئییرسن سن ده یوخوسوزلوق توتموسان؟ بیلیرسن ده بئله بیر خسته‌لیک ده وار.
– بیلیرم، ائله اوردان عاغلیما گلدی. هئیاته باخین: رژیسسور نولان، باش رولدا، آل پاچینو و رابین ویلیامز. دهشتدی، هه؟
– رژیسسورا فیکیر وئرمه‌میشدیم. نه ماراقلی…
– ائه سیز ده، همیشه دئمیردینیز بس، فیلمه رژیسسورا گوره باخیرسینیز؟
بیرجه شئی، فارست گامپ- تام هنگز خاریج.
– یادداشا باخ ائی، آزی اون ایل اولار بو سؤزو سیزه دئمیشم.
– چوخ اولار، بلکه ده هله دوققوزو اوخویوردوم اوندا.
صؤحبتین داوام ائتمه‌سی منیم اوچون خوش ایدی. دوزدور، ایکلین یورغونلوغونون چیخماسینی دا ایستردیم، ان آزی بو بویدا یولو سورمه‌ییمه دَیَردی. آمما صؤحبت منی اویاق ساخلاییردی.
یول اوستو پیرده دایاندیق، عنعنوی” دادلی ایت اتی کابابی” ظارافاتینی ائتدیک، یئنه عنعنوی آرخادا بئش‌بارماق داغی دوشَن شکیل چکدیردیک و یولا داوام ائتدیک…
آخشام ساعات یئددی‌ده یئنی‌دن اداره‌ده ایدیک، آیریلمازدان اؤنجه ایکل منه دئدی:
– حوجام قورخورام.
– نییه قارداشیم؟ یاتماماقدان آدام قورخار؟
– هه. قورخورام، دییه‌سن من، منیم اوتاغیمدا…. یاخشی، دانیشاجام دییه‌جکسیز کی دلی اولموشام، گئتدیم.
– یاخشی گئت، شیرین یوخولار،- دئدیم.
ایکل قاپینی آرالی قویوب چیخدی.
– باخ، تئلفون اویناتمیرسان، تئلویزیون آچمیرسان، ایچمه اؤزون ده، بیر ساکیتلشدیریجی آت و یات،- آرخاسینجا اوجادان دئدیم.
سونرا دا اؤز- اؤزومه آت، یات سؤزلرینه اویغون قافیه‌لر تاپماغا باشلادیم…
سون سؤزلری سسلی دئدیییمدن محافظه‌چی” منیمله‌سینیز؟” سوروشوب یاخین گلدی، الیم‌له ” یوخ” اشاره ائدیب تئلفونو آچدیم.
بوگون باش وئرنلری قئید ائتمه‌یه باشلادیم، منی ناراحات ائدن ایکلین چیخارکن دئمک ایسته‌دییی، آمما دئمه‌دییی جمله ایدی.
ایکینجی گون
اوتاغا کئچیب صبیرسیزلیک‌له ایکلی گؤزلمه‌یه باشلادیم. دونن اونو یولا سالدیقدان سونرا بیر نئچه دفعه ده زنگ ائتمک ایسته‌دیم. ” بلکه یوخودادیر، اویاتماییم” دییه دوشوندوم. ایکل الینده کوفی مطبخدن گلدی.
– نه تئز گلمیسن؟ باخیم گؤزلرینه؟
– علیکم سالام. آی معللیم،- سسین‌ده کی اینجیک تونو حیس ائتدیم.
– نه‌دیر، قارداشیم دییه‌سن…
– هه، حوجام واللاه عوذورلو سای، بئله ده درد اولار؟
– دییه‌سن یئنه آز یاتمیسان؟
– آز؟ هئچ بیر ثانیه ده...
– بس نئجه ائده‌ک؟
ایسته‌ییرسن ایجازه وئریم حکیمه گئت.
– یوخ، حکیمه احتیاج یوخدو. اینترنت‌ده اوخودوم، چوخ ایشله‌مکدن، استرس‌دن اولور…
– سن و چوخ ایشله‌مک؟
– ائله دئمه‌یین، من حیاتیم بویو ایشلمه‌مه‌میشم آخی، سیز منی ایشله‌ده بیلیرسینیز.
