۸ مارس دونیا قادینلار گونو مناسبتی ایله تورک قادینلار مرکزینین بیاننامه سی
هر ایل مارتین سککیزینده میلیونلارجا قادین و کیشی دونیانین باشاباشیندا بیر یئره توپلاشیب بو گونو عزیزلرلر.
مارتین سککیزینی قادین گونو آدلاندیرماغین ندنی، ۱۸۵۷ اینجی ایلینده نیویورک شهرینده کتان فابریکانین قادین ایشچیلرینین مبارزهسیله باغلیدیر.
ایرمینجی عصرین اوللرینده صنعتی اولکهلرده کی، آغیر و غیر انسانی شرایطله، همچنین آز موزدلا قادین فهلهلری کیشیلرله بیرگه فابریکا و ایش بازارینا داخیل اولموشدولار. بو دوروم اونلاری تشکیلاتلانمیش و منظم شکلده بو عدالتسیزلیگین علیهینه مبارزه آپارماغا سوروتلدی.
بو گونده بوءیوک بیر گئیم پارچا توخوما فابریکانین قادین فهلهلری اقتصادی دوروملاری و ایش شرایطلرینین آغیر و چتینلیگینه اعتراض اولاراق، ایشی تعطیل ائتدیلر.
بو گونون تعطیلینین خاطرهسی بو فهلهلر ده قالیب و بو شرایطه قارشی عمومی ناراضیلیق دوام تاپدی.
میلادی ۱۹۰۸ اینجی ایل مارتین سککیزینده، اللی ایلدن سونرا، نیویورکدا کتان فابریکاسینین پارچا توخوما بولومونون قادین فهلهلری، ایشی تعطیل ائلدیلر.
بو تعطیل مارتین سککیزینده کی قادینلارا قارشی آیری سئچکیلیک ، معاشین آزلیغی و باشقا ظلملره اعتراضلاری خاطیرلاماق اوچون اولموشدو..
بو فابریکانین صاحابی قوروجولارلا بیرگه، تعطیل ائدنلر باشقا فهلهلرله بیر لشمسین و آیری بولوملره یایلماسین دئیه، قادینلاری ایش یئرلرینده حبس ائتدیلر. سونرا بیلینمهین ندنلرله فابریکا اوتلاندی. چوخ آز قادین بو اوتدان نجات تاپدیلار، قالان ۱۲۹ فهله قادین بو اوتدا یاندیلار.
بونا گوءره مارتین سککیزی سنتی شکلده ، قادینلارین عدالتسیزلیگه و ظلمه قارشی مبارزه گونو، آدیلا یادلاردا قالدی.
سونکو ایللرده اوروپا و امریکانین مختلف اوءلکهلرینده ایش سومورگهچیلیغی، معاشین آزلیغی، فشار و آیری سئچگیلیگه اعتراض اوچون قادینلارین مبارزه لری اییلملر و تعطیل ائتمه شکلینده دوام تاپدی.
ایران قادینلاری و مارتین سککیزی کئچمیش اون ایللرده:
۵۷ -انقلابیندان آرتیق ۴۰- ایلدن چوخ کئچیر.
انقلاب دئورینین تاریخیندن قالان سندلر، شکیللر و مدیالار گورسدیر کی قادینلارین اکثریتی بوتون اعتراضلاردا کیشیلرین کناریندا، اونلارلا بیرگه حضورلاری واریدی. بیله گوءزلنیردی بو انقلاب آزادلیق، برابرلیغی بیزه تحفه وئرسین، سیاسی پارتیالار رسمی اولوب هر تورلو استبداد و دیکتاتورلوق مهو اولسون. آنجاق، هله نئچه گون انقلابدان کئچمهمیش یئنی حکومت چوخ سورعتله قادینلارین حاقین تاپدالاماقلا اوءزونون چیرکین و گرچک اوزونو گورستدی.
ایراندا جنسیتیلرینه گوره قادینلارا تحمیل ائدن نابرابرلیک و عدالتسیزلیگه قارشی مبارزه تاریخی، چوخ یئنیشلی یوخوشلو بیر تاریخ اولوبدور.
یخیلیب قالخماق، یورومک ، مقدس سنتلر و دوزولمز کولتورلر دوواریلا اوز به اوز گلنده دایانماق تکرارلانیب.
بو یوز ایللیک اوزون یولاردا، قادینلار اوءز حاقلارینا چاتماق اوچون امکان اولان بوتون یولارا ال آتیبلار:
خیاواندا مدنی اعتراضلار، مدرسه دوزلتمک، تشکیلاتلانماق، تئوریک ایشلر و قزئته و کتاب چیخارتماق،
اوز حاقلارینی تانیمیانلار اوچون یازماق و بیلگیلندیرمک.
