«سحر_خیاوی» یوخسوللوغون سسی اولماز
یوخسوللوغون سسی اولماز قاداسی
ائشیدیلمز یوخسوللارین صداسی
قیریش اولار ائرکن دوشَر اوزونه
حالقا ووروب سورمه چَکَر گوزونه
سیگار- سیگار آلیشارسان فیکیردن
گوره‌ن اولماز بوروق- بوروق توستونو
گاه قیزدیریب، اوشودَرسن نَکیردن
بیر اَدیال‌لا چکن اولماز اوستونو
یوخسوللوغون سسی اولماز قاداسی
پینه- پینه اَللرینده سیزلایار
آرزولارین اوره‌یینده چورویوب
نوبار ایکن شاخاسیندا بوزلایار
گاه بویلانار حسرت دولو گوزونده
گاه گؤرونر پوزغون، غملی اوزونده
آغیز آچار شالوارینین دیزینده
یوخسوللوغون سسی اولماز قاداسی
بوش الینده اوتانج اولار ترله‌یَر
شیمشک کیمی اوره‌یینده گورله‌یَر
آتا اولار خجالتدن چرله‌یَر
یوخسوللوغون سسی اولماز قاداسی
بایرام چاغی گئییننده اوشاقلار
یوخسول اوشاق دیزلرینی قوجاقلار
دؤزگینن ده، دؤزه بیلسن بو چاغلار
یوخسوللوغون سسی اولماز قاداسی
دابانیندا چارتلاق سالیب قانایار
آغلار سنله صوبحه کیمی کور فانار
ائشیتمزسه حاکیم، سنی کیم قانار؟!
یوخسوللوغون سسی اولماز قاداسی
بو کوچه‌نین آج ایت‌لری سیرداشین
زیبیل‌‌لیکده پیشیک‌لر دیر یولداشین
والایلیرسان، ایچمه‌دن ایتمیش باشین
یوخسوللوغون سسی اولماز قاداسی
یاشام دئییل ذرره- ذرره اؤلومدور
بؤیله یاشام اینسانلیغا ظولومدور
قالخ آیاغا حاق سسینی بیلیندیر
یوخسوللوغون سسی اولماز قاداسی
آل حاققینی بو تورپاقدان، بو سودان
دای گیزلنمه، چیخ قارانلیق پوسودان
یالنیز اینان سؤکوله‌جک بیر ده دان
یوخسوللوغون سسی اولماز قاداسی
آلین‌یازی، قیسمت، بوشدور، عبث دیر
آلداتما دیر، اویدورما دیر، قفس دیر
آییلماغین سنه یئنی نفس دیر
یوخسوللوغون سسی اولماز قاداسی