– اوندا ایجازه وئریم ائوه گئت. حتا ایسته‌سن صاباح دا گلمه، یا دا یوخ، صاباح یئنه قوسارا گئتمه‌لی‌ییک.
– یوخ،- گؤزونو کوفی‌یه تکیب دئدی،- ائوده نه ائده‌جم کی؟
– اؤزون بیلیرسن، اوندا ایش باشینا گئت، اورتالیقدا آز وئییل‌لن.
ایکله گوزلریم‌له ایش ماساسینا کئچمه‌لی اولدوغونو گؤستردیم. او دا ساکیتجه یئرینه کئچدی.
ناهارا قدر بیربیریمیزی دیندیرمه‌دیک. ناهار واختی ایکل مطبخدن زنگ ائتدی:
– حوجام، بیر لاحماجون، بیر ده اَت دؤنری سیزی گوزله‌ییر.
هر دفعه “آز یییه‌جم” سؤزونو وئریب ائودن چیخسام دا، دویونجا یئمه‌یی سئویرم. اودور کی سون ایللرده 73 کیلودان 103 کیلووا چاتمیشام.
یئمک‌ده گؤزوم ایکلین اوستونده ایدی. اونون اوزونده تکجه یورغونلوق یوخ، هم ده قورخو وار ایدی. استکانا سو سوزنده اللری اسیردی. رنگی گؤیرمیشدی.
– قارداش سن یاخشی دئییلسن، بلکه حکیمه گئده‌سن.
– یوخ. بوگون یوخ. یاخشی اولماسام صاباح گئده‌رم.
آخشام آنام دا گله‌جک. تئلفوندا دانیشاندا ناراحات اولدو، ایندی یولا چیخیب.
– یاخشی ائدیب،- الیمی ایکلین چیینینه قویدوم،- قورخموسان ائله بیل.
– یاخشی اولماسام صاباح دانیشاجام، بوگون منی عوذورلو سایین.
– گئت، آمما صاباح سالامات گل.
اوچونجو گون
بو گون چوخ گؤزله‌سم ده ایکل گلیب چیخمادی. اون‌بیرده زنگ آچدیم، آناسی گؤتوردو.
– سالام معللیم. ایکل یاتیر، نئجه‌سینیز؟ آللاه سیزدن راضی اولسون…
– یاتیب؟ نه یاخشی. چوخ ناراحات ایدیم.
– یاتمامیشام،- آرخادان آغلامسینان سسی گلدی،- یاتا بیلمیرم.
تئلفونون آناسینین الیندن ایستولا، یا نه‌یینسه اوستونه قویولدوغونو حیس ائتدیم، نوازیشلی آنا سسی، عصیانکار اولاد سسیندن باشا دوشدوم کی، آنا دا یوخودان منیم زنگیمه اویانیب، دونن ایکلین یاتماسی اوچون ساعاتلارلا گؤزله‌ییب، اؤزونو یوخو آپاریب.
اداره‌دن چیخدیم. ماشینا مینیب بیر باشا ایکلین قاپیسینا سوردوم.
ایکلین وضعیتی هئچ یاخشی دئییلدی. آناسینین دئدییینه گؤره دونن‌دن هئچ سو دا ایچمه‌ییب.
اوتاغینا کئچنده منی گؤروب اؤزونو دوزلتمه‌یه چالیشدی، بو اوندا او قدر ده یاخشی آلینمادی. یانینا کئچیب اوتورماق ایسته‌دیم:
– اوردا یوخ،- دئدی،- بو طرفه گله بیلرسینیز؟
– یاخشی، علیکم سالام، نئجه‌سن؟
– بیلمیرم. بونلار منی دلی ائده‌جک‌لر، نه اولار کومک ائله.
ایکل هیچقیریقلا آغلاماغا باشلادی. دییه‌سن یوخودا گؤرملی اولدوغو رنگ‌لر، سسلر و اوبرازلار گوندوز ایشیغیندا گؤرونمه‌یه باشلامیشدی.
– کیمی دئییرسن؟ کیم سنی دلی ائدیر؟
– منیم یوخوم… آتامین یوخوسو…
– ایکل باخ، منجه ساکیتلش، گل حکیمه گئدک. هر حالدا اونلار یولونو تاپار.
-یوخ، نئجه؟ سوسون، سوس گؤروم، سن ده سوس، ایکینیز ده. حکیم‌لیک دئییل.
