30 مين اؤيرنجي يالنيز انگللی اولماسینا گؤره ائگیتیمدن محرومدور
ایلک اوخول ائیتیمی اوزره ائیتیم ناظرلیگی‌نین معاونی‌نین وئردیگی آچیقلامایا گؤره، ریفاه تشکیلاتی ۳۰ مینه یاخین انگللی اؤیرنجینین اوخوللاردا ائیتیم آلا بیلمه‌یه‌جه‌یینی آچیقلاییب.
ایران مئدیاسی داها اؤنجه ایراندا ان آزی ۲۰۰ مین اؤیرنجینین ائیتیمینی یاریمچیق قویدوغونو آچیقلاسا دا، ائیتیم ناظری‌نین معاونی معصومه نجفی پازوکی بو ایستاتیستیکانی رد ائدیب و بیلدیریب کی، اوخولو یاریمچیق قویانلارین توپلام سایی بو دؤنمده ۱۴۰ میندیر.
بو ائیتیم یئتکیلیسی ایستاتیستیکاداکی بو فرقین سببینی وطنداشلیق قئیدیات سیستمینده‌کی چاتیشمازلیقلارلا باغلی اولدوغونو ساووندو. او آرتیریب کی، بعضی اؤیرنجیلر کؤچ، بعضیلری اؤلوم، بعضیلری ایسه اؤزل انگللیلیک سببیندن ائیتیملرینی داوام ائتدیره بیلمه‌ییبلر. بونونلا بئله، ائیتیم ناظری‌نین معاونی انگللی اؤیرنجیلرین درسه گئتمه‌مه‌سی‌نین سببلرینی آچیقلاماییب.
بو سؤزلر ایسلام جمهورییتی‌نین ۱۳-جو حؤکومتی طرفیندن ۱۴۰۲-جی ایل بودجه‌سینده انگللیلر قانونونون بودجه‌سینی آرادان قالدیریلماسی انگللیلر اوچون بیر چوخ پروبلئملره سبب اولدوغو حالدا دئییلیب. اؤتن گونلرده انگللی وطنداشلارین عائله‌‌‌لری اونلارین ایستکلرینه باخیلمادیغی اوچون بیر نئچه دفعه اعتراض آکسییاسی کئچیریبلر.
بو وطنداشلارین عائله‌‌‌سی‌نین ان اؤنملی ایستگی ایسه “انگللیلرین حوقوقلاری‌نین ساوونماسی حاقیندا” قانونون ۲۷-جی ماده‌‌سی‌نین آلتی ایلدن سونرا حیاتا کئچیریلمه‌سیدیر. بو ماده آغیر و چوخ آغیر انگللیلره ایللیک مینیموم امک حاقی مبلغینده یاشاییش خرجی اؤده‌نیلمه‌سینه اساسلانیر.
#ایران_خبرلری #اوشاق_حوقوقلاری
