حقیقتی ایدئولوژییه اوستون توتان قادین ✍️سئویل سلیمانی
مژگان صیامی‌نین تورک دیلینده یازیب یاراتدیغی و یا تورکجه‌یه چئویردییی اثرلر نه قدر اهمیتلی اولسا دا، اونون ساده‌جه تورکجه یازماسیندان سؤز آچماق، دوشونجه‌سی و دوشونجه‌سی‌نین یولوندا بیر قادین اولاراق وئردییی مجادیله‌لر سببی ایله یاشادیغی چتینلیک‌لری تمامی ایله یانسیتمیر. صیامی هم یازیردی،هم ده سیاسی عرصه‌ده دیره‌نن بیر قادین ایدی. حتی اونون سیاسی آکتلاری دا ساده‌جه دیرهنیش دئییل، هم ده بیر قادین عصیانی ایدی.یاخین شرقده قادین انقلابی‌نین سیمگه‌لریندن ساییلا بیله‌جک صیامی، تک باشینا حاکمیّتین و کولتورون آتاأرکیل‌لییی قارشیسیندا دایانماغی باشارمیشدی.
صیامی ۱۳۹۶-جی ایلین اردیبهشت آییندا، «دینین سیاستدن آیریلماسی» و «آنا دیلینده تحصیل حاققی» شعارلاری ایله ایرانین ۱۲-جی جمهور باشقانلیغی سئچکی‌لرینده آدای اولماق ایسته‌میشدی.ایران اسلام جمهوریتی‌نین کیملیگی بو ایکی حاقّی یوخ سایماقلا بیرلیکده قادینلارین جمهور باشقانی آدایی اولا بیلمه‌مه‌سی کیمی بیر چوخ باشقا عدالتسیزلیک اوزرینده قورولوب قورونور. بو گئرچه‌یه واقیف اولان صیامی، آدای اولدوقدان سونرا باشینا گله‌جکلری طبیعی اولاراق آچیق آیدین بیلیردی. آمّا بیر قادین اولاراق، عصیانی اونو بو یولا استقامت‌لندیرمیشدی. دئمک صیامی گوجون آتاأرکیل ساحه‌سینه و «دیانتیمیز سیاستیمیزله عینی‌دیر» دئین مذهبی طبقه‌نین یاساق دایره‌لرینه آیاق باسمیشدی.
یازیچی صیامی‌نین قلمی آنجاق جمعیت آراسیندا یاشانان گئرچکلری یانسیدیردی. او، «روسپی آدلی کیشی‌لر» حکایه توپلوسوندا ایران خالقی‌نین گونده‌لیک حیاتینی بیر قادین گؤزوندن روایت ائتمیشدیر. بیر باشقا اثری، «نیسوان بندی‌نین قوربانلیقلاری» آدلی حکایه توپلوسوندا تورکلوک و قادینلیق یولوندا وئردییی مجادیله‌لرله زینداندا یاشادیغی عذاب-اذیت‌لری آنلاتمیشدیر و ایستر آدی چکیلن حکایه توپلولاریندا، ایسترسه ده باشقا یازیلاریندا، یاراتدیغی گوجلو صحنه‌لر اطرافیندا یاشانانلاری عکس ائتدیره بیلمیشدیر.عینی زاماندا قورخماز قلمی ایله و یوخسوللارین حیاتیندان سئچدییی ملموس سوژه‌لرله مختلیف طبقه‌لرین دردلرینه و حیاتلارینا توخونان بیر یازیچی اولموشدور.
تأسوفلر اولسون کی، مژگان صیامی گؤردویو ایشلره و وئردییی امکلره باخمایاراق، بیر قادین اولدوغو اوچون یاشادیغی سورجده اوز توپلوموندا گؤرونه بیلمه‌دی. بونون بیر اؤرنه‌یی آیلارجا تکلیفی بللی اولمادان اردبیل زندانیندا قالدیغی زامان خبرلرین توجه مرکزینده اولماماسیدیر.دیگر طرفدن، بیر تورک قادین اولدوغو اوچون دیگر طرفدن، بیر تورک قادین اولدوغو اوچون ده توتولما و زندان خبرلری مرکز مدیالاریندا یئترینجه یازیلمادی.
صیامی ساده‌جه بیر تورک و ساده‌جه بیر قادین اولاراق دئییل، بیر تورک قادین اولاراق یاشادی و گئتدی…
