وین ژورنالیستلیک اؤدولو عالیه مطلب‌زاده یه وئریلیب
وین قادین ژورنالیستیکلر درنگی قادینلارین مئدیا شبکه‌سی بؤلومونده اؤز اؤدولونو ایراندا مئدیا آزادلیغینی ساوونما بیرلیگی‌نین معاونی، فوتوقرافچی، ژورنالیست عالیه مطلب‌زاده‌یه وئریب.
آناسی آدینا عالیه مطلب‌زاده‌نین قیزی غزاله عبدالهی بو ائتکینلیگه قاتیلیب، بو بیرلیگین اؤدولونو آلارکن خانیم مطلب‌زاده‌نین تاماشاچیلارا مکتوبونو اوخویوب.
خانیم مطلب‌زاده بو مکتوبدا یازیب: دئمک لازیمدیر؛ ساغ قالماق اوچون دیکتاتورون خالقین قلبینده قورخو یاراتماقدان داها چوخ آلته احتیاجی وار؛ او، آنجاق قئید-شرطسیز تعریف و قورخو آشیلاماقلا ساغ قالیر. چاغداش دونیانین دیکتاتورلاری‌نین خالق آراسیندا توهم یاراتمادان، قورخویا دوشموش آزغین طرفدارلاری‌نین خورالاری اولمادان هئچ بیر یولو یوخدور. بو دا اونلارین ایشلری‌نین سونودور.
بو اؤدول بو ایرانلی قادین حوقوقلاری ساوونوجوسو، فوتوقرافچی و بلگه‌سل یؤنتمنی عالیه مطلب‌زاده‌نین پئشه‌کار فعالیتی و اینسان حوقوقلارینا حؤرمت ائتمک مقصدیله وئریلیب. اؤدول اتریش “قادینلار مئدیا شبکه‌سی”نین قادین ژورنالیستلره ژورنالیستلیک اؤدولونون وئریلمه‌سینده جینسیت و آیری-سئچکیلیک ایله موباریزه گیریشیمینه وئریلیر.
بو مراسیمده خانیم مطلب‌زاده‌نین قیزی ایله یاناشی، تانینمیش ایران-اتریش ژورنالیستی سولماز خرسند ده چیخیش ائدیب. خانیم خرسند، عالیه مطلب‌زاده‌نین ایرانین نوفوذلو ژورناللاریندا، او جومله‌‌‌دن ایران فردا، نامه و قادین و ایران مطبوعات فوتوقرافچیلار بیرلیگی‌نین ایداره هئیتی و ایراندا مئدیا آزادلیغینی ساوونما بیرلیگی‌نین معاونی‌نین پئشه تاریخینه توخوناراق اونو بو اؤدوله لاییق گؤروب.
خانیم خرسند بو چیخیشیندا اؤز پئشه بورجونو یئرینه یئتیردیکلرینه گؤره حبسده اولان باشقا حبسده ژورنالیستلر، او جومله‌‌‌دن نیلوفر حامدی، الهه محمدی و نازیلا معروفیانی خاطیرلادیب.
اتریش قادین مئدیا شبکه‌سی ایراندا قادین مئدیا اوزمانلارینا دستک و دایانیشما مقصدیله بو اؤدولو عالیه مطلب‌زاده‌یه وئردیگینی آچیقلاییب. غزل عبداللهی بو اؤدولو آناسی‌نین یوخلوغوندا آلیب.
#عومومی_اعتراضلار #عالیه_مطلب‌زاده
