سپیده قلیان‌ین ۲ ایل حبس جزاسی تمییز محکمه‌سینده تصدیقله‌نیب
تئمییز محکمه‌‌سی اوین حبس‌خاناسیندا حبسده اولان مدنی فعال سپیده قلیانا وئریلن ایکی ایل حبس جزاسینی تصدیقله‌ییب.
سپیده قلیان‌ین قارداشی مهدی قلیان چارشنبه آخشامی، ۲۰ تیرده اینستاگرام صفحه‌‌‌سینده بو خبری آچیقلاییب و باجیسی‌نین “اوین حبس‌خاناسی‌نین قاپیسیندا شوعارلار سسلندیردیگینه و اون ثانیه‌‌لیک ویدئویا گؤره” حبس اولوندوغونو یازیب.
سپیده قلیان‌ین کئچن ایل ۲۴ اسفندده و حبسدن چیخدیقدان بیر نئچه ساعت سونرا زهاک خامنه‌ای، سنی توپراغین آلتیندا قویاجاییق شوعارینی سسلندیردیگینه گؤره زوراکیلیقلا حبس ائدیلمیش و اینقیلاب محکمه‌‌سی‌نین ۲۶-جی شؤبه‌سی طرفیندن داها ۲ ایل حبس جزاسینا محکوم ائدیلمیشدی.
“ایکی ایل عاغیللی تلفوندان ایستیفاده‌یه قاداغا قویولماسی، ایکی ایل تهراندا و قونشو ایالتلردن اوزاقدا یاشاماق، ایکی ایل اجتماعی-سیاسی قروپلارا عضو اولماق قاداغاسیسپیده قلیانا وئریلن و تئمسسز محکمه‌سینده تصدیقلنن باشقا جزالار سیراسیندادیر.
سپیده قلیان ایلک دفعه ۱۳۹۷-جی ایلین آبان آییندا هفت‌تپه ایشچی اعتراضلاری زامانی و بو اعتراضلاری دستکله‌دیگینه گؤره حبس ائدیلیب و توپلام ۱۹ ایل ۶ آی حبس جزاسینا محکوم ائدیلیب.
بو مدنی فعال قرچک زیندانینداکی حبسی‌نین بیر حیصه‌‌‌سیندن سونرا بوشهر زیندانینا سورگون ائدیلمیش و ۱۴۰۰-جو ایلین مرداد آییندا مرخصی‌یه چیخمیش، لاکین ایکی آی سونرا یئنیدن گوونلیک گوجلری طرفیندن اهوازدا باجیسی‌نین ائوینده توتولاراق، عینی ایلین آبانیندا داوام ائتدیرمک اوچون حبس ائدیلمیش، ائوین حبس‌خاناسی‌نین قادینلار شؤبه‌سینه کؤچورولموشدور.
“ایران‌وایر” بو ایل ۱۱ تیرده خبر وئرمیشدی کی، سپیده قلیان ایران ایسلام جمهورییتی‌نین رادیو و تلویزیونونون ژورنالیستی آمنه‌سادات ذبیح‌پورون شیکایتی ایله ۲۸ تیرده تهرانین جینایت محکمه‌‌لریندن بیرینده موحاکیمه اولوناجاق.
سپیده قلیان اوین حبس‌خاناسیندان مئساژ درج ائده‌رک، آمنه‌سادات ذبیح‌پورون شیکایتی اوچون یئنی محکمه‌‌یه گلمه‌یه‌جه‌یینی بیلدیریب.
#عومومی_اعتراضلار #محبوسلار
