آستياژ حقیقی و امیرمحمد احمدی، تهرانین آزادی مئیدانیندا رقص ائدن ویدئونو درج ائتمک جینایتینه گؤره هر بیری ۱۰ ایل یاریم مدتینه حبسه محکوم ائدیلیب.

بو ایکی بلاگر بو ایل ۱۰ آباندا حبس ائدیله‌رک اؤز ائولرینده شخصی گئییملیلر طرفیندن دؤیوله‌رک اطلاعات ناظرلیگی‌نین ۲۰۹-جو بندینه آپاریلیب.

آلینان بیلگیلره گؤره، بو ایکیسی‌نین عائله‌‌‌سی ۱۰ آباندا حبس اولوندوقدان سونرا گوولیک گوجلری تضییقی آلتیندا سوسماغا مجبور اولوب.

بو گنج جوتلویون محکمه‌‌سی حاکم صلواتی‌نین باشقانلیغی ایله ۱۵-جی شؤبه‌ده کئچیریلیب و اونلار “فساد و فاحیشه‌‌‌لیگه تشویق، میلی گوونلگی پوزماق مقصدی ایله توپلاشماق و رئژیمه قارشی تبلیغات فعالیتی آپارماق” اتهاملاری ایله موحاکیمه‌‌ اولونوبلار.

محکمه‌‌ حبسله یاناشی، بو بلاگرلره سانال اورتام ایستیفاده‌سینه ایکی ایل قاداغا و اؤلکه‌دن چیخیشا دا ایکی ایل قاداغا قویموش.

یاییلان بیلگیلره گؤره، آستياژ حقیقی محکمه‌‌ده حاکم صلواتی طرفیندن هده‌له‌نیب و تحقیر ائدیلیب.

محکمه‌‌ آستياژ حقیقی و امیرمحمد احمدی‌نین گیروو قارشیلیغیندا سربست بوراخیلماسیندان ایمتینا ائدیب و اونلارین محکمه‌‌ده وکیللری اولماق حوقوقوندان محروم ائدیلیب.
#عومومی_اعتراضلار