يازيچي ليق قابليتيمي ، آنا ديليمه دؤندوکده کشف ائتديم- رقیه کبیری
خوش‌خبر روزنامه‌سینده چاپ اولموش مصاحیبه:
اونجه گوجلو يازاريميز خانيم رقيه کبيري دن بيزيم له بو مصاحيبه اوچون وقت آييرديقلارينا گوره درين تشککور و ميننتدار ليغميزي بيلديريپ بيلسينه اوغورلار آرزولاييريق
رقيه کبيري آرتيق ادبيات، رومان و صياحتنامه يازماق صاحه‌سينده تانينميش بيري‌دير ، بيزيم اوخوجولارا اوزونوزو يئنيدن تانيتديرماق اوچون نه جواب وئره‌ردينيز؟
آلتميش ياشلي، ادبيات و اوخويوب- يازماق دوشگونلويو اولان بير انسانام، دئيه بيلرم.
يازيب، ياراتماق دونياسينا نئجه ماراقلي اولدوز؟ يازيب-ياراتماق نئجه باشلاندي و نجور گليشدي سيزده؟
هر انسانين يازيب-ياراتماق قابليتي اولدوغونا اينانيرام، انسان بو قابليتيني تانيييب، اؤزونه اينانديغي گون و يورولمادان چاليشماقلا پئشه‌کار بير يازيچي‌ليغا ساري آدديم آتا بيلر دئيه، دوشونورم. آنجاق بيزيم اؤلکه‌ده رسمي صورتده مکتب و درس‌ليک کتاب اولمادان آنا ديلينده يازماغا باشلاماق ايسته‌دييينده بيراز فرقلي احوالات ياشاييرسان، آنا ديليني مکتب‌‌سيز، کيتاب‌سيز اؤيرنيب، يازيرکن صاحيب اولدوغون وارليقلارينلا نه قدر بيگانه اولدوغونو باشا دوشورسن. من صاحيبت اولدوغوم وارليقلاريملا بيگانه اولدوغومو بير چيله گئجه‌سي شن‌ليينده باشا دوشدوم. مندن شعر اوخوماغيمي ايسته‌ديلر، منسه بير فارسجا شعر اوخودوم. سونرا قوناقلاردان بيري دئدي: «ايندي اؤز ديليميزده بير شعر اوخو!»
آزما-چوخ معجز، شهريار و حافظ غزل‌لرينين تورکجه‌سيني اوخوماغي باجارسايديم دا، او گونه کيمي تورکجه يازماق عاغليما بئله گلمه‌ميشدي. اؤز ديليميزده يازماغي باشارميرام دئديييم آن سانکي کهف يوخوسوندان آييلميش کيمي اولدوم. ائرته‌سي گون بيرينجي ايشيم بهزاد بهزادي‌نين فارسجا-تورکجه سؤزلوک کيتابيني آلماق اولدو.
قاباقجالار فارسجا جيزما-قارالامالار، آشاغي سويه‌ده شعرلر و حيکايه‌لر يازديغيما باخماياراق آناديليمده يازاماغا باشلاديقدان سونرا 43 ايل عرضينده دانيشديغيم ديلين ظرفيت‌لريله تانيش اولوب، گيزلي قالميش بير خزينه‌ني کشف ائتميش کيمي هيجانلانيرديم. قاباقجا بير نئچه فارسجا حيکايه‌‌‌‌م سايت‌لارين بيرينده و آرديندان بير حيکايه و ايکي مقاله‌م ديلماج درگيسينده چاپ اولسا دا، من هر زامان حيکايه‌لريمين چاپ مبدأني «آفتاب آذربايجان» درگيسينده چاپ اولموش تورکجه حيکايه‌لريم نظرده توتورام. او حيکايه‌لر نحو و نگارش باخيميندان سورونلو اولسا دا، منيم اؤزگوونلييمي آرتيريب، آنا ديليمده يازماغي داها آرتيق جدي توتدوم. دئمک اولار يازيچي‌ليق قابليتيمي کشف ائتدييمين سببي آنا ديليمه دؤنمک اولدو.
