۱۶ یاشلی بلوچ قیزا ۶ آیلیق حبس جزاسی وئریلیب
۱۶ یاشلی بلوچ قیز ۶ آی حبس و ۲۵ میلیون تومن پول جزاسینا محکوم ائدیلیب.
بلوچ آکتیویستلری کامپانیاسی کانالی‌نین وئردیگی بیلگیلره گؤره، ۳۰ آذر ۱۴۰۱-جی ایلده زاهیدان جزا محکمه‌‌سی، اؤنجه‌لر چاباهاردا خالق اعتراضلاری زامانی حبس اولونان و گیروو ایله سربست بوراخیلان گنج بلوچ قیزین عائله‌‌‌سی ایله تلفون دانیشیغی زامانی اونون ۶ آی حبس و ۲۵ میلیون تومن پول جزاسینا محکوم ائدیلدیغینی بیلدیردی.
بو بلوچ قیزین آدی نازنین احمدی‌پوردور و ۱۳۸۵-جی ایلده آنادان اولوب و چاباهاردا یاشاییر.
نازنین احمدی‌پور ۱۴۰۱-جی ایل ۶ آباندا چاباهار شهرینده خالق اعتراضلاری زامانی حبس ائدیلمیش و ۲۶ آباندا گیروو ایله سربست بوراخیلمیشدیر. احمدی‌پورون محکمه ایجلاسی ۲۸ آذرده زاهیدان محکمه‌‌سی‌نین ۱۰۳-جو جینایت شؤبه‌سینده کئچیریلیب.
بو گنج بلوچ قیزین اتهاملاری رژیمخ قارشی تبلیغات، میتینقلرده ایشتیراک و اینسانلاری اعتراض آکسییالارینا تحریک ائتمک دیر. حؤکمه اعتراض ائتمک اوچون اونا ۲۰ گون واخت وئریلیب.
اؤتن اوچ آیدا ایران خالقی‌نین ایران ایسلام جمهورییتینه قارشی عومومی اعتراضلاریندا مینلرله اینسان حبس ائدیلیب و ایران‌وایرین آراشدیرما و یوخلاماسینا اساساً، اؤلکه‌نین ۲۶ ایالتینده آزی ۴۵۸ نفر حیاتینی ایتیریب. اؤلنلر آراسیندا ۱۵-۱۷ یاش آراسیندا ان آزی ۴۹ اوشاق وار و بو مدت ایچینده یوزلرله اوشاق حبس ائدیلیب، سورغو-سؤال ائدیلیب و ایشگنجه‌لره معروض قالیب.
#عومومی_اعتراضلار
