اولوسلارآراسی عفو اؤرگوتو ان آزی ۱۴ اعتراضچی‌نین اعدام ریسکی ایله باغلی خبردارلیق ائدیب
۱۸ بهمن ۱۴۰۱-جی ایل چارشنبه آخشامی اولوسلارآراسی عفو اؤرگوتو چئشیدلی شهرلرده حبس و عدالتسیز موحاکیمه اولونان ان آزی ۱۴ اعتراضچی‌نین جدی اعدام تهلوکه‌‌‌سی ایله اوزلشدیگی باره‌ده خبردارلیق ائدیب.
بو اولوسلارآراسی اینسان حاقلاری اؤرگوتونون فیکرینجه، ایسلام جمهورییتی حاکیميتی محبوسلارین “عدالتلی موحاکیمه”دن ایستیفاده ائتمک حوقوقلارینی پوزوب.
اولوسلارآراسی عفو اؤرگوتو وورغولاییب کی، ایسلام جمهورییتی‌نین گوونلیک و محکمه اورقانلاری اونلاردان ان آزی ۱۰ نفره آغیر “ایشگنجه وئریب” و اونلاری اعتراف ائتمه‌یه مجبور ائتمک اوچون “شاللاق، الکتریک شوکو، اؤلومله هده‌له‌مه، جینسی تجاووز” داخیل اولماقلا قئیری-اینسانی پیس رفتارا معروض قویوب.
بو اولوسلارآراسی اینسان حاقلاری اؤرگوتو جدی اعدام تهلوکه‌‌‌سی ایله اوزلشن اعتراضچیلاری «عرشیا تکدستان»، «جواد روحی»، «ابراهیم نارویی»، «کامبیز خروت»، «مجید کاظمی»، «منوچهر مهمان‌نواز»، «منصور دهمرده»، «مهدی بهمن»، «محمد بروغنی»، «مهدی محمدی‌فرد»، «محمد قبادلو»، «صالح میرهاشمی»، «سعید یعقوبی» و «شعیب میربلوچ‌زهی ریگی» اولاراق اعلان ائدیب.
ایراندا کئچیریلن عومومی اعتراضلارلا باغلی ایسلام جمهورییتی ایندییه‌دک «محسن شکاری»، «مجیدرضا رهنورد»، «محمد حسینی» و «محمدمهدی کرمی» آدلی دؤرد اعتراضچینی اعدام ائدیب. بو دؤرد نفره حؤکم چیخاریلیرکن سئچیلمیش وکیلله گؤروشمک و عدالتلی موحاکیمه ائتمکدن محروم ائدیلیب.
اولوسلارآراسی عفو اؤرگوتونون آچیقلاماسیندا عالی محکمه طرفیندن اعدام حؤکملری لغو ائدیلن و پرونده‌سی محکمه‌‌یه گؤندریلن «سهند نورمحمدزاده»، «حمید قره حسنلو»، «حسین محمدی»، «رضا آریا» و «ماهان صدرات مدنی»نین پرونده‌سیندن ده بحث ائدیلیر.
اولوسلارآراسی اینسان حاقلاری اؤرگوتون بو آچیقلاماا محکمه سیستمی‌نین رئیسی غلامحسین محسنی اژه‌ای‌دن سون اعتراضلارلا باغلی بوتون اعدام حؤکملرینی لغو ائتمیی ایسته‌ییب.
بو حوقوق ساوونما تشکیلاتی محکمه حاکیميتی‌نین باشچیسیندان حبسده اولان اعتراضچیلارین اولوسلارآراسی استاندارتلار اساسیندا عدالتلی محکمه آراشدیرماسی حوقوقونا مالیک اولاجاغینا تأمینات وئرمه‌سینی ایسته‌ییب.
بیرلشمیش ملتلر تشکیلاتی‌نین اینسان حاقلاری اوزره عالی کومیسساری ولکر تورک داها اؤنجه اعتراضچیلارین اعدام ائدیلمه‌سی ایله باغلی دئمیشدی: ایران حؤکومتی‌نین نومایشچیلری جزالاندیرماق اوچون جینایت تعقیبیندن بیر آلت کیمی ایستیفاده ائتمه‌سی حؤکومتین قتللرینه بیر نومونه‌دیر.
#عومومی_اعتراضلار #اعدام