من بيلديغيم قدري سيزين ياراديجيليق صاحه‌نيز گئنيش بير آلاني قاپسايير؛ ان آزي بئش صاحه‌ني آد آپارماق اولار، سوسيال قونولاردا يازيلار خصوصا قادينلار حاقيندا قيسا حيکايه‌لر، صياحتنامه‌لر، شعرلر و اوشاق ادبياتي، ندن بو قدر گئنيش؟
اينديه کيمي ندنينه فيکيرلشمه‌ميشم. سوسيال قونولارلا باغلي يازديغيم يازيلار «آياق اوستو يازيلار» آدلي آندا يازديغيم يازيلاردان عيبارتدي و بو يازيلاري تاکسي‌ده، بازاردا، چؤرک صفينده بئله يازميش‌ليغيم اولوب. قادينين اجتماعي- سياسي جايگاهي هر هانسي بير اؤلکه‌نين قانونلارينين نئجه‌ليييني اؤلچمک اوچون بير محک داشي کمي‌دير. بيزيم اؤلکه‌نين شرايطينده قادينلار گونده‌ليک مسئله‌لرله باغلي دوشونجه‌لريني متن و يا اينجه‌صنعتين باشقا ژانرلاريندا پايلاشماقلا مستقل بير فکري کيمليک قازانا بيلرلر و بو حرکت آتاارکيل دوشونجه‌نين اتوريته‌سيندن قورتولماق اوچون اؤنملي بير آدديم‌دير. قادين‌لارين دوشونجه‌لريله باغلي ان قيسا يازيلاري بئله قيمت‌لي‌دير دئيه دوشونورم.
اوشاق ادبياتي چوخ مسئوليت‌لي بير ژانردي، من بو ژانردا پئشه‌کار بير يازيچي دئيلم، ساده‌جه نسيم خانيم صادق برنجي‌نين رسام‌ليغي ايله بير کتاب چاپ ائتميشم.
شاعير اولدوغوم‌لا باغلي هئچ بير ادعام يوخدور، شعر يازسام دا، ايللردير فايليمدا قالير و پايلاشميرام. صياحتنامه، رومان و حيکايه ژانرلارينين بيربيرينه بنزرلييي اولدوغونو دوشونورم، آنجاق صياحتنامه‌ده گؤروب، گؤتوردوک‌لرين، جغرافيا، تاريخ، معماري و کولتورل اؤزل‌ليک‌‌لري حاقدا يازماقلا ياناشي گؤردوک‌لرينله باغلي شخصي تأويل‌لريني ده يازيرسان، اوسته‌ليک رومان و حيکايه‌نين عکسينه صياحتنامه عموميتده سفر تاريخيني نظرده توتاراق خطي بير روايت کيمي يازيلير. رومانا گلينجه، رومان ژانري اؤنجه‌دن معين اولموش بير طرح اساسيندا، حيکايه‌ايسه هم اؤنجه‌دن معين اولموش طرح يا مضمون اساسيندا هم ده بير آندا يارانيب، يازيلا بيلن بير يازي ژانري‌دير و تخيل دئييلن عنصر بو ژانرلارين اؤنملي عنصرلريندن ساييلير.
بوتون بو آچيقلامالاردان مقصديم فعاليت آلانيمين چوخ دا گئنيش اولماديغيني و صياحتنامه ايله رومان بير عايله‌نين ايکي فرقلي اولادي کيمي اولدوغونو قيد ائتمک ايسته‌ديم.
بو صاحه‌لرين هر هانسي بير توالي نظم‌لري وار مي؟ يعني زامان اولاراق بيريندن بيرينه گئتمک کيمي.
قيد ائتدييم توالي وارسا ندن‌لريني آچيقلايا بيلرسينيز مي؟
سيزين دوشوندويوز کيمي اثرلريمي هر هانسي بير نظم اساسيندا يازماميشام. سفرده توپلاديغيم عکس‌لر و يازديغيم آنليق يازيلاري پازل کيمي بيربيرينين کنارينا دوزوب، نهايتده صياحتنامه کتابي کيمي چاپ ائتميشم. رومان و حيکايه‌يه گلينجه، رومان مضمونو بير آندا عاغليما گلسه ده، يازماغا باشلاماميش طرحيني يازيب، باشلانيش، سون و اورتادا اوز وئره‌جک حاديثه‌لري اؤزومه معلوم ائلرم. بونونلا بئله يازي پروسه‌سينده چوخ شئ‌لر دييشه بيلر، آما بعضي حيکايه‌لر بير آندا ذهنيمده يارانيب، او آني ايتيرمه‌دن يازاماغا باشلايارام. مثال اوچون گونلرين بيرينده پئشه‌کار بير تبريزلي عکاسين «فرزندان فاقد هويت» آدلي عکس مجموعه‌سينه باخيرديم، بو عکس‌لرين ايکيسي منه او قدر تاثير ائله‌دي کي، او آن ذهنيمده «امارات چوخ اوزاقدي؟» آدلي بير حيکايه ياراندي، زاماني ايتيرمه‌دن گئجه سحره کيمي اوتوروب، حيکايه‌ني بير باشا يازديم.
