تورک امک فعالی شریفه محمدی‌یه قارشی اعدام حؤكمو چیخاریلیب
رشت شهری‌نین لاکان حبس‌خاناسیندا محبوس اولان تورک امک فعالی شریفه محمدی رشت اینقیلاب محکمه‌‌سی‌نین بیرینجی شؤبه‌سی طرفیندن بغی (سلاحلی عصیان) اتهامی ایله اعداما محکوم ائدیلیب.
ایران ایشچیلری‌نین آزاد بیرلیگی‌نین وئردیگی بیلگیلره گؤره، خانیم محمدی رشت اینقیلاب محکمه‌‌سی‌نین حاکمی احمد درویش گفتارین باشچیلیق ائتدیگی بیرینجی شؤبه‌سی طرفیندن سیاسی تشکیلاتلا ایله‌تیشیم یولو ایله سلاحلی عصیان ائتمکده اتهام اولوناراق اعدام جزاسینا محکوم ائدیلیب. جوما آخشامی، ۱۴ تیر ۱۴۰۳-ده بو امک فعالی‌نین حیات یولداشی سیروس فتحی بو حؤکمدن خبردار ائدیلیب.
۱۹ خرداددا رشت اینقیلاب محکمه‌‌سی‌نین بیرینجی شؤبه‌سینده شریفه محمدی‌نین اتهاملاری اوزره محکمه ایجلاسی، ایران ایسلام جمهورییتیته قارشی تبلیغات آپارماق، میلی گوونلیگه قارشی فعالیت گؤسترمک و سیاسی تشکیلاتلا ایله‌تیشیم یاراتماقلا سلاحلی عصیان اتهاملاری ایره‌لی سوروله‌رک کئچیریلیب.
شریفه محمدی‌نین حیات یولداشی سیروس فتحی ۱۴ آذر ۱۴۰۲-ده شریفه خانیم محکمه‌‌سینی کئچیردیکدن سونرا حبس ائدیلمیش و ۳۱ خرداد گونو مووقتی اولاراق آزادلیغا بوراخیلمیشدیر.
۱۴ آذر ۱۴۰۲-ده شریفه محمدی اطلاعات ایداره‌سی‌نین مامورلاری طرفیندن شخصی ائوینده حبس ائدیلیب. خانیم محمدی همین ایل ۹ دی گونو رشت‌ده‌کی لاکان حبس‌خاناسیندان سنندج حبس‌خاناسینا کؤچورولوب. نهایت، بیر مدت سونرا بو تکراردان لاکان حبس‌خاناسینا قایتاریلدی.
#آذربایجان_خبرلری #شریفه_محمدی