– سن نه بیلیرسن حکیم‌لیک دئییل؟
ایکل منیمله دانیشمیردی، اوّل منه جاواب وئردیینی دوشونسم ده، سونرا گؤردوم کی او اؤز عالمینده دیر، کیمین‌له سه صؤحبت ائدیر.
– کیمدی او؟- سوروشدوم،- سنین یوخون دانیشا دا بیلیر؟
بو واخت قاپیدا ایکلین آناسینی گؤردوم، باشینی باغلامیشدی. قارا شال اؤرتموشدو. گیلدیر- گیلدیر گؤز یاشی تؤکوردو.
یانینا گلیب ساکیتجه:
– هئچ دوز ائله‌میرسینیز،- دئدیم،- اوشاغا دستک اولمالی‌سینیز، نه‌دیر بو یاس هاواسینا بورونموسونوز؟
– آتاسی دا بئله اولدو. آلتی گون هئچ نه یئمه‌دی، ایچمه‌دی، دانیشمادی، یاتمادی، سونرا بیر گون سحردن گئجه‌یه قدر قیشقیردی، سونرا دا بیر دفعه‌لیک گؤزونو یومدو.
منیم قارا بختیم، منیم بدبخت اوغلوم، آتاسیندان بونو میراث آلیب. ایکلین آناسینی چؤله چیخاردیم، چوخ دانیشدیردیم، ساکیتلشدیرمیه چالیشدیم، دانیشدیقلاریندان اؤیرندیم کی آتاسی ییرمی‌یئددی ایل اوّل ایکل دوغولاندا بو قریبه مرضه توتولوب، آلتی گون عرضینده دئدییی تک سؤز اوغلونون آدینی ایکل قویماق ایستمه‌سی اولوب، باشقا دا هئچ نه…
یئنی‌دن ایکلین یانینا قاییتدیم، بو دفعه اونو دینله‌مدن تعجیلی یاردیم چاغیردیم. اونا ساکیتلشدیریجی ایینه ووردولار، چیخاندا دئدیلر کی درمانی ائله دوزادا وورموشوق کی، دیو ده اولسا، ان آزی اون ساعات یاتمالی دیر. ایکل ساکیتلشدی. حکیم‌لر گئتدیلر، آمما یوخویا گئتمه‌دی.
ایکل صاباح یئنی‌دن گلمه‌ییمی ایسته‌دی. دئدی هر شئیی منه دانیشاجاق.
چیخاندا آناسی یئنه آغلاییردی، بو دفعه تک دئییلدی، ایکلین قوهوم- اقرباسی ائوه گلمه‌یه باشلامیشدیلار.
دؤردونجو گون
– معللیم، مکتبده رعنا معللیمه واریدی، خاطیرلاییرسیز؟
– هه قارداشیم. نئجه؟
– بیر دفعه اونو یوخودا اؤپموشدوم…
– آی سنی خاطاکار،- یالاندان گولمک ایسته‌دیم. ایکل ائله ضعیف گؤرونوردو کی، اؤزومو آغلاماقدان گوج‌له ساخلادیم. – دئمه‌لی سنین بئله ایشلرین ده وار ایمیش.
– هه، بونو دا محافظه‌چی گؤرور، گویا گیزلنیب، قارین یئکه، اؤزو ده شوشه قاپی‌نین آرخاسیندا…الینده کی سیلاح دا نه اولسا یاخشی دیر؟
– نه؟
– بالیش...من اوندا بیر تهر اؤزومو یوخودان اویاندیردیم، آمما سن دئمه، ائله اوردا دا داوام ائدیرم، ایندی بیر من وار اورادا، رعنا معللیمه‌نی هرگون اؤپمه‌یه گئدیر، هر گون ده محافظه‌چی‌یه توتولور.
من ایکلین دانیشدیغینی باشقا واخت ائشیتسه‌یدیم، آلنی‌نین اورتاسیندان چیرتما ووروب، یا پئیسرینه یونگول قاپاز ووراردیم، سونرا دا ” بوش بوغازلیقدا اوستون یوخدور” دییردیم. آمما قییمادیم، ساده‌جه:
– ماراقلی دیر،- دئدیم.
