“طوبی پلانی”، ایسلام جمهورییتی‌نین مجبوری حجابی تطبیق ائتمک اوچون یئنی جهدی
ایسلام جمهورییتی‌نین ایران‌دا وطنداشلارا حجاب تطبیق ائتمه سیاستیندن سونرا شرق شبکه‌سی اؤلکه‌ده مجبوری حجابین تبلیغی و یایلماسی مقصدی ایله “طوبی پلانی”نین حیاتا کئچیریلمه‌سی ایله باغلی بیر راپور یاییب.
شرق شبکه‌سی‌نین وئردیگی بیلگیلره گؤره، بو پلان اوچ مرحله‌‌‌ده حیاتا کئچیریله‌جک و اوچونجو مرحله‌‌‌ده ۱۵۰۰ نفر عیفت و حجاب قونوسوندا ائیتیم آلاجاق.
“شرق” اؤز راپوروندا یازیب کی، گؤرونور، بو پلانین سون مقصدی حجاب ساحه‌‌‌سینده امر به معروفون حیاتا کئچیریلمه‌سی اوچون کادر اولوشومودور.
رضوی خوراسانین ارشاد ایداره‌سی‌نین مودیری محمد حسین‌زاده شرقه موصاحیبه‌سینده دئییب: “مقصدیمیز حجابین نومونه‌لریندن بیری اولان ایران-ایسلام مدنيتینی تبلیغ ائتمکدیر. آما بو ائیتیمی بیتیردیکدن سونرا اینسانلارا امر به معروف و یا نور پلانیندا ایشتیراک ائتمک اوچون ایجازه‌نین وئریلیب-وئریلمه‌یه‌جیی ایله باغلی هئچ بیر بیلگیم یوخدور”.
ایسلام جمهورییتی سون دؤرد اونیللیکده “نور لاییحه‌‌سی”، “حجاب قورویوجولاری” و “اخلاق پولیسی” کیمی چئشیدلی پلانلار شکلینده ایران خالقی‌نین اوزرینه ایسته‌دیگی گئییمی تاخماغا چالیشیب.
“قادین، حیات، آزادلیق” یوکسه‌لیشیندن بری مجبوری حجاب مسئله‌‌سی ایسلام جمهورییتی‌نین ان اؤنملی پروبلئملریندن بیرینه چئوریلیب.
حؤکومتین حجابا مجبور ائتمک، ایسلام جمهورییتی‌نین آرزو اولونان حیات طرزینی یاراتماق، چئشیدلی قانونلار، آغیر جریمه‌لر و سرت رفتارلارلا قادینلارین سیویل اطاعتسیزلیگینی یاتیرتماق جهدلرینه باخمایاراق، سون ایکی ایلده چوخلو قادین مجبوری حجابسیز توپلومسال آلانلاردا اولوب.
