یئنی ائیتیم ایلینده ۸۰-۷۰ مین موعلیم چاتمازلیغی ایله باغلی خبردارلیق ائدیلیب
مجلیسین ائیتیم و آراشدیرما کمیسیونونون رئیسی علیرضا منادی سفیدان ۱۴۰۳-جی ایل مهر آییندا یئنی درس ایلینین باشیندا ۷۰-۸۰ مین موعلیم چاتیشمازلیغینی‌نین اولدوغونو اعلان ائدیب.
بازار گونو، ۳۱ تیر گونو ایلنا خبر آژانسینا موصاحیبه وئرن منادی سفیدان اؤتن ائیتیم ایلینده موعلیم چاتیشمازلیغی پروبلئمینی حاققیندا دانیشیب و دئییب: کئچن ایل ۱۵ آبان‌دا بیزده هله ده موعلیم چاتیشمازلیغی وار ایدی. بیزه چوخ قارشی چیخان اولدو آنجاق بو مسئله‌نی حل ائتتیک.
او، آرتیریب کی، یئنی ائیتیم ایلی عرفه‌‌سینده بو پروبلئمی حل ائتمک اوچون جمهورباشقانی کفیلی محمد مخبره مکتوب یازیب و بو مکتوبو ایران ایسلام جمهورییتی‌نین گله‌جک جمهورباشقانی مسعود پزشکیانا دا گؤندره‌جک،“سونرا هئچ کیم دئمه‌سین کی، سن بیزه موعلیمین اولمادیغینی دئمه‌دین.
بو آچیقلامالار مجلیس آراشدیرمالار مرکزی‌نین رئیسی بابک نگاهداری‌نین ۱۰ تیرده اعلان ائتدیگی بیر واختدا ائدیلیر کی، راپورلارا گؤره، ۱۴۰۳ مهر آییندا تخمیناً ۷۲ مین موعلیم امکلیلیگه چیخاجاق.
نگاهداری‌نین فیکرینجه، بو، ائیتیم ناظرلیگی‌نین کادر ساغلاماسینی چتین‌لشدیره‌جک.
نتیجه‌لری ۱۴۰۲-جی ایلین آذر آییندا یاییلان آراشدیرمایا گؤره، اؤلکه‌نین ائیتیم سیستمی “کیفیت، عدالت و قانونیلیک بؤحرانی”ندان اذيت چکیر و ایداره‌چیلیک یاناشمالاری بو ساحه‌‌‌ده ثمره‌‌‌سیزلیگه و کرونیک پروبلئملره یول آچیب.
#ایران_خبرلری #موعلیم_چاتیشمازلیغی