صياحتنامه صاحه‌سينده قلم چالماق و سفر گوروشلريني پايلاشماق ان قديم يازي فرمتلريندن اولسا بئله بيزيم چاغداش ادبياتيميزدا يئري بوش گورونوردو، شخصا سيزين بو صاحه‌يه گيرمه‌نيز منيم اوچون چوخ ماراقليدير، صياحتنامه يازماغين فيکري هاردان باشلاندي؟ سفرين احوالات و دويغولاريني پايلاشماق نئجه حيسدير؟
عموميتده سفره گئتدييمده گؤردوکلريمي عکس قاليبيندا ثبت ائتمک و آنليق يازيلار يازماق عادتيم‌دير. 30 ايل‌ليک چاليشمادان سونرا امک‌لي‌ليکدن دولايي منه وئريلن پول ايله چين، اورتا‌آسيانين بعضي اؤلکه‌لري، يونان و ايتاليا کيمي تاريخي يئرلري گزمک هدف‌لريمدن بيري ايدي. آنجاق اؤلکه‌ميزين اقتصادي وضعيتي يالنيز چين و اؤزبکستان اؤلکه‌لرينه سفر ائتمه يه امکان وئردي و ياريمچيليق قالميش بير چوخ ديله‌ييم کيمي سفر ايله باغلي ديلک‌لريم ده ياريمچيليق قالدي. صياحتنامه يازماق فيکري توريست کيمي اوغلوملا بيرليکده چين اؤلکه‌سينه(پکن شهرينه)گئمه‌ميش باشلاندي. تورکيه‌دن «رولان بارت» يازديغي «چين يولچولوغو دفترلري» آدلي بير کتاب آلميشديم. بارتبو اثرينده متندن علاوه فرقلي نيشانه‌لرله، مثلا قاش-گؤزسوز بير آدام رسمي، يا باشيندا آغاج بيتتميش بير اوغلان و يا بير قادين آياغي کيمي رسم‌لرله روايتيني ايره‌لي سوردورموشدو. اونون سفر روايت‌لريني اوخويورکن من ده صياحتنامه يازا بيلرم کيمي بير فيکير عاغليما گلميشدي، همان ايللرده شيوا فرهمند راد «چه مي‌دانم» آدلي وبلاگيندا نيوزيلند صياحتنامه‌سيني بؤلوم- بؤلوم پايلاشيردي من ايسه اونون ثابيت اوخوجولاريندان ايديم. او جاذبه‌لي يازيلاري اوخويورکن صياحتنامه يازماغا قطعي قرار وئرديم. چين پارادوکس‌لارلا دولو، سياسي باخيمدان سوسياليست، اقتصادي باخيمدان کاپيتاليزم دوشونجه‌لريله اداره اولونان بير اؤلکه اولدوغونا گؤره گؤرمک ايسته‌ديييم اؤلکه‌لردن ساييليردي. خصوصا تيان‌آن‌من مئيدانيندا اوز وئرن حادثه‌لره گؤره او مئيداني ياخيندان گؤروب، دانشجولارين مقاومت ائتدييي مکاندا آدديملاييب، دويغولاريمي قلمه آلماغا چوخ ماراقلي ايديم.
سفر احوالاتي و دويغولاريني پايلاشماق حاقيندا دئمه‌لييم کي رومانين عکسينه صياحتنامه‌ده يازيچي حقيقي بير شخص کيمي بوتون مکانلاردا، حادثه‌لرده حاضير اولان اؤنملي بير عنصردي و بيلرکدن حياتي‌نين بير بؤلومونو اوخوجويا گؤستريب، تجربه و دويغولاريندان اوخوجويا دا پاي وئرمه‌يه چاليشير، نئجه کي قديمدن دئييبلر: وصف‌العيش، نصف‌العيش
آنجاق رومان يازيليرکن يازي پروسه‌سي يالنيز و يالينز يازيچي‌يا عاييد اولان بير پروسه‌دير. منجه هئچ بير يازيچي بو پروسه‌ده ياشاديغي دويغولاري پايلاشماق ايستمز. چونکي بو پروسه يازيچينين تاي‌سيز و معنوي ثروتي ساييلير و اوخوجو ياراديجيليق پروسه‌سيندن خبري اولمادان، روماندا يارانميش بير دونيايلا قارشيلاشير.
