رشتده قادینلارین اعدام جمهوریتینه اؤلوم شوعاری ایله اعتراض یوروشو
چارشنبه آخشامی گونو خردادین بیرینده، رشتده بیر سیرا قادین اعتراض آکسییاسینا باشلاییب و ایسلام جمهورییتی رژیمینی “اعدام حؤکومتی” آدلاندیریبلار.
بو یوروشدن یاییلان ویدئولاردا “اعدام رئژیمینه اؤلوم” و “اعدام جمهورییتی‌نین آرتیق نفسی یوخدور، اعدام، حبس‌خانا، ایشگنجه آرتیق ائتکیسیزدیر” شوعارلاری سسله‌نیر.
دونن رشتین لاکانی کوچه‌سینده اعتراضچیلار آیریجا توپلومو ایسلام جمهورییتی‌نین باسقی و اعدام سیاستینه قارشی اجتماعی اعتراضا چاغیریب و شوعارلار سسلندیریبلر: “بیزیم سوسقونلوغوموز خیانتدیر، جینایته اورتاقلیقدیر”
۱۴۰۱-جی ایل شهریور و مهر آیلاریندا ایراندا عومومی اعتراضلارین پیک گونلرینده رشت شهری حؤکومته قارشی کوتلوی اعتراضلارین شاهیدی اولدو و بو اعتراضلاردا بیر سیرا وطنداشلار حؤکومت گوجلری‌نین گولـله‌لری ایله حیاتینی ایتیردی.
رشتده دونن کئچیریلن اعتراض آکسییالاری اصفهان ائوی آدلانان پرونده اوزره اوچ موتهیمین اعدامینا قارشی اؤنجه‌کی گونلرده کئچیریلن اعتراضلارین داوامی ایدی.
اؤتن جوما و شنبه گونو تهران، اصفهان، مشهد و سویوق بولاق دا داخیل اولماقلا ایرانین بیر نئچه شهری اعتراضچیلارین کوچه‌لره قاییتماسی‌نین و ایسلام جمهورییتی حؤکومتینه قارشی شوعارلار سسلندیرمه‌سی‌نین شاهیدی اولوب.
ایرانین بیر سیرا بیلیم‌یوردلاریندا، او جومله‌‌‌دن بهشتی بیلیم‌یوردو، زنجان بیلیم‌یوردو و تهرانین تربیت مدرس بیلیم‌یوردو گرگین گوونلیک اورتامینا باخمایاراق، سون بیر نئچه گونده ایران حؤکومتی‌نین اعدام سیاستینه قارشی اؤیرنجی میتینقلری کئچیریلیب.
#عومومی_اعتراضلار #قادینلار