– هه، حوجام، بیلیرم اینامیرسیز. آمما سیزه بیر شئی دئییم، من بیر ده یوخویا گئده بیلمیه‌جم. دوغروسو بو منی قورخوتمور داها. چون کی مین‌لر من وار، اونلار یاشاییرلار.
– باخ ایکلیم، بیلیرسن کی من سنی نه قدر چوخ ایسته‌ییرم، بلکه منه بئله سیرلی- سئحیرلی جمله‌لر قورمایاسان؟
– گولمک یوخدو کی؟
– البته یوخ.
– اوندا خواهیش ائدیرم منی چؤله چیخار. آپار بوردان. بورداکیلارین هامیسی منی دلی حساب ائدیر، سنه اینانیرام، سنجه من دلی‌یم؟
– منجه دئییلسن، ساده‌جه یوخوسوزسان.
– اونو کئچ حوجام. اونو کئچ داها.
ایکل آیاغا قالخماغا جهد ائتدی، آمما باجارمادی. نطقی دوننه نیسبت یاخشیدیسا دا، بدنی اولدوقجا ضعیف ایدی. حتا گؤزلرینین ده یاخشی گؤرمه‌دییی حیس اولونوردو. آغزینین یانیندان آخان توپورجه‌یین بئله فرقینده دئییلدی. اونو ماشینا قوجاغیمدا گتیردیم، نه آناسی نه ده قوهوملاری اعتراض ائتدی. ایکل یول بویو دانیشدی:
– بوتون سؤاللارینا جاواب وئره‌جم، هامیسینا. اونسوزدا بونو کیمه دئسم اینانماز، آمما سن اینانارسان…
بازار گونو ائوه ایچکیلی گلمیشدیم، پیشییمی ده قوجاغیما آلیب، یاتمیشدیم…. آااا، پیشیییم، نئچه گوندور هئچ اونو گؤرمورم.
– آنان آپاریب. آیاغینی قیرمیسان یازیغین، بایتارا وئریب.
– من؟ یازیق پیشیک. یاخشی کی آنام عاغیللی آدام دیر، قویماز کیمسه خسته قالسین. یاخشی باشقا یئردن باشلاییم.
– بیز یوخویا گئدنده روحوموز بدنیمیزدن چیخیر، اویاناندا یئنی‌دن بدنیمیزه قاییدیر. منیم روحوم بازار گونو چیخیر؛ آمریکایا گئدیر، سونرا ایلدیریم چاخاندا قاییدیر. آمما پیشیک اوزومو جیرماقلادیغی آندا فیکری یایینیر و بدنیمه گیره بیلمیر.گؤر تریلیونلارلا اینساندا، منیم بختیمه دوشنه باخ.
یوخوم بیلیرسن نییه دایانیر؟ پیشی‌یه گؤره یوخ، آتاسینی گؤرور. یعنی منیم آتامی.
من ایکله قولاق آسدیقجا قاراباسمانین اینسانا نئجه ده درین تاثیر ائده بیله‌جه‌یینی دوشونوردوم. یعنی بیر اینسان قاراباسما حالیندا دوغرودان بو قدر اوزون حیکایه قورا بیلر؟!
– حوجام فیکرین منده دئییل. دیققتله دینله. ایندی دییه‌جکسن کی آتامین اوردا نه ایشی وار؟ 27 ایل اوّل آنامین منی دوغماق اوچون سانجیسی توتور. ائله بیر قیشقیریق اولور کی آتام یاتاقدان یئره دوشور، بئله‌جه آتامین یوخوسو داها بدنینه گیره بیلمیر. آلتی گون یوخوسوز قالیر، سون‌دا اؤلوب گئدیر. یازیغین سیزین کیمی بیر مودورو ده اولمور کی، آچیب دردینی دئسین. بیرجه دئییر کی منیم آدیمی ایکل قویسونلار. ایکل بیلیرسیز کیمدی؟ هیپنوسون اوغلو. نه ایسه بونو اؤزون آراشدیرارسان. آتامین یوخوسو 27 ایل دیر کی منیم، اوّل‌لر ده آتامین یاتدیغی اوتاقدا ایمیش. او گون یوخوم اؤز آتاسینین روحونا ایلیشیر و بدنیمدن چؤلده قالیر، ایندی من هانسی اضطرابلاری چکیرم سه، روحوم دا عینی آغریلاری چکیر. او دا ائوینه قاییتماق ایسته‌ییر آمما اونو دا بیلیر کی هئچ واخت قاییتمیاجاق.
