كانادا ۱۲ اینقیلاب کئشیکچیلری و پولیس کوماندیرینه سانکسییا تطبیق ائدیب

کانادانین خاریجی ایشلر ناظری خانم جولی خالق اعتراضلاری‌نین یاتیریلماسی نه‌دنی ایله ایران ایسلام جمهورییتی‌نین داها ۱۲ یوکسک وظیفه‌‌‌لی یئتکیلیسینه اینسان حوقوقلاری‌نین کوبود و سیستماتیک شکیلده پوزولماسیندا ایشتیراک ائتدیکلرینه گؤره سانکسییا تطبیق ائتدیگینی آچیقلاییب.

بو ۱۲ نفر ایرانین باتی ایالتلرینده اینقیلاب کئشیکچیلری و پولیس قوه‌لری‌نین یوکسک سويه‌‌لی کوماندیرلریدیر.

گلوبال نیوزون بازار ائرته‌سی، ۸ اسفندده وئردیگی خبره گؤره، کانادانین خاریجی ایشلر ناظری بیلدیریب کی، بو شخصلرین مولکلری کانادادا بلوکلانیب و اونلارین بو اؤلکه‌یه سیاحتینه ایجازه وئریلمه‌یه‌جک.

خانیم جولی دئییب کی، ایران حؤکومتی خالقین اساس حوقوق و آزادلیقلارینی وحشیجه‌سینه سیخیشدیرماقدا و اینکار ائتمکده داوام ائدیر. بیز ایران خالقی‌نین طلبلرینی دینله‌ییریک و اونلارین جسارتینه و عزمینه حئیرانیق.

کوردوستان والیسی اسماعیل زارعی کوشا، سنندج بسیج کوماندیری مرتضی میر آقایی، اینقیلاب کئشیکچیلری‌نین کوردسوتان بیت‌المقدس گوجلری‌نین کوماندیری صادق حسینی و باتی آذربایجان پولیسی‌نین کوماندیری رحیم جهانبخش سون زامانلار سانکسییایا معروض قالانلار آراسیندادیر.

#عومومی_اعتراضلار #سانکسییا