سوسن نواده‌رضی آنما مراسمیندن گزارش حاضرلایان: افسون_سلطانی
جمعه‌آخشامێ بایرام آیێ‌نین ۱۷.سی تبریزلی یازێچی، شاعر، فوْلکلورچو و ژورنالیست، سوسن خانێم نوادهٔ‌رضی‌نین بیرینجی ایل دؤنۆم آنما مراسمی گئچیریلدی. بایرام و اوْروجلوق گۆنلرینه قاریشماسێن دییه، بو دڲرلی انسانێن آنما مراسمی و خاطره گۆنو، وفاتێ‌نین ایل دؤنۆمونه بیر هفته قالمێش جمعه‌آخشامێ بایرام آیێ‌نین اوْن‌یئددی‌سینده، شهریمیزین شاعیر، یازێچی، ادیب و هنر سئور انسانلارێ‌نین حضوری ایله کئچیریلدی.
دوْغال قایناقلار هفته‌سی و آغاج اکیمی گۆنو مناسبتینه گؤره بوگۆن سحر، منطقه۲ شهرداریسی‌نین تشبثی ایله خانم سوسن نوادهٔ‌رضی و شهریمیزین یۆزدن آرتێق باشقا ادیب، موسیقی‌چی و هنرمند شخصیتلری‌نین آدێنا آغاجلار اکیلدی.
بو تؤره‌نده کی تبریزین رجایی‌شهر منطقه‌سی‌نین «بهاران» پارکیندا باش وئردی، تبریزین آدلیم ادبی، هنری شخصیت‌لری اشتراک ائتمیشدیلر. مراسم دکتر «میکاییل نظری» جنابلارێ‌نین صحبتلریله باشلاندێ. سوْنرا «خسرو سرتیپی» جنابلارێ شاعیرلر طرفیندن و «هاشم چاووشی»جنابلارێ هنرمندلرین نماینده‌سی اوْلاراق دانێشدیلار.
ای باد صبا گذار قیل تبریزه
عالمده قالێب اۆمیدیمیز بیر سیزه
اوْل ماه‌وشین کویینه دۆشسه گذرین
بو نامه‌نی وئر او زلف عنبربیزه
آردێندان سؤز منطقه۲ شهرداری‌سی طرفیندن مراسمده اشتراک ائدن دکتر «خوش نیّت»ه وئریلدی. خوش نیّت جنابلارێ شهردارین طرفیندن، حضورو اوْلانلاردان تشکّر ائیله‌دی و شهرین فرهنگی‌نین اعتلاسی اۆچون، شهرداری و هنرمندلرین ایش‌بیرلیڲی‌نین چوْخ اؤنملی اوْلدوغونو وورغولادی.
سؤزلرین سوْنوندا یاشێل چئوره مدیرلیڲیندن تقدیر اوْلونوب، هنرمندلرین طرفیندن رضا سرابی اقدم جنابلارێ‌نین ال ایشلریندن، ارک و گؤڲ مسجد ماکتی شهرداری نماینده‌لرینه سونولدو.
بو صحبتلردن سوْنرا پلاکلار هنرمندلرین آراسێندا پایلانێلدی و اوْلاردان آغاجلاری اکدیکدن سوْنرا آدلارێنا یازێلمیش پلاکلاری آغاجلارا باغلاماقلارێ ایسته‌نیلدی.
بو مراسمده «مهد تمدن» گۆنده‌لیڲی‌نین سوسن خانێم نواده رضی‌نین وفاتی‌نین ایل دؤنۆمو اۆچون حاضرلانان اؤزل سایێسی، اشتراک ائدنلر آراسێندا پایلانێلدی.
سوسن خانیمین بیرینجی ایل‌دؤنۆم تؤره‌نی آخشام ساعت دؤرد عرفه‌لرینده شاه‌گؤلۆنون «اندیشه» تالارێندا کئچیریلدی. مراسم ایکی بؤلۆمدن عبارت ایدی. ایلک بؤلۆمونده سوسن خانیمین شعر و نثر یازێلاری، حکایه‌لر و یاشام طرزی مجلیسده اوْلان ضیالیلار طرفیندن اینجه‌لنیب دڲرلندیریلدی.
بو بؤلۆمده دانێشانلار آذربایجانلی یازار خانم رقیه کبیری، گؤرکملی فیلسوف و دۆشونور جناب ایواز طاها، نقد ادبی ساحه‌سینده چالێشان آقای رسول اسماعیلیان، شاعر و ادبیاتچی خانم مرجان منافزاده، اننه‌م‌نن من کتابێ‌نین دؤردۆنجو چاپێ‌نین ائدیتورو آقای علی سلمانی و شهریمیزین بؤیۆک مجموعه‌دار و مجسمه‌دۆزلده‌نی جناب رضا سرابی و مهدتمدن (سانجاق) امک‌داشلارێندان اوْلان آقای مهدی جمالی اوْلدولار. ایلک بؤلۆمون سوْنوندا گۆنش خانیم امانی مهد تمدن گۆننامه‌سی‌نین تورکی بخشی اوْلان «سانجاق»ین تحریریه هئتی عضوو اوْلاراق، کی جناب علیرضا صرافی و جناب میکاییل نظری ایله بیرلیکده مراسمین آپارێجیلیغینی دا عهده‌لنمیشدی، سانجاق صفحه‌سی حقده معلومات وئریب، خانم شبنم توحیدی و سانجاقدا امکی اوْلان باشقا هر کسدن تشکّر ائتدی.
بو مراسیمده اۆلکر خانێم تبریزلی سوسن خانێمین معنوی قێزی اوْلاراق، دویغوسال بیر دانێشیقدان سوْنرا، اننه‌م نن من کتابیندان بیر بؤلۆمونو جلسه‌ده اوْلانلارا اوْخودولار. و فؤاد حسن‌حسین جنابلاری، سوسن خانێمین بؤیۆک اوْغلو قیسسا بیر دانێشیقدا بو بیر ایل مدّتینده اوْنونلا ایشی‌بیرلیک و اۆرک‌بیرلیک ائدن هر کسدن تشکر ائیله‌دی.
بو مراسیمده دانێشیب اشتراک ائدنلرین بیر چوْخلارێ و البته خانم نواده رضی‌نین درمانی هئیتی‌نین صدرینده اوْلان دکتر «محمد زفیری» جنابلارێنا تقدیرنامه وئریلدی. و جناب سرابی‌نین سون ال ایشی اوْلان عباس‌میرزا تندیسی، زحمتلریندن تقدیر اوْلونسون دییه، دکتر میکاییل نظری‌یه سونولدو.
قیسا بیر آنتراکت آردێندان، ایکینجی بوْلۆم باشلادێ. بو بؤلۆمده ایلک اؤنجه شهریمیزین دڲرلی صنعتکاری خانم سولماز بالایی‌نین استعدادلی طلبه‌لری کُر ماهنیلاری ایفا ائتدیلر. سوْنرا خانم نواده‌رضی‌نین شعرلری‌نین ائشلیڲینده گؤزل موغام موسیقی‌لری ایفا اوْلوندو و بو بؤلۆمه شهریمیزین دڲرلی موغام استادی «حسین ملکی‌زاده» جنابلارێ‌نین طلبه‌سی و موغام مسابقه‌سی‌نین غالبی اوْلان «احد علیزاده» جنابلارێ‌نین گؤزل دشتی موغامیلا سوْن وئردی.