يئري گلميش کن هانسي صياحتنامه‌لري بيه‌نيرسيز؟ ( البته باشقالار يازان منظوروم دي )
دئديييم کيمي صياحتنامه اوخوماق باشقا بير انسانين ذوق و تجربه‌لريله اشتراک ائتمک کيمي‌دير منسه اسکي و چاغداش صياحتنامه‌لري اوخوماغا ماراقلي اولان بير انسانام. آنا ديليميزده يازيلميش، حامد احمدي‌نين «تاپيلماق اوچون ايتمک» آدلي صياحتنامه‌سيني چوخ بينميشم. بو صياحتنامه‌ده آل احمدين ايزي گؤرونسه ده، بعضي تجربه‌لر و باخيش‌لار حامداحمدي‌نين دونيا گؤروشونه مخصوص بير باخيشدير.
گلک رومان و قيسا حيکايه لره، سيز اوچون رومان و قيسا حيکايه نه دئمکدير؟ مثال اوچون، گونجل، اجتماعي ( سوسيال ) و… مسئله لري طرح ائتمک اوچون بير مئديا (واسيطه) دير، يوخسا اؤزلوگونده سيزه بير ذاتي ديري وار ؟
حيکايه و رومان، هر بيري اؤزونه مخصوص ييغجام و گئنيش دونيالاردان عيبارتدي و بو دونيالار ساده‌جه يازماقلا يارانير. يازماق ايسه منيم اوچون بير پروسه‌دير، بو پروسه‌ده رئال حياتدا ياشانميش‌لار، ياشانا بيله‌جک‌لر و ياشانماز حادثه‌لر اوز وئرير و بو حاديثه‌لرين ايچينده سوسيال مسئله‌لر ده يئر آلا بيلر، آنجاق يازيچي بير سوسيال ايشچي (اجتماعي مددکار) کيمي اؤزل بير وظيفه‌ني عهده‌لنمير، ياراتديغي دونيالاردا ساده‌جه يول-يؤندم گؤستره بيلر دئيه دوشونورم.
رومان و حيکايه‌لرينيز سايي اولاراق چوخلوق قازانير ، سيزجه رقيه کبيري بير رومان يازيچي‌سي‌دير يوخسا شاعير يا صياحتنامه يازاري‌دير؟
رمان، حيکايه و صياحتنامه بير عايله‌نين بيربيريندن فرقلي اوولادلاري اولدوغونا گؤره من ده ساده‌جه بير يازيچي اولدوغومو دوشونورم.
دئيه بيلرسينيز بير رومان نئجه يارانير؟ يعني بير اجتماعي معضل رمان يازماغا سبب اولور يوخسا باشقا جور يارانير؟
بو حاقدا يازيچي‌لارين بيربيريندن فرقلي تجربه‌لري وار. اؤز تجربه‌لريم حاقيندا دانيشماق ايسته‌سم، دئيه بيلرم هر بير رمانيمين فرقلي يارانماق سبب‌لري اولوب. مثلا بيرينجي رمانيم، «ائويم» رماني آلتميشينجي ايللرده زنداندا ياشاديغيم آجي تجربه اساسيندا يارانيب. 2011-جي ايلده ناسا طرفيندن کيوراسيتي آدلي بير تدقيقاتچي ماشينين مريخه گؤندريلمه‌سي «يئردن اوجا تورپاق» کيمي علمي-تخيلي رمانيمين يارانماسينا سبب اولدو. مهاجرت و انسانلارين مهاجرتينه سبب اولان حادثه‌لر هر زامان منيم ان اؤنملي قايغيلاريمدان اولوب، «قوشلار داها قورخمورلار» و «دوشرگه» رمانلارينين اساس مضمونو مهاجرت و مهاجرته سبب اولان حادثه‌لردير. «دوشرگه» رمانيندا