بهايي وطنداش حوريه محسني نین ۴ ایللیک حبس جزاسی تصدیق ائدیلیب
رضوی خوراسان تئمییز محکمه‌‌سی‌نین ۴-جو شؤبه‌سی ایلکین محکمه‌نین چیخاردیغی حؤکمه تصدیق ائدرک بهایی وطنداش حوریه محسنی‌‌نی ۴ ایل حبسه محکوم ائدیب.
بو باره‌ده بیلگیلی بیر قایناق ایران‌وایره بیلدیریب: شنبه گونو، ۷ بهمنده حوریه تئمییز محکمه‌‌سی‌نین اوفیسینه گئتدی و تئمییز محکمه‌‌سی‌نین شؤبه نؤمره‌سینی و ساعتینی سوروشماق ایسته‌دی. کاتیب یوخلادیقدان سونرا اونون پرونده‌سی‌نین هله ده اینقیلاب محکمه‌‌سی‌نین ۹۰۳-جو شؤبه‌سینده اولدوغونو و تئمییزه گؤندریلمه‌دیگینی بیلدیردی.
همین شخص داها سونرا بیلدیریب کی، محکمه کاتیبی‌نین دئدیگینه گؤره، نه واخت پرونده تئمییزه گئتسه، ۳ گون سونرا محکمه شؤبه‌سی بللی اولاجاق. آنجاق، ایکی گون سونرا، بازار ائرته‌سی، ۹ بهمن آخشام ساعتلاریندا، حوریه محسنی ثنا سیستمیندن خبر آلدی کی، اونون پرونده‌سینه رضوی خوراسان ایالتی‌نین تئمییز محکمه‌‌سی‌نین ۴-جو شؤبه‌سینده باخیلیب و ایلکین حؤکم تصدیق ائدیلمیشدیر.
قئید ائدک کی، خانیم محسنی‌نین پرونده‌سی‌نین حاکمی هادی منصوری اونون وکیلی‌نین وکیللیگینی قبول ائتمه‌ییب و ایلکین محکمه ایجلاسی وکیلین و تقصیرلندیریلن شخصین ایشتیراکی اولمادان کئچیریلیب.
حاکم منصوری‌نین رهبرلیک ائتدیگی مشهد اینقیلاب محکمه‌‌سی‌نین بیرینجی شؤبه‌سی بو بهایی وطنداشی اؤلکه‌نین گوونلیگینی پوزماق مقصدی ایله بهاییلیگی تبلیغ ائتمک و اجتماعی فعالیت قروپونون عضوو اولدوغو اوچون ۳ ایل حبس جزاسینا محکوم ائتدی و بهاییلیک اوغرونا ایسلام جمهورییتینه قارشی تبلیغات آپاردیغینا گؤره ۱ ایل مدتینه آزادلیقدان محروم اولاراق توپلام ۴ ایل حبس جزاسینا محکوم ائدیلدی.
ایسلام جینایت قانونونون ۱۳۴-جو ماده‌‌سی‌نین تطبیقی ایله بو بهایی وطنداش اوچون ان آغیر جزا، یعنی اوچ ایل حبس جزاسی تطبیق ائدیلیر.
محکمه حؤکمون سببی کیمی حوریه محسنی‌نین مشهد اطرافینداکی کندلردن بیرینده کؤنوللو اولاراق حیاتا کئچیردیگی خیريه‌‌چیلیک فعالیتینی گؤستریب. خانیم محسنی بیر نئچه آیدیر کی، مشهد اطرافینداکی محروم کندلردن بیرینده بیر نئچه اوشاغا ایراندا نشر اولونان کیتابلاردان اوجومله‌دن ریاضیات و دیل اؤیره‌دیر. کند جاماعتی‌نین و اوشاقلارین هئچ بیری‌نین اونون دینی اینانجیندان خبری یوخ ایدی.
#دینی_آزلیقلار #بهایی