باخمایاراق بیر توپلومدا کی چوخ آز فایز دا قادینلار یازیب اوخوماق ساوادلاری واردیر، توپلومو دییشمگه بو چابا ان یاخشی یول دئییل، انجاق تکجه یول و بوءیوک دییشیکلره بیر باشلانیشدی.
یاخلاشیق ایران دا قادین مبارزاتیندان بیر عصر کئچیر، آنجاق هله ده قادینلاریمیز کیشیلرله برابر حاقلارا ال تاپابیلمیبلر.
ایلکین حاقلاری او جوملهدن بوشانماق، پاسپورت آلماق، اوشاقلارینا صاحاب اولماق کیمی حاقلار ارلرینین ایذنی اولمادان هله ده محدودلاشیبدیر.
بوندان بئله کی، سورونلار چوخ و مرکبدیلر، آنجاق بو پرابلئملرین یاخشی آنلاماق و حللی اوچون عمومی چالیشمالار واردیر.
قادینلارین مبارزهلرینده ایستر قرارلاردا یوخسا عملده، شهرلی قادینلار لا کند قادینلارین آراسیندا فرقلر وار.
شهرلر و گلیشمیش یئرلرده یوخاری و یا اورتا سوسیال قاتلاردا اولان قادینلار ، عالی تحصیلات، ایش حاقی، یاشایش محلی سئچیم حاقی، ایدمان تاخیملاردا عضو اولماق و کیشیلرله برابر اَیلنمه ایمکانلاریندان بهرهلنمه حاقی قازانماغا مباریزه آپاریرلار. بیر حالدا کی جامعهنین آشاغا قاتلاریندا اولان و کندلرده یاشایان قادینلار کی ایلکین حاقلاردان محرومدولار، تمیز سو ، ساغلاملیق و درمان ایمکانلاری ائیتیم و یاشاماق حاقینی قازانماغا مجادله ائدیرلر..
همچنین قادین فعاللاری گورمهین و آز دیقت ائدن قونو مرکز و اطرافدا اولان فعاللارین چالشیدیر.
مرکز قادین فعاللاری، غیر فارس قادین ملیتلرینه قوم محور باخیشلاری واردیر و فعاللاری بو قادینلارین اوءزل ایستکلرینی ائشیدنده، همان قوم محور و ناسیونالیستی باخیشلاریلا حاضیر دئییرلر غیر فارس و حاشیه قادینلاری‌لا یول بیر اولسونلار.
دیل وکولتور مسئله‌سی کی غیر فارس میلیتلرین قادین هویتی‌نین بیر بخشیدیر، مرکز فعال فمنیست- ناسیونالیست‌لری‌نین باخیشیندا، ایرانین گله‌جگینه بیر تهدید ساییلیر.
ایرانی ناسیونالیست و مرکز فمنیستلری بیر نقطه‌یه چاتاندا، غیر فارس ملیتلری ایله بیر همجنسلری گورورلر کی، ایراندا اولان پرابلملریله بیرگه اوءزلرینین ده خاص و مرکب سورونلاری واردیر. آما دوشونورلر بیر تهدید اولاراق اونلاری گوءرنمزدن گلمک یاخشیدیر.
تورک کورد بلوچ و … فمنیست فعال‌لار حاشیه ده یاشایان و آزینلیقلارین اوءزل سورونلارینا اوداقلانیرلار. اونلار مرکز و دانیلمیش حاشیه فمنیستلرین اصل سورونلاری‌نین فرقلی اولماقلارینا دامغا ورورلار. مثل اوچون او زامانلار کی مرکز فعاللاری اوءرتوکسوزلوق اوچون مبارزه آپاریرلار، کرد، تورک و بلوچ فمنیست قادینی، اوشاق‌ائولی‌لیگی‌‌نه اوداقلانیرلار.
بئله بیر سورونلاری اورتایا قویماق اونلارا ایستدیکلری کیمی ایران قادینلارینی دونیایا گوءرستمگه یاردیم ائتمه‌ییر.
اونلار دونیادا بئله بیر تصویر یاراتماق ایستیرلر کی گئریجی و قادین ضیدی حکومتین اولماغینا رغماً ایران توپلومو مدرن، اوءنجول وگلیشمیشدیر.
ایراندا مرکز فمنیستلری غیر فارس ملیتلریله قورتولوشلو و ائتگیلی پیمان باغلاماینجا ایراندا آیری‌سئچگیلیک و عدالتسیزلیگه قارشی مباریزه‌نین اوغور قازانماغا شانسی اولمایاجاقدیر.
تورک قادینلار مرکزی
۷ مارس ۲۰۲۴