بو گونوموزده ياشاديغيميز غيرسياسي مهاجرت سبب‌لرينه توخونسام دا، «قوشلار داها قورخمورلار» رمانيندا اؤلکه‌نين ايکي اؤنملي تاريخي بسترينده، 25-1324 و 1357 انقلابيندان سونراکي مهاجرت مسئله‌سينه توخونموشام. آجليق باراتاسي رماني‌نين يارانماسينين سببي «آش تؤکن» قبرستاني حاقيندا ائشيتديييم بير روايت اولموشدو. «مرّ آغاجي‌نين کهربا گؤزلري» رماني‌نين يارانماق سببي ايسه سوسيال شبکه لرده گؤردويوم بير اعدام صحنه‌سي ايدي، آز سونرا جرثقيلدن آسيلاجاق شخص باشيني اعدام مأمورونون چيينينه قويوب، آغلاييردي. شکيلي گؤردويوم آن اوغورلوقدان دولايي اعدام اولونان شخص اوچون متاثر اولسام دا، عاغليم قالدي اعدام مأمورونون چيينينده، دئديم گؤره‌سن بوندان سونرا کيم باشيني او چييينه قوياجاق؟ مأمورون آناسي؟ حيات يولداشي؟ يوخسا اوولادلاري؟ او چييين اوزون مدت مندن ال چکمه‌دي و نهايتده «مرّ آغاجي‌نين کهربا گؤزلري» رماني‌نين سرهنگ کاراکتري ياراندي.
هانسي صاحه‌ني داها چوخ بيه‌نيرسيز و او صاحه‌ده يازاندا تورکوسو کنديزي – کندينيزه داها ياخين و راحات حيس ائديرسيز؟
يازماق پروسه‌سي ان چوخ دوشگون اولدوغوم صاحه‌دير، اصلينده بو پروسه چوخ کشمکشلي بير صاحه‌دير، گئجه‌لر يوخولاريوي باشيندان اوچوردا بيلر، گوندوزلر بير آغاج‌دلن کيمي بئينيوي ديمديکله‌يه بيلر، بعضي کاراکترلر سولوک (زَلي- زالو) کيمي حياتيوين بوتون عرصه‌لرينه ياپيشيب، دقتيوي نرمال حياتيندان آلا بيلر، بونونلا بئله من بو پروسه‌نين دوشگونويم. ويليام فاکنر نوبل اؤدولونو آليرکن بو کشمکشلي صاحه‌يه روح ترلمه‌سي کيمي بير عنوان وئريب. اؤز ديليميزه سوموک سينديرماق دا دئمک اولار بو تاي‌سيز و کشمکشلي صاحه‌يه. يئري گلميشکن آرتيرمالييام يازماق پروسه‌سينده من اؤزومدن، اطرافيمدان قوپوب، بوتونلوکله ياراتديغيم دونيادا ياشاييرام.
بو گونکو ادبياتيميزي نئجه گورورسوز؟ يازي پوزولار ( شعر، رومان ….) سيزي قانع ائدير مي؟ هر هانسي بير اوره ک سوزونوز وارمي ؟
بير نئچه شاعيرين اثرلريندن باشقا عموميتده بو گونوموزده يازيلان شعرلرين بير چوخ ساييسي (من اوخودوغوم شعرلر حاقيندا دانيشيرام) بيربيرينين اوزريندن کپيه‌لنميش کيمي شعرلردي. نثر ايسه تورکجه يازماغا ماراق گوسترنلرين ساييسي گونوگوندن آرتير و بو آذربايجان ادبياتي اوچون اومود قايناغي‌دير. گله‌جکده گونوموزدن داها آرتيق ساوادلي و گؤرکملي يازيچي‌لار، اؤزل‌ليکله قادين يازيچي‌لارين عرصه‌يه گله‌جک‌لرينه اومودوم وار.
