ابراهیم ساوالان: قیش گئتدی و اوزو قارالیق کؤموره قالدی
اود و سو، بایرام و آخیر چرشنبه دبلری‌نین اساس فاکتورلاریندان حساب اولورلار. چرشنبه و بایرام سحرینده، کند اهلی سودان آتیلماق اوچون آرخ و بولاق باشینا گئدیرلر، ائوه قاییداندا، اوردان بیر کوزه سو گتیریب، هامییا او سودان وئریرلر. شهرلرده بو دب اوچون اؤزل چایلار و نوولار واردیر. تبریز مارالان محله‌سینین ایندیکی فدک میدانی، کئچمیشده «نوو اوستو» آدلانیردی و هله ده اورمو و اردبیلده «نوو اوستو» مراسیملری چوخ گئنیش شکیلده کئچیریلیر و سودان آتیلماق، سویو قایچیلاماق، سویو سوپورمک، سویا باشماق آتماق کیمی دبلر بو مراسیمده گؤزه چارپیر.
ملیکان‌ین آغ‌مینار کندینده، خالق آراسیندا مقدس ساییلان بیر بولاق واردیر. بینار، مینار یا پینار دیلیمیزده بولاق آنلامیندادیر. آغ‌مینار سؤزوندن بللی اولدوغو کیمی، او کند گؤزل و شهرتلی بیر بولاغین کناریندا یئرلشمیشدیر. بو بولاغین سویو یئددی گؤزه‌دن چیخیب، سونرا بیر- بیرینه قاریشیر. خالق او بولاغا مقدس اوجاق کیمی یاناشیب، بعضن اونا نذیرلر وئریر. بعضی ادعالارا گؤره، ایمام موسانین نسلیندن اولان بیر شخص او بولاغین یانیندا کی تپه‌ده دفن اولموش و اورانین قوتساللیغی اونونلا ایلگیلی‌دیر، بیر حالدا کی خالق او تپه‌نی، بولاغا منسوب ائدرک آل‌بولاق تپه‌سی آدلاندیریر و کندین آدی دا او بولاقلا ایلگیلی‌دیر و بونلارین هامیسی، سویون و او بولاغین قوتساللیغی‌نی تصدیق ائدیر.
عجب‌شیر آدلانان قالاچای ماحالی و دیزه شهری‌نین اهالیسی، آخیر چرشنبه آخشامی چای کنارینا گئدیب، نیّت ائتدیکدن سونرا کرمه، جویز یا دا کاغاذی بالاجا قاییقلار کیمی دوزلدیب، ایچینه شمع یا اود قویوب اونلاری سویا بوراخیرلار. اونلارا گؤره، گمیسی چوخ یول گئدیب، اودو گئج سؤنن آدام نیّت‌ینه چاتاجاقدیر. بو دب سولدوزدا و قوشاچایین نووروزلو کندینده ده واردیر و اونلار جویز قابیغینا پامبیق قویوب یاندیریب، سویا بوراخیرلار و آخیر چرشنبه گئجه‌سی، چایلار و سورلار، بالاجا- بالاجا اودلو گمیلرله دولاراق، چوخ گؤزل منظره‌لر یارادیرلار.
البته کی بیزه حاکیم اولان اؤزگه‌لر، بیر دفعه ده شهرلریمیزین اود یاندیرما و نوو اوستو مراسیملرینده اشتراک ائتمه‌ییبلر. اونلار بو گؤزل دبلری رئکلام ائتمه‌ییب چوخلو گیزلتمه‌یه چالیشیرلار، آما کسینلیکله شوشانین چرشنبه اوجاغینی یئنی‌دن یاندیران خالق، بو دبلری‌ده یئنی‌دن جانلاندیراجاقلار.
قیش گئتدی و اوزو قارالیق کؤموره قالدی. بو قیشلاردان داها داها بؤیوک قیشلار گئده‌جک و اوزو قارالیق ائله کؤمورلره قالاجاق.
بو مثلده کؤموردن منظور، دار و سویوق گونلرده خالقا یانماییب، اونا سیتم ائدنلردیر. اؤرنک اولاراق کئچن گونلرده ایکی تبریزلی یازار حایاتا گؤز یومودو: بیری سوسن نواده رضی، باشقاسی سیدجواد طباطبایی. بیری اؤز دوغما دیلینده یازیب یاراتدی و سونوندا تبریز اونو اؤز مهریبان قوجاغیندا تورپاغا تاپشیردی. باشقاسی خالقیندان اوز دؤندریب، حاکیملرین قولو اولوب، اؤز دوغما دیلینه بالتالار ووردو و نهایت اوزو قارالیق اؤزونه قالدی و تبریز اونون اؤلومونده قارا گئیمه‌دی.
تورپاغینا صادیق قالان آدام، یانار آما کول اولماز. گونو گوندن کؤزه دؤنوب آلیشدیرار بو اوجاغی. آما تورپاغا آرخا چئویره‌نین جسدی ده تورپاغا نصیب اولمادی و اودلاییب کوله دؤندردیلر او کؤله‌نی.
قیش گئتدی، اوزو قارالیق کؤموره قالدی. ایشیغا اینانلار قارانلیقدا قالمادیلار و یازا چیخدیلار. بؤیوک بایراملار اومودونا، سیزین بو تازه بایرامیز موبارک.
