200 مدنی فعالین آزربایجانلی محبوسلارا دستک آچیقلاماسی
۲۰۰ نفره یاخین مدنی فعال، ژورنالیست، یازیچی و کئچمیش سیاسی محبوس بیرگه آچیقلاما یایاراق، حبسلرین یئنی مرحله‌‌‌سی‌نین باشلانماسینا و آذربایجانلی مدنی فعاللارا قارشی تضییقلرین گوجلنمه‌سینه اعتراض ائده‌رک، ایسلام جمهورییتی‌نین محکمه و گوونلیک قوروملاریندان بو محبوسلارا قارشی قانونسوز داورانیشلارینا سون قویماغی ایسته‌ییبلر.
بیر نوسخه‌سی ایران‌وایره گؤندریلن بو آچیقلامایا گؤره، بو آچیقلامانی ایمضالایان ۱۹۶ مدنی فعال وطنداشلارا قارشی حبسی پیس‌له‌مک ایله یاناشی، بو فعالارا قارشی تضییقلر و حبسلری “دالغانین باشلانغیجی” آدلاندیریبلار و یازیبلار: “بو آرادا، ناراحاتلیقلاری آرتیران، ایندییه قدر نادیر حاللاردا موشاهیده ائتدیگیمیز حبس ائدن قوروملارین قئیری-عادی داورانیشیدیر.”
بو آچیقلامانی ایمضالایانلار داها سونرا “حبسی تؤردن قوروملارین قئیری-عادی و قانونسوز داورانیشی” ایله باغلی ناراحاتلیقلارینی ایضاح ائدیب و یازیبلار: حبس اولونانلارین اوزون مدتلی ساخلانماسی و مووقتی ساخلانما مدتی‌نین بیر نئچه دفعه اوزادیلماسی، تجرید‌خانادان عائله‌‌‌لرینه تلفون دانیشیغینا محدودیتلر و قاداغالار قویولوب کی، اونلارین بیر چوخونون عائله‌‌‌لری ایله ایله‌تیشیم قورماق و اونلارا بیلگی وئرمک ایمکانی اولماییب. بیر حالدا، سون آندا گیروو وئریلمه‌سینه باخمایاراق، مرتض نور محمدی نادارلی‌نین آزاد ائدیلمه‌سی‌نین قارشیسی آلینیب. بو آرادا بو محبوسلارین عائله‌‌‌لری‌نین دفعه‌‌لرله موراجعتلرینه و بو قانونسوز سورجلره اعتراض ائتمه‌لرینه باخمایاراق، محکمه اورقانلاری مسوولیتدن یایینیر و بو جور تضییقلرین اونلارا قارشی اعتراف آلینماسی اوچون تطبیق اولوناجاغیندان قورخولار وار.
بو آچیقلامانین باشقا بیر حیصه‌‌‌سینده “آرمیتا پاویر” و “رویا ذاکری”نین حبسیندن بحث ائدیلیب و آرمیتا پاویرین تبریز زیندانیندا حبس ائدیلمه‌سی و آجلیق آکسییاسی کئچیرمه‌سیندن سونرا رویا ذاکری‌نین رازی روحی خسته‌خاناسینا کؤچورولمه‌سی ایله باغلی ناراحاتلیقلار ایفاده اولونوب.
بو آچیقلامانین بیر نوسخه‌سی ده پتیشن کیمی خالقا تقدیم ائدیلیب کی، بوتون وطنداشلار اؤز ایمضالارینی آرتیراراق حبسده اولان مدنی فعاللارا دستک آچیقلاماسنا قوشولا بیلسینلر.
۱۴۰۲-جی ایلین شهریوریندن و قادین، حیات، آزادلیق اعتراضلاری‌نین ایل‌دؤنومو ایله عینی واختدا موختلیف شهرلرده اونلارلا آذربایجان وطنداشی حبس ائدیلیب و یا آغیر حبسلره محکوم ائدیلیب. بو طی این مدت «آرمیتا پاویر»، «رویا ذاکری»، «مرتضی نورمحمدی»، «داوود شیری»، «علی بابایی»، «امیرحسین آقایی»، «محمدرضا موحد»، «آزار ابراهیم‌زاده»، «جواد سودبر»، «مهرداد قادری»، «حسین آزادی»، «ابراهیم عوض‌زاده»، «صابر حسین‌زاده»، «ناصر رزمجو»، «آیت (یوروش) مهرعلی‌بیگلو»، «حامد یگانه‌پور» و… ۱۴۰۲-جی ایلین شهریور-آبان آیلاریندا، تهران، تبریز، صوفیان و گرگر شهرلرینده حبس ائدیلیب. بو وطنداشلارین هامیسی حبس اولوندوقدان سونرا تبریزه کؤچورولوب و حبسیندن هفته‌لر کئچمه‌سینه باخمایاراق، هله ده تبریز اطلاعات ایداره‌سی‌نین تجرید‌خاناسیندا و یا بو شهرین مرکزی حبس‌خاناسیندا بلیرسیز دورومدا قالیبلار.
#آذربایجان_خبرلری #سیاسی_محبوسلار