سيزين اکثر يازيلاريز آذربايجان تورکجه‌سينده يازيلميش، آنا ديلينده يازيب ياراتماغين هانسي شيرينليکلري وار ؟
ساده‌جه آنا ديلي‌نين شيرين‌ليينه گؤره دئييل، مدنيت و ديل عدالت‌سيزليغي اولان بير اؤلکه‌ده آنا ديلينده يازماق بيزيم اوچون بير ضرورت‌دير يوخسا ايستر-ايسته‌مز باشقا ديلين دونياسينا تبعيد اولونوب، اؤزلويوموزدن بيگانه‌لشمه يه محکوم اولمالييق. براهني کيمي آنا ديليميزي ايچيميزده ساخلاييب، ساغالماز بير يارايا چئوريلمه سيني ايسته‌ميريک‌سه، علم، ادبيات، فلسفه و…بوتون صاحه‌لرده آناديليميزده اثرلر ياراتمالييق دئيه دوشونورم
اوخوجو اتمسفريني نئجه گورورسوز، بو قدر زحمت، هزينه و مشققتله بير کيتاب چاپدان چيخير سورا نئجه قارشيلانير ؟
عموميتله آشپزي، فال، انگيزشي کتابلار و کنکور کتابلاريندان ساوايي کتاب بازاري کساددير. هاندا قالسين خلاقه ادبيات صاحه‌سينده، اؤزو ده آنا ديلينده يازيلميش اثرلر اولسون. شخصا بوتون آخساقليقلار و چتين‌ليکلره باخماياراق يئنه ده يازماقدا اصرارلييام.
ياخين گله‌جکده هانسي اثر يا اثرلري سيزدن گؤره‌جه‌ييک؟
چوخ ياخيندا «آذربايجان روزنامه‌لرينده معاصر طب» آدلي اثريم نشر اولوناجاق. بو اثر، انجمن (اوچ دوره) آذربايجان (1320ش.) و آذربايجان( 25-1324ش.) قزئت‌لرينده معاصر طب ايله باغلي يازيلميش مقاله‌لره شاميل اولور. مقاله‌لر هم اورجينال اولاراق قزئتدن کسيليب، هم ده تايپ ائديليب. و ايکي ايلدي اوزرينده ايشله‌ديييم مشروطه خانيم رماني‌نين سون فصل‌لريني يازماقدايام.
اينديه دک الده ائتديگينيز نائلييتلر و جايزه لردن دانيشماق ايستردينيزمي؟
منجه اوخوجولار کيتابيمي آلماق اوچون صفده دايانان گون منيم اوغور قازانديغيم گونودور، آنجاق بئله حاديثه‌لر يوخو کيمي‌دير، حتي بو آرزونو ديله گتيريرکن بئله بير گونو خيال ائتمکده عاجيزله‌ييرم.
ادبي اؤدول‌لر يازيچي اوچون تشويق قايناغي اولسا دا، گله‌جکده يازاجاق اثرلري اؤنجه‌کي اثريندن داها ياخشي اولماسي اوچون، يازيچينين اوزرينه مسئوليت يوکله‌يير. اوسته ليک بو اؤدول‌لر مسابيقه طرفيندن معين اولونموش عنصرلردن باشقا ژوري هئيتي‌نين دونيا گؤروشو و سليقه‌سي اساسيندا سئچيلير دئيه دوشونورم و يازيچينين اساس اؤدولو قيد ائتديييم کيمي اوخوجو طرفيندن وئريلمه‌ليدير.
آلديغيم بيرينجي ادبي اؤدول «ماوايل» آدلي حيکايه اوچون آذربايجان جمهوريتي اؤلکه‌سيندن اولوب، 2016 و 2018 ايل‌لرينده تورکيه‌نين کاشغارلي محمود اؤدولونون ايران قولوندا «آگورادا يانديرين مني» و «گؤيرچين قيزلار» حيکايه‌لري اوچونجو يئري قازانيب، کئچن ايل بوتون اثرلريمه گؤره استراليادا ياشايان آذربايجانلي‌لارين قوردوغو «وارليق» درنه‌يي‌نين بيرينجي ادبي اؤدولونه لاييق گؤرونموشدوم و آلديغيم سون اؤدول مهرگان ادب جايزه‌سي طرفيندن «مرّ آغاجي‌نين کهربا گؤزلري» رماني‌نين فارسجا ترجمه‌سينه وئريلميش اؤدول اولوب. يئري گلميشکن بو رماني تورکجه‌دن فارسجايا ترجمه ائديب، «چشمان کهربايي درخت مرّ» آديندا تهرانين نشانه نشرياتيندا چاپ ائدن مرحوم حمزه فراهتي‌يه بير داها منتدارليغيمي بيلديرمک ايسترم.
*
و منه مصاحيبه زامان تانيديغي اوچون خوش‌خبر قزئتي‌نين سوروملو مديري و بوتون امکداشلارينا تشککورلريمي بيلديريرم.
