اورمیه‌ده مهر شمس آفرید قادین سیغینما ائوی باغلانیب
باتی آذربایجانین اورمیه شهرینده مهر شمس آفرید قئیری-دؤولت سیغینما ائوی ۹ اردیبهشت ۱۴۰۳-جو ایلده باتی آذربایجان ایالتی‌نین ریفاه تشکیلاتی طرفیندن باغلانیب.
باتی آذربایجانین اورمیه شهریندن اولان قادین حوقوقلاری ساوونوجوسو و مهر شمس آفرید سیغینما ائوی‌نین یارادیجیسی فاتیما باباخانی شخصی اینستاگرام صفحه‌‌‌سینده یازیب: “جانیمیزدان داها عزیز اولان مهر شمس آفرید قئیری-حؤکومت سیغینما ائوی اؤنجه‌دن خبردارلیق ائدیلمه‌دن و یا رسمی یازیلی مکتوب اولمادان، تضییق و مجبوریت تطبیق ائدیله‌رک باغلاندی.”
فاتیما باباخانی بیر گون اؤنجه مهر شمس آفرید سیغینما ائوی‌نین خاریجی تضییقلره گؤره (اِحتیمال کی، گوونلیک اورقانلاری طرفیندن) باغلانا بیله‌جه‌یینی آچیقلادی و شرق شبکه‌سینه موصاحیبه‌سینده دئدی کی، تضییقلر ایکی-اوچ ایلدیر واردیر و گئتدیکجه شدتلندی، آنجاق سون بیر ایلده پیس بیر دوروم یاشاندی. ایالت ریفاه تشکیلاتی‌نین باش مودیری اوزون مدت اؤنجه قورومو و سیغینما ائوی باغلاماقلا هده‌له‌میشدی.
مهر شمس آفرید قئیری-حؤکومت انستیتوسو ۱۳۹۹-جو ایلدن قادین و اوشاق ساحه‌‌‌سینده تدقیقاتچیلارین و مدنی فعاللارین چابالاری ایله فاتیما باباخانی طرفیندن یارادیلمیشدیر. بو مرکز لازیمی ایجازه‌لری آلدیقدان سونرا شدته معروض قالان قادین و اوشاقلاری دستکلنمه‌سی اوچون قئیری-دؤولت سیغینما ائوی یاراتمیشدیر.
