تبسم_رضازاده«شدتی» شعر
گونش باتیردی اولدوزون گؤزونده دردی داشمادا
قارانلیق آت چاپار چاپار هارای سالیب ساواشمادا
یول اوسته خسته بیر قادین سینیق گرایلی قوشمادا
سینه‌م سؤکولدو آغریدان اورک یانیب گؤز آغلادی
یازیق قلم دیل آچمادی، سطیر سطیر سؤز آغلادی
اوفوق دا قانلی بیر قایا سسین سالیردی دونیایا
قانین ییغیب اوووج اوووج سپیردی اولدوزا آیا
بو درده شعری چن باسیب قلم اؤزون آتیب چایا
بوغولدو غملی بیر گئجه واراق واراق ایز آغلادی
قوجاق قوجاق سیزیلتی‌دان دومانلی تبریز آغلادی
ییغیشدی لال ساغیرچالار چایین سسینده گولدولر
بیر آن سطیر سطیر دؤنوب دومانلی شعری سیلدیلر
نه دیندیلر نه گؤردولر نه یازدیلار نه بیلدیلر؟!
یانیب کول اولدو ال‌لریم چؤکولمه‌ین دیز آغلادی
یاریلدی باغریمین باشی اوجاق اوجاق کؤز آغلادی
من اؤز گؤزومله گؤردوگوم سیخینتی‌دان یازانمادیم
نه دن قارانلیغین اودوندا حسرت‌ایله یانمادیم
بو آغرییا بو نیسگیله اؤزوم ده هئچ اینامادیم
پوزولدو شعریمین باغی خزل خزل گوز آغلادی
یازیمدا سولدو آرزی‌لار ،سارالدی نرگیز آغلادی
یازاندا آل حقیقتی قلم دایاندی آغریدان
واراق کول اولدو بیر گئجه آلیشدی یاندی آغریدان
ایچیمده شعر اوشاق‌لاری قافیل اویاندی آغریدان
سؤکولدو آستاریم دئمه یاواش یاواش اوز آغلادی
یالان یازیمدا گؤینه‌دی داریخمادان دوز آغلادی