من ده هئچ واخت یوخویا گئده بیلمیه‌جم.
من بوتون بونلارا اینانماق ایستردیم آمما بونلار پسیکولوگیاسی ساغلام اولان، قرارلارینی عاغیللا وئرن اینسان طرفیندن دانیشیلمیردی.
– بیلیرسن معللیم، بیزه اؤیره‌دیب‌لر کی، ان سورعتلی اولان ایشیق دیر. آمما یوخو اوچون سرعت آنلاییشی یوخدور. هارادا ایسته‌سه اورادا اولور، حتا اولان، اولمایان یئرلری ده گزه بیلیر. دونن رعنا معللیمه‌نی اؤپمه‌ییمی سیزه دانیشدیم. یوخوم دئییر کی بیز هر گؤردویوموز یوخودا یئنی بیر عالم قوروروق. اورادا نه گؤروروک سه هامیسینی بیز یارادیریق و اویاناندا هر شئی اولدوغو کیمی داوام ائدیر. پارالل دونیا بونون یانیندا چوخ بسیط قالیر. هر بیر اینسان هر گئجه اونلارلا دونیا قورور و اونلارین هر بیری بو گون ده داوام ائدیر. بعضن یوکسک‌لیکدن ییخیلیریق، آمما یئره دیمه‌دن یوخودان آییلیریق ها، باخ اونلارین هامیسیندا یئره چیرپیلیریق، شیل- کوت اولوروق. اکثر دونیالاردا دا ائله شیل- کوت حیاتیمیزا داوام ائدیریک. اوچماغیمیزی گؤروروک سه او دونیادا اوچوروق. مین ایللر اوّله گئدیریک سه اورادا دا یاشاییریق.
منیم تکجه یوزدن چوخ اورتا مکتب دونیام وار. جنتده اولان کیم، جهنمده اولان کیم، آللاه اولان کیم…سونسوز اولان نه وارسا، او دا قوردوغوموز دونیالار دیر.
ایکلین سسی گئتدیکجه ضعیفله‌دی، اونو ائولرینه گتیردیم.
بئشینجی گون
یئنه قوسارا گئتمه‌لی ایدیم. تاریخه سالدیم. سحر تئزدن ایکلین یانینا تلسدیم. سانکی دونن بوتون دانیشاجاقلارینی منه سؤیله‌میشدی. بو گون ائله‌جه سوسوردو. من نه ایکلین دونن دانیشدیقلارینی جیددی توتدوم، نه ده بو دوشونجه‌لری گؤتور- قوی ائتدیم.
حکیم‌لر یئنه گلدیلر، آرخایین ائتدیلر کی ایکل یاخشیلاشاجاق، ساکیتلشیب و یوخویا گئده‌جک.
قفیل زنگ گلدی. قوسارا، یئنی شعبه‌یه گئتمه‌لی اولدوغومو دئدیلر. ایضاح ائده بیلمه‌دیم. مجبور یولا چیخدیم. شعبه‌نین رهبرلییی منی هیجانلا قارشیلادی:
– بئله ایش اولماز، بئله امکداشلیق اولماز. کامئرالارا دا باخمیشیق، سیزدن بیر ده او اوغلاندان باشقا گلن اولماییب.
– علیکم سالام.
– سالام آی معللیم. واللاه سالام واختی دئییل.
بیر بونا باخ،- ایشچی‌لر اوچون یئمک‌خانا کیمی نظرده توتدوغوموز اوتاغین قاپیسینی آچیب هیجانلا دئدی.- نه ایدی اوغلانین آدی؟ ایکل؟ هه، باخ، ایکل یازیب بونو.
ایکلین قیرمیزی بویا ایله دیوار اؤلچوسونده یازدیغی یازینی اوخوماق ایسته‌ییردیم کی، تئلفونوما مئساژ گلدی. ایکی کلمه: ” ایکل اؤلدو”.
هؤنکورتو ایله آغلادیم، یا هوشومو ایتیردیم، یا سنده‌له‌دیم، بیر ده باخدیم کی ایستولدا اوتورموشام، الیمده سویوق سو و قارشیمدا ایکلین بیرینجی گون یازدیغی سؤزلر:
” بیز ده کیمین‌سه یوخوسونداییق”.
